ការបំបៅកូនដោយទឹកដោះម្ដាយ នៅអំឡុងម៉ោងដំបូងបន្ទាប់ពីសម្រាលភ្លាម អាចទប់ស្កាត់មរណភាពមាតាបានប្រហែល២០% ប៉ុន្តែការបំបៅកូនដោយទឹកដោះម្ដាយតែមួយមុខគត់ ចាប់ពី០-៦ខែ មានចំនួន៧៣.៥ភាគរយ នៅឆ្នាំ២០១០ បានធ្លាក់មកនៅ ៦៤.៦ភាគរយ នៅឆ្នាំ២០១៤ ទន្ទឹមនឹងការបំបៅទារកដោយដបទឹកដោះគោ បន្តកើនឡើងខ្ពស់។
នេះបើតាមប្រសាសន៍ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ក្នុងឱកាសឯកឧត្តមបានអញ្ជើញជាអធិបតីក្នុងពិធី សប្ដាហ៍ពិភពលោកបំបៅកូនដោយទឹកដោះម្ដាយឆ្នាំ២០១៩ នាព្រឹកថ្ងៃទី៣០ ខែកក្កដា ឆ្នាំ២០១៩ ក្នុងក្រុងសៀមរាប។
ឯកឧត្តមសាស្ត្រាចារ្យ ម៉ម ប៊ុនហេង បានបង្ហាញថា នៅឆ្នាំ២០០០ អត្រាមរណកុមារអាយុក្រោម ៥ឆ្នាំមានចំនួន៨៣ករណី ក្នុង១ពាន់កំណើតរស់ និងបានថយចុះមកនៅត្រឹម ៣៥ករណី នៅឆ្នាំ២០១៤។ ជារៀងរាល់ឆ្នាំ មរណភាពកុមារ សរុប ៤,៥០០ករណីនៅកម្ពុជា មានទំនាក់ទំនងជាមួយនឹងបញ្ហាកង្វះអាហារូបត្ថម្ភ។
ឯកឧត្តមសាស្ត្រាចារ្យ បានបញ្ជាក់ថា តាមការអង្កេតប្រជាសាស្ត្របីលើក បង្ហាញថា ទឹកដោះដំបូងរបស់ម្ដាយអាចជួយទប់ស្កាត់មរណភាពកុមារប្រហែល២០ភាគរយ។ ប៉ុន្តែជាការព្រួយបារម្ភ គួរឲ្យកត់សម្គាល់ ការបំបៅដោយម្សៅទឹកដោះគោ មានការកើនឡើងពី ១១.៨ភាគរយ នៅឆ្នាំ២០០៥ រហូតដល់២៤.៧ភាគរយនៅឆ្នាំ២០១០ និងកើនរហូតដល់៣១ភាគរយ នៅឆ្នាំ២០១៤។ ការបន្តកើនឡើងនៃអត្រាដ៏ខ្ពស់នេះ វាបានធ្វើប៉ះពាល់ ដល់គោលនយោបាយជាតិស្ដីពីការបំបៅកូនដោយទឹកដោះម្ដាយ យុទ្ធសាស្ត្រជាតិស្ដីពីសន្តិសុខស្បៀង និងអាហារូបត្ថម្ភឆ្នាំ២០១៤-២០១៨ ផែនទីបង្ហាញផ្លូវសម្រាប់ពន្លឿនការកែលម្អអាហារូបត្ថម្ភ ឆ្នាំ២០១៤-២០២០ និងយុទ្ធសាស្ត្រវិស័យសុខាភិបាល២០១៦-២០២០។
ឯកឧត្តម រដ្ឋមន្ត្រីក្រសួងសុខាភិបាល ក៏បានអំពាវនាវដល់ គ្រប់ភាគីពាក់ព័ន្ធទាំងអស់ កំពុងធ្វើការផ្នែកគាំពារមាតានិងទារកនិងអាហាររូបត្ថម្ភឲ្យបន្តអនុវត្តសកម្មភាព ក្នុងនោះរួមមាន៖
១) បង្កើនកិច្ចសហប្រតិបត្តិការឲ្យកាន់តែរឹងមាំដើម្បីធានាឲ្យបាននូវអាហាររូបត្ថម្ភសំរាប់មាតានិងកុមារ ដែលក្នុងនោះការបំបៅកូនដោយទឹកដោះម្ដាយគឺជាការវិនិយោគដ៏ប្រសើរបំផុតសម្រាប់កាត់បន្ថយបញ្ហាកង្វះអាហារូបត្ថម្ភកុមារ
២) បន្តយុទ្ធនាការអប់រំផ្សព្វផ្សាយអំពីសារៈសំខាន់នៃការបំបៅកូនដោយទឹកដោះម្ដាយទាំងនៅថ្នាក់ជាតិនិងថ្នាក់ក្រោមជាតិ
៣) បន្តជំរុញឲ្យមាតាទៅពិនិត្យផ្ទៃពោះ មុនពេលសម្រាល និងសម្រាលកូននៅមន្ទីរពេទ្យ ឬមណ្ឌលសុខភាព
៤) បន្តផ្ដល់សេវាសុខភាពនិងយកចិត្តទុកដាក់ថែទាំសុខភាពមាតានិងកុមារតាមរយៈការពង្រីកបន្ថែមមន្ទីរពេទ្យនិងសហគមន៍ស្រលាញ់ទារកនៅទូទាំងប្រទេស
៥) ប្រព័ន្ធផ្សព្វផ្សាយរដ្ឋ និងឯកជន ត្រូវបន្តផ្សព្វផ្សាយនិងបង្កើតកម្មវិធីផ្សេងៗឲ្យសកម្មភាពពាក់ព័ន្ធនិងអាហារូបត្ថម្ភនិងការបំបៅទឹកដោះម្ដាយប្រកបដោយអត្ថន័យនិងខ្លឹមសារអប់រំ
៦) បន្តការពង្រឹងការអនុវត្តឲ្យបានម៉ឺងម៉ាត់នូវអនុក្រឹត្យលេខ ១៣៣ និងប្រកាសរួមអន្តរក្រសួងលេខ០៦១ ស្ដីពីការផ្សព្វផ្សាយលក់ផលិតផលចិញ្ចឹមទារកនិងកុមារ
៧) បន្តការត្រួតពិនិត្យតាមដានគ្រប់គ្រងឲ្យបានម៉ឺងម៉ាត់ការឃោសនាពាណិជ្ជកម្មនិងផ្សព្វផ្សាយលក់ផលិតផលទឹកដោះគោម្សៅផ្សំតាមរូបមន្តដែលនាំឲ្យមានការភាន់ច្រឡំដោយសាធារណជន
មានប្រសាសន៍ក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប គាំទ្រយ៉ាងពេញទំហឹងដល់ ទិវាសប្តាហ៍ពិភពលោកបំបៅកូនដោយទឹកដោះម្ដាយ ដែលទិវានេះ គឺជាសកម្មភាពជួយផ្សព្វផ្សាយដល់អ្នកម្ដាយគ្រប់រូបដែលមិនទាន់យល់ច្បាស់ពីអត្ថប្រយោជន៍របស់ទឹកដោះដំបូង នឹងការចិញ្ចឹមកូន មានអាយុតិចជាង៦ខែដោយទឹកដោះម្ដាយតែមួយមុខគត់។ ទិវានេះ រួមចំណែកឲ្យកម្ពុជា អាចសម្រេចគោលដៅអភិវឌ្ឍន៍ប្រកបដោយចីរភាពនៅឆ្នាំ២០៣០។ បន្ថែមទៀតនោះ សកម្មភាពទាំងអស់នេះ បានបន្តជួយជំរុញ និងគាំទ្រ ដល់ការសម្រេចនូវចក្ខុវិស័យរបស់ប្រទេសកម្ពុជា ក្លាយជាប្រទេស មានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់ឆ្នាំ២០៥០។
ឯកឧត្តមអភិបាលខេត្តសៀមរាប ក៏បានធ្វើការអំពាវនាវដល់ភាគីពាក់ព័ន្ធទាំងអស់ ធ្វើការលើផ្នែកគាំពារសុខភាពណារូបត្ថម្ភម្ដាយ និងកុមារឲ្យបន្តអនុវត្តសកម្មភាពរបស់ខ្លួន ដើម្បីលើកកម្ពស់ការអនុវត្តបំបៅដោះកូន ដើម្បីចូលរួមក្នុងការធ្វើឲ្យប្រសើរឡើងដល់សុខភាពនិងអាហារូបត្ថម្ភរបស់កុមារកម្ពុជា។
អត្ថបទ៖ លោក សេង ផល្លី
រូបភាព ៖ លោក ខេង ឧត្តម
