នៅព្រឹកថ្ងៃទី០២ ខែសីហា ឆ្នាំ២០១៩នេះ មន្ទីរពេទ្យបង្អែកខេត្តសៀមរាប បានធ្វើសន្និសីទគិលានុបដ្ឋាក និងឆ្មបលើកទី១ឆ្នាំ២០១៩ ក្រោមប្រធានបទការធ្វើឲ្យប្រសើរឡើង នូវគុណភាពថែទាំ និងសុវត្ថិភាព។
លោក ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាប បានឲ្យដឹងថា ក្នុងរយៈពេល១០ឆ្នាំចុងក្រោយនេះ មន្ទីរពេទ្យបង្អែកខេត្តសៀមរាប មានការអភិវឌ្ឍន៍គួរឱ្យកត់សំគាល់ ទាំងហេដ្ឋារចនាសម្ព័ន្ធ អនាម័យ និងបរិស្ថាន ធនធានមនុស្ស លទ្ធភាពនិងសមត្ថភាពក្នុងការផ្តល់សេវាសុខាភិបាល និងការងារគ្រប់គ្រងមន្ទីរពេទ្យផងដែរ ដែលជាហេតុធ្វើឱ្យមានកំណើនយ៉ាងខ្លាំងនូវចំនួននិងអត្រានៃការប្រើប្រាស់សេវានៅមន្ទីរពេទ្យមួយនេះ។
លោក ប៉ែន ផលគុណ បន្តទៀតថា ទោះជាយ៉ាងនេះក្តីយើងក៍នៅមានការខ្វះខាតមួយចំនួនតូច ដែលចាំបាច់ឱ្យមានការជួបជុំពិភាក្សាគ្នាឱ្យបានច្រើនដង ដើម្បីធ្វើឱ្យការផ្តល់សេវានៅក្នុងមន្ទីរពេទ្យបង្អែកខេត្តសៀមរាបកាន់តែល្អប្រសើរ។ ជាក់ស្តែង នៅថ្ងៃនេះ មន្ទីរពេទ្យបង្អែកខេត្តសៀមរាបបានធ្វើសន្និសីទគិលានុបដ្ឋាក និងឆ្មបលើកទី១ឆ្នាំ២០១៩ ដើម្បីចែក រំលែកបទពិសោធន៍ផ្នែកថែទាំវេជ្ជសាស្ត្រ ដែលមានអ្នកជំនាញថ្នាក់ជាតិជាច្រើនមកធ្វើបទបង្ហាញ។
នៅក្នុងអង្គសន្និសីទនេះ ឯកឧត្តមសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល បានមានប្រសាសន៍ថា ការធ្វើឲ្យប្រសើរឡើងនូវគុណភាពថែទាំនិងសុវត្ថិភាពដល់អ្នកជំងឺគ្រូពេទ្យគ្រប់ រូបចាំបាច់ត្រូវមានសមត្ថភាពជំនាញ វិជ្ជាជីវៈ ឱ្យបានគ្រប់គ្រាន់និងត្រូវមានការជួបប្រជុំគ្នាឱ្យបានច្រើនដង ដើម្បីបង្កើនចំណេះដឹងដល់គិលានុបដ្ឋាក – ឆ្មប ចែករំលែកបទពិសោធន៍ លើការងារថែទាំដល់ គិលានុបដ្ឋាកនិងឆ្មប បង្កើនទំនាក់ទំនងរវាងគិលានុបដ្ឋាកនិង ឆ្មបនៅក្នុងតំបន់។ ឯកឧត្តមអំពាវនាវឱ្យគ្រប់មន្ទីរពេទ្យទាំងអស់នៅកម្ពុជាជួបប្រជុំគ្នាឱ្យបានច្រើនដង ដើម្បីចែករំលែកបទពិសោធន៍លើការងារថែទាំដល់គិលានុបដ្ឋាកនិងឆ្មប ខណៈកន្លងមកនេះ ការរៀបចំឱ្យមានសន្និសីទគិលានុបដ្ឋាក និងឆ្មបបែបនេះ គឺមិនសូវបានរៀបចំនោះទេ។
ឯកឧត្តមបញ្ជាក់ថា សន្និសីទថែទាំវេជ្ជសាស្ត្រនេះ នឹងនាំមកនូវការផ្លាស់ប្តូរ និងចែករំលែកបទពិសោធន៍ការរៀនសូត្រពីគ្នាទៅវិញទៅមក រវាងក្រុមអ្នកជំនាញខាងផ្នែកថែទាំវេជ្ជសាស្ត្រ និងក្រុមការងារខាងផ្នែកថែទាំគ្រប់រូបក្នុងការក្រេបយកចំណេះដឹងបន្ថែម ដើម្បីពង្រឹងសមត្ថភាពរបស់ខ្លួនទៅ ក្នុងការអភិវឌ្ឍន៍គុណភាព នៃការថែទាំឱ្យកាន់តែប្រសើរឡើង ៕
អត្ថបទ និង រូបភាព ៖ទ្រា ពន្លឺ
កែសម្រួល៖ អ៊ុន ណារាជ្យ
