កូនឈើចម្រុះ ៥០០ដើម ត្រូវបានដាំនៅបរិវេណខាងត្បូងប្រាសាទបន្ទាយក្តី ដោយអាជ្ញាធរជាតិអប្សរា និងមូលនិធិបរិស្ថាន AEON ជប៉ុន និងមានការចូលរួមពីនិស្សិតអន្តរជាតិមកពីសាកលវិទ្យាល័យនៃបណ្តាប្រទេសមួយចំនួន ដូចជា កូរ៉េ ចិន និងជប៉ុន ប្រមាណជាងមួយរយនាក់។
ថ្លែងនាព្រឹកថ្ងៃទី០៤ ខែសីហានោះ ឯកឧត្តម យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានលើកឡើងថា ការចូលរួមពីអ្នកពាក់ពន្ធ័ទាំងអស់រួមមានមានព្រះសង្ឃ ប្រជាជន សិស្សានុសិស្ស ស្ថាប័នរដ្ឋ និងឯកជន ភ្ញៀវទេសចរជាតិ និងអន្តរជាតិគឺជាកម្លាំងចលករដ៏សំខាន់បំផុតក្នុងការដាំដើមឈើឡើងវិញនៅអង្គរ ព្រោះវាអាចបណ្តុះនូវទឹកចិត្តស្រលាញ់ និងការយល់អំពីតម្លៃ និងអត្ថប្រយោជន៍ដើមឈើចំពោះការអភិរក្សប្រាសាទ និងជីវិតមនុស្ស និងជំរុញការចូលរួមថែរក្សាបេតិកភណ្ឌទាំងអស់គ្នា។
សូមរំលឹកថា ក្រោមយុទ្ធនាការដាំដើមឈើឡើងវិញ ក្នុងរមណីយដ្ឋានអង្គរក្នុងឆ្នាំ២០១៩ អាជ្ញាធរជាតិអប្សរាមានគម្រោងដាំកូនឈើឲ្យបាន ៤ម៉ឺនដើម បច្ចុប្បន្ននេះ សម្រេចបានប្រមាណ៥០ភាគរយហើយ។
អត្ថបទ និង រូបភាព ៖ លោក ម៉ាត់ អារីហ្វីន
កែសម្រួលអត្ថបទ៖ លោក សេង ផល្លី
