មន្ទីរកិច្ចការនារីខេត្តសៀមរាប បើកវេទិកាផ្សព្វផ្សាយ អនុសញ្ញាស្ដីពី ការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ នៅស្រុកក្រឡាញ់

នៅព្រឹកថ្ងៃទី០៥ ខែសីហា ឆ្នាំ២០១៩នេះ មន្ទីរកិច្ចការនារីខេត្តសៀមរាប សហការជាមួយរដ្ឋបាលស្រុកក្រឡាញ់ បានរៀបចំធ្វើវេទិកាផ្សព្វផ្សាយ អនុសញ្ញាស្ដីពី ការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ ជូនដល់អាជ្ញាធរ និងប្រជាពលរដ្ឋនៅក្នុងឃុំតាអាន នៅក្នុងបរិវេណសាលាឃុំតាអាន ក្នុងគោលបំណង បង្កើនការយល់ដឹងអំពីអនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ(ស៊ី-ដ) ដើម្បីផ្តល់ការធានានូវការទទួលបានសិទ្ធិមនុស្ស និងសេរីភាពជាមូលដ្ឋាន ដោយស្មើភាពគ្នាជាមួយបុរស ក្រោមការសម្របសម្រួលរបស់លោកស្រី ងិន សារិន អនុប្រធានមន្ទីរកិច្ចការនារីខេត្តសៀមរាប , លោក ស្គន់ សាគិន មេឃុំតាអាន និង លោក សោម បូរ៉ី នាយរងប៉ុស្តិ៍នគរបាលរដ្ឋបាលឃុំតាអាន ដោយមានការចូលរួមពីសំណាក់លោក លោកស្រី ជាមន្ត្រីច្ចការនារីស្រុកក្រឡាញ់ , ក្រុមប្រឹក្សាឃុំ អ្នកទទួលបន្ទុកកិច្ចការនារី និងកុមារឃុំ , ជំនួយការឃុំ , មេភូមិ អនុភូមិ ប្រជាការពារភូមិ និងប្រជាពលរដ្ឋមកពីគ្រប់ភូមិនៅក្នុងឃុំតាអាន សរុប១០១ នាក់ ក្នុងនោះស្រីចំនួន៧០ នាក់ ។

លោកស្រី ងិន សារិន អនុប្រធានមន្ទីរកិច្ចការនារីខេត្ត មានប្រសាសន៍ថា អំពីអនុសញ្ញាស៊ី-ដ ជាសន្ធិសញ្ញាអន្តរជាតិដំបូងតែមួយគត់ ដែលបានបញ្ជាក់យ៉ាងទូលំទូលាយអំពីសិទ្ធិរបស់ស្ត្រី ដែលត្រូវតែមានក្នុងបរិបទស៊ីវិល នយោបាយ ជីវិតសេដ្ឋកិច្ច សង្គមកិច្ច វប្បធម៌ និងជីវិតគ្រួសារ ជាពិសេសអនុសញ្ញាស៊ី-ដនេះ បានធ្វើឱ្យស្ត្រីទទួលបានសិទ្ធិពិតប្រាកដ រួចផុតពីការរើសអើង ការរំលោភលើគោលការណ៍សមភាពនៃសិទ្ធិមនុស្ស និងការគោរពសេចក្ដីថ្លៃថ្នូររបស់មនុស្ស ហើយអនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ(ស៊ី-ដ)នេះ មានគោលការណ៍គ្រឹះចំនួន ៣ គឺ ៖ ១. ការទទួលបានសមភាពពិតប្រាកដ , ២. ការមិនរើសអើង និង ៣. កាតព្វកិច្ចរបស់រដ្ឋភាគីក្នុងការធានាឱ្យស្ត្រីទទួលបានសិទ្ធិពេញលេញ ។

សូមបញ្ជាក់ថា អនុសញ្ញាស៊ី-ដនេះ បានអនុម័ត និងបើកឱ្យចុះហត្ថលេខា ឱ្យសច្ចាប័ន និង ឱ្យចូលជាសមាជិកតាមសេចក្ដីសម្រេចចិត្តលេខ ៣៤១១៨០ ចុះថ្ងៃទី១៨ ខែធ្នូ ឆ្នាំ១៩៧៩ របស់មហា សន្និ បាត អង្គការសហប្រជាជាតិ និងបានចូលជាធរមាននៅថ្ងៃទី៣ ខែកញ្ញា ឆ្នាំ១៩៨១ ខណៈបច្ចុប្បន្ន អនុសញ្ញាស៊ី-ដនេះ មានរដ្ឋភាគីចំនួន១៨៥ ដែលបានចុះហត្ថលេខា និងផ្ដល់សច្ចាប័នយកទៅអនុវត្ត នៅក្នុងនោះប្រទេសកម្ពុជា បានចុះហត្ថលេខានៅថ្ងៃទី២២ ខែកញ្ញា ឆ្នាំ១៩៩២ ហើយផ្ដល់សច្ចាប័ននៅថ្ងៃទី១៥ ខែតុលា ឆ្នាំ១៩៩២ យកមកអនុវត្តដោយឥតលក្ខខណ្ឌ ៕