ប្រភេទកូនឈើរាំង ចំនួន១ពាន់ដើម ត្រូវបានដាំដុះនៅលើផ្ទៃដី ចំនួន៣ហិកតា នៅចំណុចខាងលិចត្រពាំងច្រាំង ក្នុងឃុំ សសរស្តម្ភ ស្រុកពួក ខេត្តសៀមរាប ដើម្បីទុកជាព្រៃលិចទឹក និងជម្រកត្រីពងកូន។
មានប្រសាសន៍នៅថ្ងៃទី ២៩ ខែ កក្កដា ឆ្នាំ២០១៩ ក្នុងឱកាសនោះ លោក ស៊ីន ចាន់ថុល អភិបាលស្រុកពួកស្តីទី បានឲ្យដឹងថា អាជ្ញាធរស្រុកពួក បានរៀបចំធ្វើពិធីការដាំដុះស្តារឡើងវិញ នូវធនធានធម្មជាតិព្រៃលិចទឹកនៅពេលនេះ គឺដើម្បីធ្វើឲ្យតំបន់ដែលរិចរិល និង រងការកាប់បំផ្លាញពីក្រុមជនខិលខួច ទទួលបានគម្របធម្មជាតិឡើងវិញ សម្រាប់ធានាបាននូវទីជម្រកត្រីពងកូន នារដូវវស្សា និង ជាទីជម្រកសត្វស្លាបផងដែរ ។
លោក ស៊ីន ចាន់ថុល បានបន្ថែមថា នេះជាលើកទីពីរហើយ ដែលអាជ្ញាធរមូលដ្ឋាន បានធ្វើការដាំដុះឡើងវិញនូវកូនឈើព្រៃលិចទឹក ដែលកាលពីលើកទី១ អាជ្ញាធរបានដឹកនាំធ្វើការដាំដុះនៅលើផ្ទៃដីចំនួន ១០ហិកតា នៅ ចំណុចត្រពាំងច្រាំង ក្នុងឃុំកែវពណ៌ ស្រុកពួក ចំនួន៤ពាន់ដើម ហើយលើកទីពីរនេះ ដាំលើផ្ទៃដីទំហំ ៣ហិកតា ចំនួន ១ពាន់ដើម នៅខាងលិចត្រពាំងច្រាំង ក្នុងឃុំសសស្តម្ភ ក្នុងស្រុកពួកដដែល នៃខេត្តសៀមរាប ។
លោកក៏បានថ្លែងអំណរព្រះគុណ និង អគុណដល់ព្រះសង្ឃ ប្រជាពលរដ្ឋ ដែលបាននិមន្ត អញ្ជើញចូលរួមដោយទឹកចិត្តល្អប្រពៃ ព្រមទាំងបានធ្វើការអំពាវនាវដល់បងប្អូនប្រជាពលរដ្ឋ រួមទាំងអ្នកពាក់ពន្ធ័ទាំងអស់ សូមបញ្ឈប់នូវរាល់ទង្វើទាំងឡាយ ក្នុងការបំផ្លាញសម្បត្តិធម្មជាតិ សូមបែរមកចូលរួមជួយថែរក្សាការពារធនធានធម្មជាតិរបស់យើង សម្រាប់កូនចៅជំនាន់ក្រោយៗ៕
អត្ថបទ និង រូបភាព ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
