មានប្រសាសន៍ក្នុងកិច្ចប្រជុំផ្សព្វផ្សាយស្តីពីការរៀបចំសណ្តាប់ធ្នាប់ ការដំឡើងស្លាកយីហោ និង ផ្ទាំងផ្សព្វផ្សាយពាណិជ្ជកម្មគ្រប់ប្រភេទក្នុងខេត្តសៀមរាប នៅសាលាខេត្តសៀមរាប នាព្រឹកថ្ងៃទី០៧ ខែកញ្ញា ឆ្នាំ២០១៨ នេះ លោក ពិន ប្រាកដ អភិបាលរងខេត្តសៀមរាប បានបញ្ផាក់ថា បច្ចុប្បន្ននេះយើងសង្កេតឃើញថា ការដាក់តាំងស្លាកយីហោ ឬផ្ទាំងផ្សាយពាណិជ្ជកម្ម ប៉ាណូ របារកាត់ទទឹងផ្លូវ ប្រអប់ភ្លើង LED ផ្ទាំងផ្សព្វផ្សាយពាណិជ្ជកម្មចល័ត-អចល័ត និងផ្ទាំងផ្សាយពាណិជ្ជកម្មផ្សេងៗទៀត បាននឹងកំពុងដំឡើង ឬដាក់តាំងបង្ហាញនៅលើដីចំណីផ្លូវទីតាំងអាជីវកម្ម ឬជាប់ជញ្ជាំងអគារនានា ឬផ្សព្វផ្សាយនៅទីសាធារណៈផ្សេងៗ ដែលទីតាំងមួយចំនួនពុំទាន់មានលិខិតអនុញ្ញាត ការត្រួតពិនិត្យលក្ខណៈបច្ចេកទេសពីអាជ្ញាធរមានសមត្ថកិច្ចពាក់ព័ន្ធ ហើយទីតាំងមួយចំនួនទៀតមានលិខិតអនុញ្ញាត ប៉ុន្តែអស់សុពលភាព ជាពិសេសការដំឡើងស្លាកយីហោ ឬផ្ទាំងផ្សាយពាណិជ្ជកម្មគ្រប់ប្រភេទមួយចំនួនបានសរសេរជាអក្សរបរទេសសុទ្ធពុំមានសរសេរជាអក្សរខ្មែរ ដែលជាហេតុនាំឲ្យបាត់បង់នូវសោភ័ណភាព សណ្តាប់ធ្នាប់របៀបរៀបរយសាធារណៈ និងប៉ះពាល់ដល់វប្បធម៌ និងអក្សរសាស្ត្រជាតិខ្មែរ។
លោក ពិន ប្រាកដ បានមានប្រសាសន៍ទៀតថា ក្នុងនាមរដ្ឋបាលខេត្តសៀមរាប បានធ្វើការណែនាំដល់ម្ទាស់ ឬតំណាងអាជីវកម្មដ្ឋានទេសចរណ៍ទាំងអស់ថា ទី១- ទីតាំងស្លាកយីហោ និងដំឡើងផ្ទាំងផ្សព្វផ្សាយគ្រប់ប្រភេទ ដែលមានទំហំ ៤ម៉ែត្រក្រឡាចុះក្រោម ត្រូវដាក់ពាក្យបំពេញបែបបទស្នើសុំលិខិតអនុញ្ញាតនៅការិយាល័យច្រកចេញចូល តែមួយនៃរដ្ឋបាលក្រុង-ស្រុក និងទំហំ ៤ម៉ែត្រក្រឡាឡើង ត្រូវដាក់ពាក្យបំពេញបែបបទស្នើសុំលិខិតអនុញ្ញាតនៅអង្គភាពច្រកចេញចូលតែមួយនៃរដ្ឋបាលខេត្ត , ទី២-ចំពោះការសរសេរអក្សរដាក់នៅលើស្លាកយីហោ និងដំឡើងផ្ទាំងផ្សព្វផ្សាយគ្រប់ប្រភេទ ត្រូវសរសេរអក្សខ្មែរមានទំហំធំជាងអក្សរបរទេស ដាក់នៅជួរខាងលើ និងសរសេរអក្សរបរទេស មួយភាគពីរ (១/២) នៃអក្សរខ្មែរ ដាក់នៅជួរខាងក្រោម និងសរសេរអក្សរខ្មែរ ត្រូវអនុវត្តតាមវចនានុក្រមរបស់សម្តេចសង្ឃ «ជួត ណាត» និង ទី៣.ម្ចាស់ទីតាំងអាជីវកម្ម សូមដាក់តាំង ឬដំឡើងឲ្យត្រឹមត្រូវតាមលក្ខណៈបច្ចេកទេស ជាពិសេសត្រូវតាមដាន និងត្រួតពិនិត្យនូវស្លាកយីហោ ឬផ្ទាំងផ្សព្វផ្សាយពាណិជ្មកម្មជាប្រចាំ ។
លោក ពិន ប្រាកដ បានមានប្រសាសន៍បន្ថែមទៀតថា ចំពោះរដ្ឋបាលក្រុង ស្រុក មន្ទីរ អង្គភាពជំនាញពាក់ព័ន្ធ ត្រូវចាត់វិធានការទប់ស្កាត់ តាមដានត្រួតពិនិត្យ ណែនាំរាល់ការដាក់តាំង ឬតម្លើងស្លាកយីហោ ឬផ្ទាំងផ្សព្វផ្សាយពាណិជ្មកម្មគ្រប់ប្រភេទ និងចាត់វិធានការរុះរើចំពោះទីតាំងដែលទំហំ ៤ម៉ែត្រក្រឡាចុះក្រោម ដែលពុំមានលិខិតអនុញ្ញាតពីរដ្ឋបាលក្រុង ស្រុក ឬអស់សុពលភាព ព្រមទាំងត្រូវរាយការណ៍អំពីចំនួនស្ថិតិទីតាំងដែលទំហំ ៤ម៉ែត្រក្រឡាឡើង មករដ្ឋបាលខេត្តដើម្បីចាត់វិធានការ ហើយម្ចាស់ទីតាំងអាជីវកម្ម ត្រូវផ្តល់កិច្ចសហការ និង រាយការណ៍ជូនសមត្ថកិច្ចជាបន្ទាន់ ក្នុងករណីសង្ស័យ ឫឃើញមានបទល្មើសគ្រឿងញៀន និងផ្សេងទៀតកើតឡើងក្នុងទីតាំងរបស់ខ្លួន និងអនុវត្តតាមខ្លឹមសារនៃសេចក្ដីអំពាវនាវរបស់លេខាធិការដ្ឋាននៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់ៈមិនប្រព្រឹត្តបទល្មើស ជួញដូរ រក្សាទុក ចាត់តាំងឲ្យប្រើប្រាស់ សំរួលឲ្យប្រើប្រាស់ បង្ខំឲ្យប្រើប្រាស់សារធាតុញៀនដោយខុសច្បាប់ ៕
អត្ថបទ និង រូបថត ៖ លោក អ៊ិន សីហរិទ្ធ និង លោក គឿន វេត
កែសម្រួលអត្ថបទ ៖ លោក លីវ សាន្ត
