បន្ទាប់ពីទទួលសេចក្តីរាយការណ៍ថាមានករណីផ្ទុះជំងឺគ្រុនឈាមនៅក្នុងមជ្ឈមណ្ឌលអភិវឌ្ឍន៍យោធិនពិការ គូលែន ៣១៧ សៀមរាប នាល្ងាចថ្ងៃទី២៩ ខែកក្កដា ឆ្នាំ២០១៩ម្សិលមិញនេះ ក្រុមការងារជំនាញនៃមន្ទីរសុខាភិបាលខេត្តសៀមរាប បានចុះបាញ់ថ្នាំសម្លាប់សត្វមូសនៅតាមផ្លូវមួយចំនួន ក្នុងបរិវេណសាលាបឋមសិក្សា អនុវិទ្យាល័យ វិទ្យាល័យ វត្តព្រះខ័នសែនជ័យ មណ្ឌលសុខភាព និង អាគារដ្ឋបាលក្នុងមជ្ឈមណ្ឌល ។
លោកឧត្តមសេនីយ៍ឯក ពៅ ស៊ា នាយកមជ្ឈមណ្ឌលអភិវឌ្ឍន៍យោធិនពិការសម្តេចតេជោ ហ៊ុន សែន គូលែន ៣១៧ សៀមរាប បានមានប្រសាសន៍ថា ចាប់តាំងពីមានជំងឺគ្រុនឈាមផ្ទុះឡើងមក មានអ្នកជំងឺប្រមាណជាង១០០នាក់ហើយ ដែលបានមកទទួលការព្យាបាលនៅក្នុងមជ្ឈមណ្ឌល ជាពិសេសកាលពីប៉ុន្មានថ្ងៃមុន មណ្ឌលសុខភាពទទួលអ្នកជំងឺមកព្យាបាលមិនក្រោម៣០ទៅ៤០នាក់ទេក្នុងមួយថ្ងៃ ខណៈដែលនៅមណ្ឌលសុខភាព ៣១៧ គូលែន សៀមរាប មានគ្រូពេទ្យព្យាលបាលត្រឹមតែបីនាក់ប៉ុណ្ណោះ ។
លោកឧត្តមសេនីយ៍ឯក ពៅ ស៊ា មានប្រសាសន៍ទៀតថា ក្រៅពីយោធិនពិការ និងក្រុមគ្រួសាររបស់ពួកគាត់ដែលរស់នៅក្នុងមជ្ឈមណ្ឌលយោធិនពិការនេះ ប្រជាពលរដ្ឋដែលរស់នៅជុំវិញមណ្ឌល ក៏មកទទួលសេវានៅក្នុងមណ្ឌលសុខភាពនេះដែរ ហើយរហូតមកដល់ពេលនេះ មិនទាន់មានអ្នកជំងឺគ្រុនឈាមណាម្នាក់រងគ្រោះថ្នាក់ដល់ជីវិតទេ ដោយសារថា មុនពេល និងអំឡុងពេលផ្ទុះជំងឺគ្រុនឈាមនេះ ខាងមណ្ឌលសុខភាព ក៏ដូចជាផ្នែកពាក់ព័ន្ធ បានចុះផ្សព្វផ្សាយអប់រំដល់ប្រជាពលរដ្ឋ ដោយយើងបានប្រាប់គាត់មុនថា បើក្តៅខ្លួនលើសពី៣៨អង្សារ ត្រូវប្រញ៉ាប់ទៅជោះឈាមមើល ដល់អីចឹងពួកគាត់សុទ្ធសឹងតែយល់ដឹង ហើយគាត់មកភ្លាមៗ ហើយបើអ្នកឈឺធ្ងន់យើងបញ្ជូនគាត់ទៅពេទ្យខេត្ត ។
ព័ត៌មានជាតិ ថ្មីៗ
យោងតាមរបាយការណ៍របស់មន្ទីរសុខាភិបាលខេត្តសៀមរាប បានឲ្យដឹងថា ក្នុងរយ:ពេល២៩សប្តាហ៍ គឺគិតត្រឹមថ្ងៃទី២៩ ខែកក្កដា ឆ្នាំ២០១៩ នេះ មានអ្នកជំងឺគ្រុនឈាមចំនួន១៥.៥៤៥នាក់ បានមកទទួលសេវាព្យាបាលនៅតាមមន្ទីរពេទ្យនានាក្នុងខេត្តសៀមរាប ហើយក្នុងចំណោមអ្នកជំងឺទាំងអស់នោះ មានអ្នកជំងឺចំនួន១៥នាក់បានស្លាប់ ៕
អត្ថបទ និង រូបថត ៖ លោក ជា ស្រស់ និង លោក ខេង ឧត្តម
កែសម្រួលអត្ថបទ ៖ លោក លីវ សាន្ត
