សម្តេចពិជ័យសេនា ទៀ បាញ់ ក្រើនរំលឹកដល់ថ្នាក់ដឹកនាំខេត្ត មន្ទីរអង្គភាព អាជ្ញាធរក្រុងស្រុក ក្រុមប្រឹក្សាឃុំសង្កាត់ក្នុងទូទាំងខេត្តសៀមរាប ត្រូវបន្តអនុវត្តការងារឱ្យកាន់តែមានប្រសិទ្ឋភាព

ក្នុងឱកាសសំណេះសំណាលជាមួយក្រុមការងារថ្នាក់ជាតិចុះជួយមូលដ្ឋានខេត្តសៀមរាប ថ្នាក់ដឹកនាំខេត្ត អាជ្ញាធរមូលដ្ឋានឃុំសង្កាត់ មកពីស្រុកក្រុង ឃុំសង្កាត់ ប្រមាណជា២ពាន់នាក់ នៅសណ្ឋាគារសុខាសៀមរាប កាលពីថ្ងៃទី០៩ ខែកញ្ញាឆ្នាំ២០១៨ម្សិលមិញនេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជា ប្រធានក្រុមការងារថ្នាក់ជាតិចុះជួយខេត្តសៀមរាប មានប្រសាសន៍ថា ការបោះឆ្នោតជ្រើសរើសសមាជិកសភាអាណត្តិទី៦កាល កាលពីថ្ងៃទី២៩ ខែកក្កដា ឆ្នាំ២០១៨កន្លងទៅនេះ គឺជាការបោះឆ្នោតមួយស្ថិតក្នុងបរិយាកាសពោរពេញដោយសន្តិភាព និងការរីកចម្រើន ទាំងនៅក្នុងយុទ្ឋនាការរកសំឡេងឆ្នោត និង ថ្ងៃបោះឆ្នោត ជាព្រឹត្តិការណ៍ប្រវត្តិសាស្ត្រមួយដែលមានសារៈសំខាន់ សម្រាប់ប្រជាជន និងប្រទេសជាជាតិកម្ពុជាទាំងមូល ដែលជាការឆ្លុះបញ្ចាំងឲ្យឃើញពីការរួមគ្នាអនុវត្តបានយ៉ាងមានប្រសិទ្ឋភាព នូវកម្មវិធីនយោបាយរបស់រាជរដ្ឋាភិបាលក្នុងពេលកន្លងមកប្រកបដោយស័ក្ដិសិទ្ឋភាព ឈរលើស្មារតីមនសិការ សាមគ្គីភាព ឯកភាពយ៉ាងមានប្រសិទ្ឋភាព ។

សម្តេចពិជ័យសេនា មានប្រសាសន៍ទៀតថា នៅក្នុងអាណត្តិទី៥ នៃរាជរដ្ឋាភិបាល ក្រោមការដឹកនាំរបស់សម្តេច តេជោ ហ៊ុន សែន ជានាយករដ្ឋមន្ត្រី បានធ្វើកំណែទម្រង់រដ្ឋយ៉ាងទូលំទូលាយនិងស៊ីជំរៅលើគ្រប់វិស័យ និងអភិវឌ្ឍសេដ្ឋកិច្ចសង្គមរីកចម្រើនឥតឈប់ឈរ ប្រកបដោយចិរភាពនិងសមធម៌ និងលើកស្ទួយកិត្យានុភាពកម្ពុជាលើឆាកអន្តរជាតិ ព្រមទាំងរក្សាបានសន្តិសុខសណ្តាប់ធ្នាប់សាធារណៈនិងសុវត្ថិភាពសង្គមបានរឹងមាំនិងរាំងស្កាត់ឩបាយកលរបស់មជ្ឈដ្ឋានអគតិនានាដែលមានគោលបំណងផ្តួលរំលំរាជរដ្ឋាភិបាលកម្ពុជាស្របច្បាប់បានយ៉ាងទាន់ពេលវេលា ដូច្នេះតាមរយៈកម្មវិធីនយោបាយ និង យុទ្ធសាស្ត្រចតុកោណដំណាក់កាលទី៤ សម្រាប់ឆ្នាំ២០១៨-២០២៣ នេះ សូមឲ្យថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធគ្រប់ប្រភេទ និងអាជ្ញាធរមូលដ្ឋានគ្រប់ជាន់ថ្នាក់ទាំងអស់ ត្រូវបន្តបេសកកម្មជារបស់ខ្លួន ដោយឈរលើទស្សនៈពីរសំខាន់ គឺប្រសិទ្ឋភាពការងារ និងស័ក្ដិសិទ្ឋភាព ដែលត្រូវបន្តអនុវត្តការងារប្រកបដោយប្រសិទ្ធភាពខ្ពស់ ពិសេសត្រូវបន្តការយកចិត្តទុកដាក់ជួយដោះស្រាយការលំបាក ឬ បញ្ហាប្រឈមនានា ជូនប្រជាពលរដ្ឋក្នុងមូលដ្ឋានឲ្យកាន់តែមានប្រសិទ្ធភាព ដោយមិនប្រកាន់និន្នាការនយោបាយ ដើម្បីជាការឆ្លើយតបចំពោះការជឿជាក់ផ្តល់ទំនុកចិត្តរបស់ប្រជាពលរដ្ឋ ដែលបានផ្តល់ជូនការគាំទ្រចំពោះសម្តេចតេជោ ហ៊ុន សែន ធ្វើជានាយករដ្ឋមន្ត្រីអាណត្តិទី៦បន្តទៀត ៕

អត្ថបទ និង រូបថត ៖ លោក យូ វង្ស និង លោក ងិន គឹមឡេង
កែសម្រួលអត្ថបទ ៖ លោក លីវ សាន្ត