កូនភ្លោះ០៣នាក់ (ស្រី១ ប្រុស២) ដែលទើបនឹងសម្រាលកាលថ្ងៃទី០២ ខែកក្កដា ឆ្នាំ២០១៩នេះ មានទីលំនៅ ភូមិជន្លាស់ដៃ ឃុំជន្លាស់ដៃ ស្រុកក្រឡាញ់ ខេត្តសៀមរាប ត្រូវបានទទួលអំណោយដ៏ថ្លៃថ្លាពីសម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន។
កូនភ្លោះទាំង៣នាក់ ត្រូវបានសម្រាលដោយសុវត្ថិភាព (ទាំងម្ដាយ និងទារក)នៅមន្ទីរពេទ្យកុមារគន្ធបុប្ផាជ័យវរ្ម័នទី៧ ខេត្តសៀមរាប និងជាកូនដំបូង ដែលមានឪពុកឈ្មោះ ចាន់ ញ៉ន និងម្តាយឈ្មោះ ឈន់ ផល្លា មានស្រុកកំណើតនៅភូមិជន្លាស់ដៃ ឃុំជន្លាស់ដៃ ស្រុកក្រឡាញ់ ខេត្តសៀមរាប។
ឯកឧត្តម សេង ទៀង ជំនួយការសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ផាក់ថា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន តែងតែយកចិត្តទុកដាក់ខ្ពស់ ដល់ចៅៗទាំងអស់ របស់សម្ដេច តាមរយៈការផ្ដល់សេវាប្រឹក្សាសុខភាពមុននិងក្រោយសម្រាល និងសេវាសម្រាលទារកដោយមិនគិតថ្លៃនៅទូទាំងប្រទេស នៅមណ្ឌលសុខភាព មន្ទីរពេទ្យបង្អែកស្រុក-ក្រុងនានារបស់រដ្ឋ។ ទន្ទឹមនេះ ការនាំយកអំណោយមកផ្តល់ជូនក្រុមគ្រួសារកូនភ្លោះទាំង៣នាពេលនេះ ពុំមានប្រកាន់ពូជសាសន៍ ឬនិន្នាការនយោបាយឡើយ និងទទួលបានអំណោយដូចៗគ្នាទាំងអស់។
ព័ត៌មានជាតិ ថ្មីៗ
សូមជម្រាបថា នេះជាគ្រួសារកូនភ្លោះ៣នាក់ ទី៣៤៦ ហើយ ដែលបានទទួលអំណោយ ពីសម្តេចតេជោ ហ៊ុន សែន និងសម្តេចគិតិព្រឹទ្ធបណ្ឌិត ប៊ុនរ៉ានី ហ៊ុនសែន ដែលអំណោយដែលប្រគល់ជូនដល់លំនៅដ្ឋានក្នុងស្រុកក្រឡាញ់របស់កូនភ្លោះទាំង៣នោះរួមមាន អង្ករ២០០គីឡូក្រាម ទឹកដោះគោ០១កេស ស្ករស០៥គីឡូក្រោម ក្រម៉ា០២ សារ៉ុង០២ និងថវិកា៥លានរៀល៕
អត្ថបទ និង រូបភាព ៖ លោក អ៊ិន សីហរិទ្ធ
កែសម្រួលអត្ថបទ៖ លោក សេង ផល្លី
