ក្នុងឱកាសប្រារព្ធទិវាសប្តាហ៍ពិភពលោកបំបៅកូនដោយទឹកដោះម្តាយ ក្រោមប្រធានបទ ៖ យើងទាំងអស់គ្នាគាំទ្រការបំបៅកូន ដោយទឹកដោះម្តាយ នៅបរិវេណសួនកម្សាន្តខាងជើងព្រះរាជដំណាក់ ក្នុងក្រុងសៀមរាប នាព្រឹកថ្ងៃទី៣០ ខែ កក្កដា ឆ្នាំ២០១៩នេះ ឯកឧត្តម ទៀ សីហា អភិបាលខេត្តសៀមរាប បានប្រគល់រថយន្តសង្គ្រោះ ចំនួន ៤គ្រឿង ដែលទទួលបានពីខេត្តឃ្យុងគី នៃសាធារណរដ្ឋ កូរ៉េ ដែលជាខេត្តសម្ព័ន្ធមេត្រីភាពនឹងខេត្តសៀមរាប ជូនដល់មន្ទីរពេទ្យបង្អែក និង មណ្ឌលសុខភាព យកទៅបម្រើការងារសង្គ្រោះអ្នកជំងឺ ព្រមទាំងបានប្រគល់រថយន្តពន្លត់អគ្គិភ័យ ចំនួន២គ្រឿង ជូនដល់ស្នងការនគរបាលខេត្តសៀមរាប ដែលការប្រគល់នេះ ប្រព្រឹត្តទៅក្រោមអធិបតីភាពឯកឧត្តមវេជ្ជបណ្ឌិត សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ។
សូមបញ្ជាក់ថា បើតាមរបាយការណ៍របស់មន្ទីរសុខាភិបាលខេត្តសៀមរាប បានឲ្យដឹងថា កន្លងមកនៅទូទាំងខេត្ត មានរថយន្តសង្គ្រោះកំពុងប្រតិបត្តិការសរុបចំនួន ២០ គ្រឿង និង តាមរបាយការណ៍របស់ស្នងការដ្ឋាននគរបាលខេត្តសៀមរាប បានឲ្យដឹងថា នៅទូទាំងខេត្តមានរថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត កំពុងប្រតិបត្តិការសរុបចំនួន ២០ គ្រឿង ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
