កាលពីថ្ងៃទី០៤ ខែសីហា ឆ្នាំ២០១៩ ក្រុមហ៊ុនកោះថ្មី តិចណូឡូជី ដែលជាក្រុមហ៊ុនមេរបស់សារព័ត៌មានត្នោតញូស៍ បាននាំយកអំណោយជាគ្រឿងបរិភោគ ដែលសរុបជាទឹកប្រាក់ជិត១ម៉ឺនដុល្លារសហរដ្ឋអាមេរិក ចែកជូនដល់យោធិនពិការ២៧០គ្រួសារ ដែលកំពុងរស់នៅក្នុងមជ្ឈមណ្ឌលអភិវឌ្ឍន៍យោធិនពិការសម្តេចតេជោ ហ៊ុន សែន គូលែន ៣១៧ សៀមរាប ស្ថិតនៅក្នុងឃុំបល្ល័ង្គ ស្រុកប្រាសាទបាគង ដែលក្នុងមួយគ្រួសារទទួលបានអង្ករ៥០គីឡូក្រាម , ទឹកត្រី១យួរ , ទឹកស៊ីអ៊ីវ១យួរ និងប្រេងឆា១ដប ហើយនៅក្នុងឱកាសនោះ លោក ឈ ហុកឌី ដែលជាម្ចាស់ផលិតផលខោទឹកនោមកូនបីនាក់ ក៏បានផ្តល់ជូនបងប្អូនយោធិនពិការនូវធូបមូសចំនួន៤៥កេស សរុបជាទឹកប្រាក់ជាង១ពាន់ដុល្លារសហរដ្ឋអាមេរិក ។
ពិធីនេះ បានប្រព្រឹត្តទៅក្រោមអធិបតីភាពលោកឧត្តមសេនីយ៍ទោ មាស វន្នី នាយករងមជ្ឈមណ្ឌលអភិវឌ្ឍន៍យោធិនពិការសម្តេចតេជោ ហ៊ុន សែន គូលែន ៣១៧ សៀមរាប និងលោក លាវ កៃ នាយកគ្រប់គ្រងក្រុមហ៊ុនកោះថ្មី ។
មានប្រសាសន៍ក្នុងឱកាសនោះ លោក ជា គឹមសាន តំណាងក្រុមហ៊ុនកោះថ្មី និងជានិពន្ធនាយកសារព័ត៌មានត្នោតញូស៍( Tnaot News) បានសម្ដែងនូវកោតសរសើរយ៉ាងក្រែលែង ដល់វីរភាពរបស់បងប្អូនកងទ័ព ដែលមានចិត្តក្លាហានមុះមុត ហ៊ានពលីសាច់ស្រស់ ឈាមស្រស់ ក្នុងការការពារទឹកដី រហូតសម្រេចបាននូវសុខសន្តិភាពជូនប្រទេសជាតិ។
លោកឧត្តមសេនីយទោ ហ៊ុន ប៉ូគា នាយករងមជ្ឈមណ្ឌលអភិវឌ្ឍន៍យោធិនពិការសម្តេចតេជោ ហ៊ុន សែន គូលែន ៣១៧ សៀមរាប បានឲ្យដឹងថា ចាប់តាំងពីថ្ងៃទី០៩ ខែកក្កដា ឆ្នាំ២០១០ រហូតមកដល់ថ្ងៃទី០៤ ខែសីហា ឆ្នាំ២០១៩នេះ គឺមានរយៈពេល០៩ឆ្នាំ ២៦ថ្ងៃ មកហើយ ដែលបងប្អូនយោធិនពិការ បានចូលមករស់នៅក្នុងមជ្ឈមណ្ឌល មានចំនួន ២៧០គ្រួសារ ក្នុងនោះមានយោធិនពិការចំនួន ២៤៥គ្រួសារ , លោកគ្រូ អ្នកគ្រូ បង្រៀនស្ម័គ្រចិត្តចំនួន ២៣គ្រួសារ , ពេទ្យឆ្មបស្ម័គ្រចិត្តចំនួន ០២គ្រសារ , សមាជិកសរុបរួមមានចំនួន ១.២៧០នាក់ ក្នុងនោះស្រីចំនួន៦១៤នាក់។
លោក ហ៊ុន ប៉ូគា មានប្រសាសន៍ទៀតថា បងប្អូនយោធិនពិការ លោកគ្រូ អ្នកគ្រូបង្រៀន និងពេទ្យឆ្មបស្ម័គ្រចិត្តទាំងអស់ ក្នុងរយ:ពេលកន្លងមក ត្រូវបានទទួលនូវរបបគោលនយោបាយដូចៗគ្នាពីប្រមុខរាជរដ្ឋភិបាលកម្ពុជា គឺ ក្នុងមួយគ្រួសារៗ ទទួលបានដីទំហំ០១ហិកតាកន្លះ សម្រាប់ការងារបង្កបង្កើនផល និងលំនៅដ្ឋានចំនួន ០១ខ្នង មានទំហំ៥ម៉ែត្រគុណនឹង៧ម៉ែត្រ សម្រាប់ស្នាក់នៅ ពិសេសដោយបានការយកចិត្តទុកដាក់ឧបត្ថម្ភជាបន្តបន្ទាប់ ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ធ្វើឲ្យបងប្អូនយោធិនពិការ និងគ្រួសារ មានលំនឹងលើផ្នែក ជីវភាពរស់នៅបានល្អប្រសើរហូតមកដល់សព្វថ្ងៃនេះ ៕
អត្ថបទ និង រូបថត ៖ លោក ជា ស្រស់ និង លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
