សិស្សចំនួន ៨នាក់ ដែលប្រឡងជាប់អាហារូបករណ៍កម្រិតខ្លី ពីសាកលវិទ្យាល័យជីជីសស្ទើរប្រទេសអង់គ្លេស បានត្រឡប់មកដល់ខេត្តសៀមរាបវិញហើយ នាល្ងាចថ្ងៃទី២៩ខែកក្កដាឆ្នាំ២០១៩ នៅព្រលានយន្តហោះអន្តរជាតិសៀមរាប។
លោក រ័ត្ន រស្មី នាយកសាលាវេសស្ទើនអន្តរជាតិខេត្តសៀមរាប បានមានប្រសាសន៍ថា សិស្សនៃសាលាវេសស្ទើនអន្តរជាតិសាខាសៀមរាប ចំនួន ៨នាក់នេះ បានធ្វើដំណើរទស្សនកិច្ចសិក្សានៅចក្រភពអង់គ្លេស ក្នុងរយៈពេល ១០ថ្ងៃ។ គោលបំណងនៃទស្សនកិច្ចនេះ ដើម្បីបានសិក្សាស្វែងយល់ពីនិងផ្លាស់ប្ដូរបទពិសោធន៍គ្នាទៅវិញទៅមករវាងក្រុមសិស្សានុសិស្សនៃសាលាវេសស្ទើន និង សាកលវិទ្យាល័យជីជិសស្ទើទៅលើវប្បធម៌ប្រពៃណីទំនៀមទំលាប់។
លោកនាយកសាលា ក៏បានលើកទឹកចិត្តដល់ សិស្សានុសិស្សទាំងអស់ខិតខំសិក្សារៀនសូត្រទាំងផ្នែកភាសាបរទេស និងមុខវិជ្ជាចំណេះទូទៅ ដើម្បីត្រៀមប្រកួតប្រជែងដណ្តើមយកឱកាសទៅទស្សនកិច្ចសិក្សាជាមួយបណ្តាសាលាផ្សេងៗក្នុងពិភពលោក ជាមួយនោះ សូមមាតាបិតា អាណាព្យាបាល ចូលរួមតាមដានការសិក្សា ពន្យល់អប់រំទូន្មាន និងជួយទំនុកបំរុង ដល់ការសិក្សារបស់កូនៗរបស់ពួកគាត់ សម្រាប់អាចចាប់យកឱកាសបាន នៅពេលក្រោយៗទៀត ។
ព័ត៌មានជាតិ ថ្មីៗ
តំណាងសិស្ស ដែលបានទៅធ្វើទស្សនកិច្ចនៅចក្រភពអង់គ្លេសនាពេលនោះ បានការត្រេកអរ និងមោទកភាព ដែលពួកគេ បានពាំនាំនូវវប្បធម៌ អរិយធម៌ សិល្បៈ ទំនៀមទម្លាប់ និងប្រវត្តិសាស្ត្រ ដ៏ល្បីល្បាញរបស់កម្ពុជា ទៅចែករំលែកជាមួយក្រុមសិស្សនិស្សិត រួមនិងអ្នកពាក់ព័ន្ធនានានៅទីនោះ។ បន្ទាប់ពីត្រឡប់មកដល់កម្ពុជាវិញ ពួកគេនឹងនាំយកបទពិសោធទាំងនេះ ចែករំលែកដល់បងប្អូនមិត្តភិក្ត ព្រមទាំងជំរុញឱ្យពួកគាត់ខិតខំសិក្សារៀនសូត្រលើមុខវិជ្ជាចំណេះទូទៅ ភាសាជាតិ ជាពិសេសផ្តោតលើភាសាអង់គ្លេសឱ្យបានខ្លាំក្លាថែមទៀត ដើម្បីចាប់យកឱកាសបានទៅទស្សនកិច្ចសិក្សាដូចពេលនេះ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
