គ្រាប់បែក ជាច្រើនបានផ្ទុះឡើង នៅទីក្រុងបាងកក កាលពីព្រឹកថ្ងៃសុក្រ បណ្តាលឲ្យមនុស្ស ៣ នាក់រងរបួស ខណៈទីក្រុងនេះ ធ្វើជាម្ចាស់ផ្ទះ នៃកិច្ចប្រជុំកំពូលប្រចាំតំបន់ ដោយមានការចូលរួមពីលោក Mike Pompeo រដ្ឋមន្ត្រីក្រសួងការបរទេស សហរដ្ឋអាមេរិកផងដែរ។
យោងតាមសារព័ត៌មានថៃ បាងកកប៉ុស្តិ៍ ចេញផ្សាយនៅថ្ងៃទី២ ខែសីហា ឆ្នាំ២០១៩នេះថា មន្ត្រីប៉ូលីសជាន់ខ្ពស់បានប្រាប់រ៉យទ័រថា គ្រាប់បែកសរុបចំនួន ៦ គ្រាប់ត្រូវបានបំផ្ទុះនៅទីតាំងចំនួន ៣ និងគ្រឿងផ្ទុះមួយត្រូវបាន រកឃើញមុនពេលវាផ្ទុះឡើង។
លោកវរសេនីយ៍ Kamtorn Uicharoen បាននិយាយថា គ្រាប់បែកចំនួន ៣ គ្រាប់បានផ្ទុះឡើងនៅអគាររដ្ឋាភិបាល Chaeng Wattana ហើយគ្រាប់បែកមួយគ្រាប់ទៀត មិនផ្ទុះឡើយ។ ចំណែកគ្រាប់បែក ២គ្រាប់ទៀត បានផ្ទុះនៅតំបន់ Chong Nonsi។
លោកថា “ គ្រាប់បែកនៅក្នុងតំបន់ទាំងពីរនេះគឺជាគ្រឿងផ្ទុះដែលត្រូវបានកែសំរួលដែលបង្កឡើងដោយកម្មវិធីកំណត់ពេលវេលា” ។ លោកបាននិយាយថា គ្រាប់បែក ភីងប៉ុង បានផ្ទុះឡើងនៅតំបន់សួនលួង។
អ្នកនាំពាក្យរដ្ឋាភិបាលលោកស្រី Narumon Pinyosinwat បាននិយាយថា នាយករដ្ឋមន្ត្រីប្រាយុទ្ធ ចាន់ អូចា បានគេប្រាប់អំពី “ឧប្បត្តិហេតុនៃការបំផ្ទុះគ្រាប់បែក និងបានបញ្ជាឱ្យធ្វើការស៊ើបអង្កេតជាបន្ទាន់” ៕
ប្រភព៖ដើមអំពិល
ប្រែសម្រួលៈ ណៃ តុលា
