លោក សុខ ដានី អនុប្រធានមន្ទីរអប់រំយុវជន និងកីឡាខេត្តសៀមរាប បានមានប្រសាសន៍ថា ការអប់រំល្អ ជាកូនសោសម្រាប់ដោះស្រាយនូវរាល់បញ្ហាសង្គម និងសេដ្ឋកិច្ចជាក់ស្តែង ក្នុងយុគសម័យ សេដ្ឋកិច្ចពុទ្ធិ និងបច្ចេកវិទ្យាព័ត៌មាន អាស្រ័យលើកត្តាធនធានមនុស្ស មានចំណេះដឹង ចំណេះធ្វើទូលំទូលាយ មានភាពច្នៃប្រឌិត និងមានជំនាញច្បាស់លាស់ ព្រោះការអប់រំឆ្លើយតបទៅនឹងទីផ្សារពលកម្ម និងដំណើរការឆ្លើយតបនិងបរិយាការណ៍ នៃសកលភាវូបនីយកម្ម ស្របនឹងការប្រកួតប្រជែងផ្នែកសេដ្ឋកិច្ច និងបច្ចេកវិទ្យាព័ត៌មាន ដែលកំពុងទទួលបាននូវឧត្តមភាព ប្រកបដោយសក្តានុពល អាចប្រែក្លាយសង្គមជាតិ មានការអភិវឌ្ឍជឿនលឿន។
លោកមានប្រសាសន៍បន្ថែមថា ដើម្បីលើកកម្ពស់វិស័យអប់រំ ពិសេសការជំរុញការកសាងមូលធនមនុស្សប្រកបដោយគុណភាព និងប្រសិទ្ធភាព ការសិក្សារៀនសូត្រ មិនត្រឹមតែអនុវត្តន៍បន្តពេញមួយជីវិតទេ ប៉ុន្តែជាការងារមួយតម្រូវ លើកកម្ពស់និងអភិវឌ្ឍគ្មានទីបញ្ចប់ ដើម្បីផលិតនូវធនធានមនុស្សប្រកបដោយគុណភាព មានសក្តានុពលសម្រាប់ការអភិវឌ្ឍសង្គមជាតិមានការរីកចម្រើនភាពសុខដុម និងចីរភាព ដូច្នេះឪពុក ម្តាយគ្រប់រូបត្រូវបញ្ជូនកូន ចៅរបស់ខ្លួនមកចុះឈ្មោះចូលរៀនឱ្យ បានទាន់ពេលវេលា ដើម្បីអនាគតដ៏ត្រចេះត្រចង់នៅពេលអនាគត ព្រោះក្មួយៗជាសិស្សានុសិស្ស ជាទំពាំងស្នងឫស្សីសម្រាប់ការកសាងអភិវឌ្ឍន៍ប្រទេសជាតិ ឱ្យមានការរីកចម្រើនបាន អាស្រ័យដោយប្រទេស មានធនធានមនុស្ស ប្រកបដោយគុណភាព និងសមត្ថភាពគ្រប់គ្រាន់ ចូលរួមអភិវឌ្ឍប្រទេសជាតិ មានការរីកចម្រើន។
លោក សុខ ដានី មានប្រសាសន៍យ៉ាងដូច្នេះ ក្នុងពិធីបើកបវេសនកាលឆ្នាំសិក្សា២០១៨-២០១៩ និងប្រគល់សញ្ញាបត្រ ចែកជូនលិខិតសរសើរ និង រង្វាន់លើកទឹកចិត្តដល់សិស្សឆ្នើមប្រចាំឆ្នាំសិក្សា ២០១៧-២០១៨ ដែលរៀបចំឡើងដោយ នៅក្នុងដែលសាលាអន្តរជាតិ ស្មាតប្រាយ នាព្រឹកថ្ងៃទី១០ ខែកញ្ញា ឆ្នាំ២០១៨ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
