នាព្រឹកថ្ងៃទី ០២ ខែ សីហា ឆ្នាំ២០១៩នេះ សម្តេចចៅហ្វាវាំងវរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្ត្រី រដ្ឋ មន្ត្រីព្រះបរមរាជវាំង និង ឯកឧត្តម ប៉ុល លឹម ប្រធានក្រុមសមាជិកព្រឹទ្ធ សភា ប្រចាំភូមិភាគទី៤ រួមទាំងឯកឧត្តម លោកជំទាវ ជា សមាជិកព្រឹទ្ធសភា និង រដ្ឋសភា ប្រធាន និង សមាជិកក្រុមប្រឹក្សាខេត្ត គណៈអភិបាលខេត្ត អាជ្ញាធរស្រុក ឃុំ បានអញ្ជើញចូលរួម ក្នុងពិធីបុណ្យខួបគម្រប់៧ថ្ងៃ និង បញ្ចុះធាតុ របស់លោកជំទាវ ស៊ឹង ស៊ីយុត សមាជិកព្រឹទ្ធសភា ជាលេខាធិការគណៈកម្មការ អប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និង ទេសចរណ៍ និងជាអនុប្រធានក្រុមការងារថ្នាក់កណ្តាល ចុះជួយខេត្តសៀមរាប ។
នៅក្នុងឱកាសដ៏ក្រៀមក្រំនេះ សម្តេចចៅហ្វាវាំងវរវៀងជ័យ អធិបតីស្រឹង្គារ គង់ សំអុល បានធ្វើការចូលរួមសម្តែង និង ចូលរួមរំលែកទុក្ខក្រៀមក្រំក្នុងចិត្ត ដោយឥតឧបមា ក្នុងការបាត់បង់លោកជំទាវ ស៊ឹង ស៊ីយុត ដែលត្រូវជាបង ជាម្តាយ ជាអ៊ុ ដ៏ឧត្តុង្គឧត្តមនៃគ្រួសារដែប្រកបដោយ ព្រហ្មវិហារធម៌ និង ជាទីស្រឡាញ់របស់គ្រួសារនៃសព ក៏ដូចជាការបាត់បង់នូវឥស្សរជនស្នេហាជាតិដ៏ឆ្នើម នៃកុលធីតាខ្មែរមួយរូប ដែលមានស្នាដៃក្នុងការបម្រើជាតិមាតុភូមិកម្ពុជា និង បានរួមចំណែកយ៉ាងសកម្មជាមួយរាជរដ្ឋាភិបាលកម្ពុជា ក្នុងទិសដៅបម្រើឧត្តមប្រយោជន៍ជូនជាតិមាតុភូមិ ព្រមទាំងបានលះបង់កម្លាំងកាយចិត្ត ពេលវេលានៅគ្រប់កាលៈទេសៈ ក្នុងការអភិវឌ្ឍន៍ប្រទេសជាតិមាតុភូមិ ។
សម្តេចចៅហ្វាវាំងវរវៀងជ័យ អធិបតីស្រឹង្គារបានបញ្ជាក់ថា ទោះបីនៅពេលនេះរូបកាយវិញ្ញាណរបស់លោកជំទាវ បានរលត់ចាកឆ្ងាយពីលោកនេះ ទៅកាន់ទីភពថ្មីដ៏សែនឆ្ងាយ ដែលគ្មានថៃ្ងវិលត្រឡប់មកវិញជារៀងរហូត ។ ក៏ប៉ុន្តែចំពោះកិត្តិសព្ទ័ កេរ្តិ៍ឈ្មោះរបស់លោកជំទាវ ក៏បានដកជាប់នូវក្នុងក្រអៅបេះដូងរបស់កូនចៅ ថ្នាក់ដឹកនាំ ញាតិមិត្តរួមការងារ ដែលធ្វើឲ្យគ្មានថ្ងៃបំភ្លេចបានឡើយ ។ សម្តេចចៅហ្វាវាំងវរវៀងជ័យអធិបតីស្រឹង្គារ គង់ សំអុល ក៏បានធ្វើការបួងសួង សូមឲ្យដួងវិញ្ញាណក្ខ័ន្តរបស់លោកជំទាវ ស៊ឹង ស៊ីយុត បានទៅកាន់សុខគតិភពថ្មីកុំបីឃ្លាងឃ្លាតឡើយ ។
ក្នុងឱកាសនោះដែរគណៈប្រតិភូខេត្តសៀមរាប ដឹកនាំដោយឯកឧត្តម អ៊ឹង ហឿន ប្រធានក្រុមប្រឹក្សាខេត្ត តំណាងឲ្យសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងារថ្នាក់កណ្តាលចុះជួយខេត្តសៀមរាប បាននាំយកនូវសាររំលែកទុក្ខ របស់យសម្តេចពិជ័យសេនា ទៀ បាញ់ ជូនដល់ក្រុមគ្រួសារនៃសព រួមនឹងបច្ច័យចំនួន ២លានរៀលផង ដែរ ។
បន្ទាប់ពីលោកតាអាចារ្យ ធ្វើកិច្ចទៅតាមកម្មវិធីនៃប្រពៃណីព្រះពុទ្ធសាសនារួចមក ក៏មានការនិមន្តព្រះសង្ឃ ចំនួន៧១អង្គ ដើម្បីធ្វើពិធីរាប់បាត្រឆ្លង ក្នុងកិច្ចបង្ហើយបុណ្យ ។ ម្យ៉ាងទៀតពិធីរាប់ប្រាត្រនេះ ក៏ជាការឧទ្ទិសមហាកុសលផលបុណ្យ ជូនទៅដល់ដូងវិញ្ញាណក្ខ័ន្ត និង សូមឲ្យអំណាចនៃអានិសង្ឃនេះជួយទ្រទ្រង់ឲ្យវិញ្ញាណក្ខ័ន្ត លោកជំទាវ ស៊ឹង ស៊ីយុត បានទៅកាន់ទីសោយសុខឋានបរមសុខកុំបីឃ្លៀងឃ្លាត ក្នុងឋានសុគតិភពកុំបីខានឡើយ ហើយសូមងាកក្រោយមកជួយបីបាច់ថែរក្សា កូនចៅឲ្យមានសេចក្តីសុខសប្បាយក្នុងក្រុមគ្រួសារ និង សង្គមជាតិផងដែរ ។
សូមបញ្ជាក់ថា លោកជំទាវ ស៊ឹង ស៊ីយុត បានទទួលមរណភាព កាលពីនាវេលាម៉ោង១០.០០នាទី ថ្ងៃទី២៧ ខែកក្កដា ឆ្នាំ២០១៩ ក្នុងជន្មាយុ ៧១ឆ្នាំ ដោយ រោគាពាធ នឹងបានប្រារព្វពិធីបុណ្យទៅតាមប្រពៃណី នៅក្នុងទីវត្ត ខ្នាត ឃុំខ្នាត ស្រុកពួក ខេត្តសៀមរាប ៕
អត្ថបត និង រូបភាព ៖ម៉ី សុខារិទ្ធ ,ខេង ឧត្តម , ជា ស្រស់
កែសម្រួល ៖ អ៊ុន ណារាជ្យ
