ប្រភេទពូជស្រូវ សែនក្រអូប ចំនួន២៩តោន ត្រូវបានយកមកចែកជូនប្រជាកសិករក្នុង ស្រុកពួក និង ស្រុកក្រឡាញ់ ខេត្តសៀមរាប ដែលមានផ្ទៃដីស្រែ រងប៉ះពាល់ដោយគ្រោះរាំងស្ងួត ទំហំ ២៩០ហិចតា ដោយសង្ឃឹមថា នឹងអាចស្តារឡើងវិញបាននោះ។
តាមរយៈរបាយការណ៍ លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់និងនេសាទខេត្តសៀមរាប បានបង្ហាញកាលពីព្រឹកថ្ងៃទី០៤ ខែកក្កដានេះ នៅវត្តព្រៃជ្រូក ឃុំព្រៃជ្រូក ស្រុកពួក នៃខេត្តសៀមរាបថា ៖ ស្រុកចំនួន៣ ក្នុងចំណោមក្រុង-ស្រុកចំនួន ៥ របស់ខេត្តសៀមរាប មានភូមិសាស្ត្រនៅជាប់តំបន់បឹងទន្លេសាប ដូចជាស្រុកសូទ្រនិគម ស្រុកពួក និង ក្រឡាញ់ រួមមានចំនួន១២ឃុំ ស្មើនឹង៥៧ភូមិ មានប្រជាកសិករទទួលរងផលប៉ះពាល់ដោយគ្រោះរាំងស្ងួតចំនួន ៦២០គ្រួសារ។ ក្នុងនោះ កសិករមកពីស្រុកពួក និងស្រុកក្រឡាញ់ បានជួបប្រទះគ្រោះរាំងស្ងួតមានទំហំច្រើនជាងគេ ចំនួន ៥៤០គ្រួសារ។
ឯកឧត្តម ទៀ សីហា អភិបាលខេត្តសៀមរាបបានឲ្យដឹងថា ដោយមានការយកចិត្តទុកដាក់ពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ បានផ្តល់ស្រូវពូជចំនួន ២៩តោន សម្រាប់ខេត្តសៀមរាប តាមរយៈក្រសួងកសិកម្ម រុក្ខាប្រមាញ់និងនេសាទ ដែលក្នុងនេះមានស្រុកចំនួន ២ ដែលត្រូវបានទទួល គឺស្រុកពួក និងស្រុកក្រឡាញ់ ដែលមានលទ្ធភាពស្តារឡើងវិញលើផ្ទៃដីសរុបចំនួន ២៩០ហិកតា ។ ក្នុងនោះ ស្រុកពួកដែលរងការខូចខាតលើផ្ទៃដីចំនួន ២០០ហិកតា ទទួលបានពូជស្រូវសម្រាប់ស្តារឡើងវិញចំនួន ២០ តោន និងស្រុកក្រឡាញ់ បានរងការខូចខាតលើផ្ទៃដីចំនួន ៩០ ហិកតា ទទួលបានពូជស្រូវសម្រាប់ស្តារឡើងវិញចំនួន ៩តោន ។
ឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបញ្ចាក់ថា ស្រូវពូជចែកជូននាពេលនេះ ជាប្រភេទពូជស្រូវ សែនក្រអូប អាចដាំដុះបានដោយមិនប្រកាន់រដូវ មានអាយុកាលនៃការដាំដុះនិងទទួលផលក្នុងអំឡុងពី ១១០ថ្ងៃ ទៅ ១១៥ថ្ងៃ ។ ពូជស្រូវទាំងនេះ ត្រូវបានចាត់ចែងផលិតដោយកសិដ្ឋានទួលសំរោង មានគុណភាពបន្សុទ្ធពូជជាប់ពី៩៥ភាគរយ និង ធានាគ្រាប់ស្រូវដុះចាប់ពី៨០ភាគរយឡើងទៅ។
ប្រសាសន៍របស់ឯកឧត្តម ណៅ ធួក បានបង្ហាញនូវបទពិសោធន៍ល្អៗមួយចំនួន ដែលអាចចាត់ទុកបានថា ជាអនុសាសន៍នៃការត្រៀមលក្ខណៈ ដើម្បីដោះស្រាយបញ្ហាប្រឈមចំពោះគ្រោះធម្មជាតិ ដែលជាពិសេសនោះគឺគ្រោះរាំងស្ងួត ។ ការជីកស្រះទឹកនៅកណ្តាលដីស្រែ វាពិតជាមានអត្ថប្រយោជន៍ជាច្រើន ដែលមិនត្រឹមតែបានជួយអូសបន្លាយរយៈពេលនៃការរងចាំការសង្គ្រោះប៉ុណ្ណោះទេ តែវាអាចក្លាយជាអាងចិញ្ចឹមត្រីផងដែរ សម្រាប់រដូវវស្សាដែលមានភ្លៀងធ្លាក់គ្រប់គ្រាន់ និងបានផ្តល់ផលនៅក្នុងរដូវចម្រូត ៕
សូមបញ្ជាក់ថា នៅក្នុងរបាយការណ៍ បរិមាណទឹកភ្លៀងដោយបូកយោងចាប់ពីដើមឆ្នាំ២០១៩ រហូតមកដល់ថ្ងៃទី០១ ខែសីហា ឆ្នាំ២០១៩ នៅទូទាំងខេត្តសៀមរាបទទួលបានទឹកភ្លៀងគិតជាមធ្យម មានកម្រិត ៣៥៩ម.ម និងចំនួនថ្ងៃមានភ្លៀងធ្លាក់ ២៥ថ្ងៃគិតជាមធ្យម។ ទន្ទឹមនោះដែរ ដោយខេត្តសៀមរាប មានរបបទឹកភ្លៀងមានកម្រិតទាបជាងឆ្នាំមុន បានបង្កឲ្យប៉ះពាល់ដល់ដំណាំស្រូវ ដោយគ្រោះរាំងស្ងួត សរុបចំនួន ៥,៦១៥ហិកតា (ស្រូវស្រាល២,៩២០ហិកតា ស្រូវកណ្ដាល២,៣៩៥ហិកតា និងស្រូវធ្ងន់៣០០ហិកតា) លើស្រុកចំនួន ៦ស្រុក មាន ក្រឡាញ់ សូទ្រនិគម ស្រីស្នំ អង្គរជុំ វ៉ារិន និងស្រុកពួក រួមមានគ្រួសាររងគ្រោះសរុបចំនួន ៧,៥៣៥គ្រួសារ។ ប៉ុន្តែនៅក្នុងរបាយការណ៍នេះ ពុំបានបង្ហាញពី ទំហំផ្ទៃដីស្រែ ដែលបានខូចខាតទាំងស្រុងនោះឡើយ។
អត្ថបទ និង រូបភាព ៖ លោក ងិន គឹមឡេង និងលោក យូ វង្ស
កែសម្រួល៖ លោក សេង ផល្លី
