នៅលើបណ្ដាញទំនាក់ទំនងសង្គម ហ្វេសប៊ុក (Facebook) ប្រជាពលរដ្ឋ នៅក្នុងព្រះរាជាណាចក្រកម្ពុជា មានការតក់ស្លុត និងបានសម្ដែងការសោកស្ដាយយ៉ាងខ្លាំង ក្រោយពីទទួលដំណឹងថា ឯកឧត្តម សាស្ត្រាចារ្យ វេជ្ជបណ្ឌិត ប៊ីត រីចណើ (BEAT RICHNER) ស្ថាបនិកមន្ទីរពេទ្យគន្ឋបុប្ផា បានទទួលមរណភាព នៅមន្ទីរពេទ្យមួយក្នុងប្រទេសស្វីស នៅថ្ងៃទី០៩ ខែកញ្ញា ឆ្នាំ២០១៨ វេលាម៉ោង ០២ : ៤៥ នាទីព្រឹក ត្រូវនឹងថ្ងៃអាទិត្យ ១៤រោច ខែស្រាពណ៍ ឆ្នាំច សំរិទ្ធឹស័ក ព.ស.២៥៦២ ក្នុងជន្មាយុ ៧១ ឆ្នាំ ដោយជរាពាធ បន្ទាប់ពីឯកឧត្តម ធ្លាក់ខ្លួនឈឺធ្ងន់ជាច្រើនខែ។
នៅរសៀលថ្ងៃទី១០ខែកញ្ញាឆ្នាំ២០១៨ រដ្ឋបាលខេត្តសៀមរាប ដឹកនាំដោយលោក ពៅ ពិសិដ្ឋ អភិបាលរងខេត្ត និងក្នុងនាមថ្នាក់ដឹកនាំខេត្ត កងកម្លាំងប្រដាប់អាវុធ និងមន្ទីរ អង្គភាព ក្នុងខេត្តសៀមរាប បាននាំយកសាររំលែកទុក្ខរបស់រដ្ឋបាលខេត្ត និង អញ្ជើញដាក់កម្រងផ្កា គោរពវិញ្ញាណក្ខន្ធ ឯកឧត្តម សាស្ត្រាចារ្យ វេជ្ជបណ្ឌិត ប៊ីត រីចណើ (BEAT RICHNER) ស្ថាបនិកមន្ទីរពេទ្យគន្ឋបុប្ផា ប្រកបដោយភាពក្រៀមក្រំ សោកស្តាយអាឡោះអាល័យជាអនេក ។
លោក ពៅ ពិសិដ្ឋ បានមានប្រសាសន៍ថា៖ក្នុងនាមក្រុមប្រឹក្សា គណៈអភិបាលខេត្ត កងកម្លាំងប្រដាប់អាវុធ មន្រ្តីរាជការ ព្រមទាំងប្រជាពលរដ្ឋទូទាំងខេត្តសៀមរាប មានសេចក្តីរន្ធត់ តក់ស្លុតឥតឧបមា ក្រោយពីបានទទួលដំណឹងដ៏ក្រៀមក្រំនេះ។
លោក ពៅ ពិសិដ្ឋ បានថ្លែងទាំងក្រៀមក្រំថា៖ មរណភាព របស់ឯកឧត្តម សាស្ត្រាចារ្យ វេជ្ជបណ្ឌិត ប៊ីត រីចណើ (BEAT RICHNER) គឺជាការបាត់បង់ដ៏ធំធេង មិនត្រឹមតែចំពោះក្រុមគ្រួសារលោកប៉ុណ្ណោះទេ តែក៏ជាការបាត់បង់នូវធនធានមនុស្សដ៏សំខាន់មួយរូប ដែលបានលះបង់កម្លាំងកាយ ចិត្ត ស្ទើរពេញមួយជីវិតលើការងារមនុស្សធម៌សម្រាប់ប្រជាជនកម្ពុជា តាមរយៈការបង្កើតមន្ទីរពេទ្យគន្ធបុប្ផា ដែលផ្តល់សេវាព្យាបាលដោយពុំគិតថ្លៃសម្រាប់កុមារកម្ពុជា លើសពីនេះលោកនៅតែបន្តស្វែងរកថវិកាដើម្បីទ្រទ្រង់មន្ទីរពេទ្យកុមារទាំងបួន ដើម្បីរួមចំណែក ជាមួយក្រសួងវិស័យសុខាភិបាល លើកកម្ពស់សុខុមាលភាពកុមារ និងស្រ្តីនៅក្នុងព្រះរាជាណាចក្រកម្ពុជាទាំងមូល។
តាមរយៈសេចក្ដីជូនដំណឹងរបស់ប្រធានមន្ទីរពេទ្យ ជ័យវរ្ម័នទី៧ ឬមន្ទីរពេទ្យគន្ធបុប្ផា ខេត្តសៀមរាប លោក យ៉ៃ ចន្ទនា បានមានប្រសាសន៍ថា ចំពោះមហាជនគ្រប់ស្រទាប់វណ្ណៈ ក្នុងខេត្តសៀមរាប ក៏ដូចជាបណ្តា ខេត្តនានាមួយចំនួនទៀត ដែលគោរព ស្រឡាញ់ចំពោះ ឯកឧត្តម សាស្ត្រាចារ្យ វេជ្ជបណ្ឌិត ប៊ីត រីចណើ (BEAT RICHNER) ស្ថាបនិកមន្ទីរពេទ្យគន្ឋបុប្ផា សូម និមន្ត និងអញ្ជើញចូលរួមរំលែកមរណៈទុក្ខជាមួយក្រុមគ្រួសារ និងមន្ត្រីបុគ្គលិក នៅក្នុងមន្ទីរពេទ្យគន្ឋបុប្ផាសៀមរាប ឬមន្ទីរពេទ្យព្រះបាទជ័យវរ្ម័ន្យទី៧ ស្ថិតនៅក្នុងក្រុងសៀមរាប ខេត្តសៀមរាប នៅតាមបណ្តោយផ្លូវទៅកាន់ប្រាសាទអង្គរ ចាប់ពីម៉ោង៧ព្រឹកដល់ម៉ោង៨យប់ ចាប់ពីថ្ងៃទី១០ ដល់ទី១៥ ខែកញ្ញា ឆ្នាំ២០១៨ នៅសាលប្រគុំតន្ត្រី នៃមន្ទីរពេទ្យគន្ឋបុប្ផាសៀមរាប ឬមន្ទីរពេទ្យព្រះបាទជ័យវរ្ម័ន្យទី៧។
លោកវេជ្ជបណ្ឌិត ប៊ីត រីចណើ (BEAT RICHNER) កើតនៅថ្ងៃទី ១៣ ខែមីនា ឆ្នាំ១៩៤៧ ហើយលោកត្រូវបានបញ្ជូនមកប្រទេសកម្ពុជា ក្នុងសកម្មភាពមនុស្ស ដោយអង្គការកាកបាទក្រហមស្វីស នៅឆ្នាំ១៩៧៤។ ដើម្បីជួយគាំទ្រដល់ការព្យាបាលមិនគិតថ្លៃដល់កុមារកម្ពុជា លោកវេជ្ជបណ្ឌិត បានបង្កើតមូនិធិគន្ធបុប្ផា នៅទីក្រុងស៊ូរីច ប្រទេសស្វីស ក្នុងឆ្នាំ១៩៩២។
អត្ថបទ និង រូបថត ៖ លោក យូ វង្ស និង លោក ជា ស្រស់
កែសម្រួលអត្ថបទ ៖ លោក សេង ផល្លី
