សម្ភារកីឡាផ្នែកបាល់ទាត់និងបាល់ទះ សរុបជាទឹកប្រាក់ចំនួន២៥០ដុល្លារអាម៉េរិក និង ថវិកាចំនួនមួយលានរៀលផ្សេងទៀត សម្រាប់កសាងសួនអមសង្ខាងផ្លូវចូលសាលា ដែលជាអំណោយសប្បុរសធម៌រួមរបស់លោក ស៊ុក ឈុន្នី និង លោក ជូ ពុន មានទីលំនៅក្នុងឃុំពួក ស្រុកពួក ត្រូវបានប្រគល់ជូនដល់វិទ្យាល័យចំណេះទូទៅ និង បច្ចេកទេសពួក កាលពីព្រឹកថ្ងៃទី០៩ ខែកញ្ញា ឆ្នាំ២០១៨ ម្សិលមិញនេះ ដើម្បីបំពេញតាមតម្រូវការចាំបាច់របស់សាលា ។
លោក អាន លឹមខេង នាយកវិទ្យាល័យចំណេះទូទៅ និង បច្ចេកទេសពួក បានមានប្រសាសន៍ថា សម្ភារកីឡាផ្នែកបាល់ទាត់និងបាល់ទះ ដែលជាអំណោយរបស់លោក ស៊ុក ឈុន្នី និង លោក ជូ ពុន នាពេលនេះ ពិតជាបានរួមចំណែកមួយយ៉ាងសំខាន់ សម្រាប់លើកស្ទួយវិស័យកីឡានៅក្នុងសាលារៀន ដែលវិស័យនេះត្រូវបានប្រមុខរាជរដ្ឋាភិបាលកម្ពុជា ក៏ដូចជាក្រសួងអប់រំយុវជននិងកីឡា កំពុងយកចិត្តទុកជាខ្លាំង ដូច្នេះតាមរយៈនេះ ជំនួសមុខគណៈគ្រប់គ្រងសាលា លោកគ្រូអ្នកគ្រូ និងសិស្សានុសិស្សទាំងអស់ សូមថ្លែងអំណគុណយ៉ាងជ្រាលជ្រៅដល់លោទាំងពីរ ដែលកន្លងមកតែងតែគាំទ្រនិងជួយឧបត្ថម្ភដល់សាលាជារៀងរហូតមកតាមតម្រូវការជាក់ស្ដែង ។
លោក អាន លឹមខេង មានប្រសាសន៍ទៀតថា ក្រៅពីការជួយឧបត្ថម្ភចំពោះវិទ្យាល័យចំណេះទូទៅ និង បច្ចេកទេសពួក លោកទាំងពីរនាក់នេះ ក៏ធ្លាប់បានជួយឧបត្ថម្ភដល់សាលារៀនមួយចំនួនផ្សេងៗទៀត ទាំងនៅក្នុង និងក្រៅភូមិសាស្ត្រស្រុកពួក ព្រមទាំងបានជួយឧបត្ថម្ភដល់គ្រួសារក្រីក្រមួយចំនួនផងដែរ ដែលសកម្មភាពនេះ ជាការរួមចំណែកជាមួយរាជរដ្ឋាភិបាលកម្ពុជា ក្នុងការលុបបំបាត់ភាពក្រីក្ររបស់ប្រជាពលរដ្ឋ ។
ព័ត៌មានជាតិ ថ្មីៗ
លោក ស៊ុក ឈុន្នី បានមានប្រសាសន៍ថា ស្របតាមគោលនយោបាយរបស់រាជរដ្ឋាភិបាលកម្ពុជា ក៏ដូចជាក្រសួងអប់រំយុវជននិងកីឡា ដែលកំពុងតែយកចិត្តទុកជាខ្លាំងលើវិស័យកីឡា ហើយដោយមើលឃើញពីភាពតម្រូវការចាំបាច់របស់សាលាផងនោះ លោក និង លោក ជូ ពុន បានមូលមតិគ្នា ទិញជាសម្ភារកីឡាផ្នែកបាល់ទាត់និងបាល់ទះ ក្នុងគោលបំណងលើកស្ទួយវិស័យកីឡានៅក្នុងសាលាវិទ្យាល័យចំណេះទូទៅ និង បច្ចេកទេសពួក ឲ្យកាន់តែប្រសើរឡើង ជាពិសេសកីឡានេះ ក្រៅពីការលើកកម្ពស់ឲ្យសុខភាពមាំមួន និង បង្កើននូវចំណងមិត្តភាព សាមគ្គីភាពនោះ ក៏ជាចំណែកមួយយ៉ាងសំខាន់ ធ្វើឲ្យយុវសិស្សរបស់យើង ចៀសឆ្ងាយបានពីការប្រព្រឹត្តនូវអំពើខុសឆ្គងនានា ដែលធ្វើឲ្យប៉ះពាល់ដល់សន្តិសុខសង្គមជាតិផងដែរ ។
លោក ស៊ុក ឈុន្នី មានប្រសាសន៍ទៀតថា រយៈកាលកន្លងមក លោក និង លោក ជូ ពុន ក៏ធ្លាប់បានជួយជាថវិកាទៅតាមលទ្ធភាពរបស់ខ្លួន សម្រាប់កសាងហេដ្ឋារចនាសម្ព័ន្ធនានាក្នុងសាលា តាមការរីកចម្រើនរបស់សាលាផងដែរ ហើយតទៅអនាគត លោកនឹងជួយឧបត្ថម្ភបន្តទៀតតាមលទ្ធភាពរបស់ខ្លួន តាមតម្រូវការចាំបាច់របស់សាលារៀន ជាពិសេស នៅពេលឆាប់ៗខាងមុខនេះ លោក និង លោក ជូ ពុន បានសន្យាថា នឹងជួយចាក់ដីបំពេញសម្រាប់ទីលានកីឡាក្នុងសាលារៀន ៕
អត្ថបទ និង រូបថត ៖ លោក លីវ សាន្ត
