ក្រុមគ្រូពេទ្យស្ម័គ្រចិត្ដខេត្តសៀមរាប ចុះពិនិត្យនិងព្យាបាលជំងឺមិនគិតថ្លៃ នៅឃុំចាន់ស

ក្រុមគ្រូពេទ្យស្ម័គ្រចិត្ដ នៃមន្ទីរសុខាភិបាលខេត្តសៀមរាប សហការជាមួយសហភាពសហព័ន្ធយុវជនកម្ពុជា និងមន្ទីរពេទ្យកុមារអង្គរ បានចុះទៅពិនិត្យសុខភាព និងព្យាបាលជំងឺជូនប្រជាពលរដ្ឋ ដោយមិនគិតថ្លៃ នៅឃុំចាន់ស ស្រុកសូទ្រនិគម ខេត្ដសៀមរាប កាលពីថ្ងៃទី៤ខែសីហា ម្សិលមិញនេះ ។

តាមរយៈការចុះជួយពិនិត្យជំងឺទូរទៅជូនប្រជាពលរដ្ឋនៅតាមមូលដ្ឋាន ក្នុងស្រុកសូទ្រនិគមនេះ គឺជាលើកទី៣ ដែលមានទទួលពិនិត្យពិគ្រោះ ព្យាបាលជំងឺទូទៅ រោគស្រី អូសអេកូ ជំងឺភ្នែក បញ្ហាមាត់ធ្មេញ ជំងឺកុមារ ជំងឺសន្លាក់ និងជំងឺជាច្រើនទៀត។

លោក ក្រុស សារ៉ាត់ ប្រធានមន្ទីរសុខាភិបាលខេត្ដសៀមរាប បានបញ្ជាក់ថា ការចុះមកដល់មូលដ្ឋាន របស់ក្រុមគ្រូពេទ្យស្ម័គ្រចិត្ដនាពេលនេះ គឺបានផ្តល់នូវសេវាសុខាភិបាលមួយចំនួន ដែលនៅមណ្ឌលសុខភាពនៅតាមមូលដ្ឋានមួយចំនួនមិនទាន់មាន។ ជាមួយនោះ វាក៏ជាឱកាស ដល់ក្រុមគ្រូពេទ្យ បានអប់រំអំពីការថែរក្សាសុខភាព ដល់ប្រជាពលរដ្ឋទាំងអស់ដែលមានចំនួនរាប់ពាន់នាក់ ឱ្យចេះថែទាំសុខភាពសុខភាពប្រចាំថ្ងៃ និងត្រូវប្រុងប្រយ័ត្នចំពោះ ការហូបចំណីអាហារ ដោយផ្តោតសំខាន់លើការហូបស្អាត រស់នៅស្អាត ដើម្បីជៀសវាងការមានជំងឺផ្សេងៗ។

ឆ្លៀតក្នុងឱកាសនោះ លោក ក្រុស សារ៉ាត់ ក្រើនរំលឹកដល់ប្រជាពលរដ្ឋឱ្យមានការប្រុងប្រយ័ត្នពីការកើតជំងឺគ្រុនឈាមផងដែរ ចំពោះអ្នកជំងឺ ដែលមានមកំដៅចាប់ពី៣៨អង្សាក្នុងរយៈពេលពីរទៅបីថ្ងៃ ត្រូវប្រញាប់យកទៅមន្ទីរពេទ្យ ដើម្បពិនិត្យនិងព្យាបាល។

លោកស្រី យូ សុភា អភិបាលរងខេត្តសៀមរាប បានថ្លែងដែរថា សកម្មភាពដែលក្រុមគ្រូពេទ្យស្ម័គ្រចិត្តចុះមកពិនិត្យ និងព្យាបាលជំងឺជូនប្រជាពលរដ្ឋទូទៅ ក្នុងខេត្តសៀមរាបនេះ គឺជាការផ្សព្វផ្សាយ និងជួយលើកកម្ពស់សុខុមាលភាពជូនប្រជាពលរដ្ឋនៅតាមមូលដ្ឋាន និងជៀសវាងពីជំងឺដង្កាត់ផ្សេងៗ ពិសេសជួយកាត់បន្ថយការចំណាយទៅលើសេវាព្យាបាល។ ទន្ទឹមនេះ ការផ្ដល់សេវាសុខភាពដល់មូលដ្ឋានដោយក្រុមគ្រូពេទ្យស្ម័គ្រចិត្ដនេះ ក៏ជាការយកចិត្ដទុកដាក់ពីសុខភាពប្រជាពលរដ្ឋ ពីសំណាក់រាជរដ្ឋាភិបាលកម្ពុជា ដែលមានសម្ដេចហ៊ុនសែន ជានាយករដ្ឋមន្ដ្រីផងដែរ។

លោកស្រី យូ សុភា ក៏បានផ្ដាំផ្ញើ ឱ្យប្រជាពលរដ្ឋយកចិត្តទុកលើសុខភាពប្រចាំថ្ងៃ ក្រៅពីក្រុមគ្រូពេទ្យស្ម័គ្រចិត្ដចុះព្យាបាលនិងពិនិត្យដោយផ្ទាល់នាពេលនេះ ក៏មានមណ្ឌលសុខភាព និងស្រុកប្រតិបត្ដិ ដែលអាចផ្ដល់សេវាប្រកបដោយប្រសិទ្ធភាព និងចំណាយតិចនៅក្បែផ្ទះប្រជាពលរដ្ឋក្នុងមូលដ្ឋានផងដែរ៕