កាលពីរសៀលថ្ងៃទី ១០ ខែ កញ្ញា ឆ្នាំ២០១៨នេះ ទឹកប្រាក់ចំនួន ៣៦ពាន់៨៧៣ដុល្លា ដែលជារបស់លោកជំទាវ សៀង ចាន់ហេង និង សប្បុរសជនក្នុងខេត្ត ដែលបានផ្តល់តាមរយៈលោកជំទាវ គួយ ណាលីន ឃឹម ប៊ុនសុង ត្រូវបាននាំយកមកប្រគល់ជូនដល់មន្ទីរពេទ្យ បង្អែកខេត្តសៀមរាប នៅមន្ទីរពេទ្យបង្អែកខេត្ត ។
មានប្រសាសន៍នៅក្នុងឱកាសនោះដែរលោកជំទាវ គួយ ណាលីន ឃឹម ប៊ុនសុង ក៏បានធ្វើការកោតសរសើរ ចំពោះ ក្រុមវេជ្ជបណ្ឌិត គ្រូពេទ្យ នៃមន្ទីរពេទ្យបង្អែកខេត្ត ដែលបានយកចិត្តទុកដាក់ខ្ពស់ដល់អ្នកជម្ងឺ សំខាន់លើសេវាបម្រើព្យាបាលអ្នកជម្ងឺ ដែលបានចូលមកសម្រាក់ព្យាបាលជម្ងឺនៅក្នុងមន្ទីរពេទ្យ ប្រកបដោយក្រមសីលធម៌ល្អ ។
លោកជំទាវ គួយ ណាលីន បានបន្តថា ក្រោយពេលការចុះសួរសុខទុក្ខ និង ផ្តល់អំណោយដល់បងប្អូនអ្នកជម្ងឺ កំពុងតែ សម្រាក់ព្យាបាលនៅក្នុងមន្ទីរពេទ្យនាពេលកន្លងមកនោះ លោកជំទាវបានសង្កេតមើលឃើញនូវកង្វះអគារទីកន្លែង អ្នកជម្ងឺសម្រាក់ព្យាបាល ដោយមានបងប្អូនអ្នកជម្ងឺដែលមកពីបណ្តាខេត្តនានា ចូលមកសម្រាក់ព្យាបាលជម្ងឺ ។ ដោយសង្កេតឃើញពីបញ្ហានេះទើបលោកជំទាវ ក៏បានខិតខំស្វែងរកបងប្អូនសប្បុរសជនទាំងក្នុង និង ក្រៅស្រុក ជាតិ អន្តរជាតិ ក្នុងការកៀងគរប្រមូលថវិកា ដើម្បីយកមកឧបត្ថម្ភគាំទ្រក្នុងការសាងសង់អគារផ្នែក ជម្ងឺទូទៅ នៅក្នុងមន្ទីរពេទ្យបង្អែកខេត្ត ជាការជួយសម្រួលដល់បងប្អូនអ្នកជម្ងឺចូលមកទទួលសេវាព្យាបាល បាន ស្នាក់នៅសមរម្យជាមន្ទីរពេទ្យ ។
លោកជំទាវបន្តទៀតថា ដោយមើលឃើញពីការលំបាកនេះទើបលោកជំទាវ សៀង ចាន់ហេង បានបរិចាក នូវថវិកា ចំនួន២៦ពាន់ដុល្លា រួមទាំងសប្បុរសជនក្នុងខេត្ត ចំនួន៨៧៣ដុល្លា បានយកមកប្រគល់ជូននាពេលនេះ សរុប ២៦ពាន់៨៧៣ដុល្លា ដើម្បីបន្តការសាងសង់បង្ហើយអគារព្យាបាលជម្ងឺទូទៅ ក្នុងការបម្រើនូវតម្រូវការរបស់ គ្រូពេទ្យ និង បងប្អូនអ្នកជម្ងឺ ។
មានប្រសាសន៍នោះដែរលោកវេជ្ធបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត ក៏បានថ្លែងនូវអំណរគុណនូវទឹកចិត្តដ៏សប្បុរស របស់លោកជំទាវ គួយ ណាលីន ឃឹម ប៊ុនសុង និង លោកជំទាវ សៀង ចាន់ហេង រួមទាំងសប្បុរស ជនក្នុងខេត្ត ដែលបានបរិចាកនូវថវិកា ក្នុងការចូលរួមសាងសង់អគារសម្រាប់ផ្នែកជម្ងឺទូទៅ នៅក្នុងមន្ទីរពេទ្យបង្អែកខេត្តសៀមរាប ។
លោកវេជ្ជបណ្ឌិតក៏បានឲ្យដឹងផងដែរថា អគារដែលធ្វើការសាងសង់នេះ បាន ដំណើរការសាងសង់បាន៩៥%ហើយ ព្រមទាំងដាក់គ្រែអ្នកជម្ងឺ បាន៧០គ្រែផងដែរ ។
លោកវេជ្ជបណ្ឌិតបានបន្ត ទៀតថា ក្នុងពេលកន្លងមក លោកជំទាវ ក្នុងនាមអនុប្រធានគណៈកម្មាធិការសាខាកាកបាទក្រហមខេត្ត តែងបាន នាំយកថវិកាឧបត្ថម្ភគាំទ្រដល់មន្ទីរគន្ធបុប្ផា និង មន្ទីរពេទ្យកុមារអង្គរ ព្រមទាំងបានចុះសួរសុខទុក្ខ ផ្តល់អំណោយ ដល់បងប្អូនអ្នកជម្ងឺដែលកំពុងសម្រាកព្យាបាលក្នុងមន្ទីរពេទ្យបង្អែកខេត្តផងដែរ ។
លោកវេជ្ជបណ្ឌិត ក៏បានធ្វើការកោតសរសើរ ពីការខិតខំយកចិត្តទុកដាក់ អស់ពីកម្លាំងការចិត្តរបស់លោកជំទាវ លើវិស័យសុខាភិបាល ក្នុងការកៀងគររកសប្បុរសជន ចូលរួមថវិកា ដើម្បីធ្វើការសាងសង់អគារសម្រាប់ផ្នែកជម្ងឺទូទៅ ប្រកបទៅដោយស្មារតីមនសិការនៃការអភិវឌ្ឍន៍លើវិស័យសុខាភិបាល ក៏ដូចជាការយកចិត្តទុកដាក់ខ្ពស់ ពីសុខភាព អនាម័យ របស់ប្រជាជនកម្ពុជាទៀតផង ៕
