កាលពីថ្ងៃទី០៤ ខែសីហា ឆ្នាំ២០១៩នេះ លោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និង ជាតំណាងឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត និងសហការី បាននាំយកអំណោយមនុស្សធម៌រួមមាន៖មុង១ , ភួយ១ , សារុង១ , ក្រមា១ , អាយឺត២ , អង្ករ៥០គីឡូក្រាម និងថវិកាចំនួន១លានរៀល ផ្ដល់ជូនកញ្ញា លាន ចន្ទ្រា អាយុ២៣ឆ្នាំ ជាជនក្រីក្រ កំព្រាឪពុក មានទីលំនៅក្នុងស្រុកចំការលើ ខេត្តកំពង់ចាម ដែលកំពុងសម្រាកព្យាបាលជំងឺ ដោយវះកាត់សន្លាក់ នៅមន្ទីរពេទ្យបង្អែកខេត្តសៀមរាប។
មានប្រសាសន៍នាឱកាសនោះ លោកជំទាវ ទាង អេង ទៀសីហា បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តមប្រធានគណៈកម្មាធិការសាខា និង បានលើកទឹកចិត្តកុំឲ្យអស់សង្ឃឹម ត្រូវមានទំនុកចិត្តជឿជាក់លើគ្រូពេទ្យជំទាញ ហើយត្រូវខិតខំថែរក្សាសុខភាពដើម្បីឆាប់បានជាសះស្បើយ ពិសេសពេលត្រលប់ទៅស្រុកកំណើតវិញ ត្រូវសម្រាកឱ្យបានគ្រប់គ្រាន់ ហើយបើមានអាការៈមិនស្រួលសូ មប្រញាប់ទៅកាន់មន្ទីរពេទ្យដែលនៅជិត ហើយក្នុងករណីមានការចាំបាច់ សូមទំនាក់ទំនងទៅសាខា ឬអនុសាខាកាកបាទក្រហមកម្ពុជា នៅក្នុងភូមិសាស្ត្រនោះ ។
សូមបញ្ជាក់ថា ក្នុងឱកាសនោះដែរ លោកជំទាវ ទាង អេង ទៀសីហា និងសហការី ក៏បាននាំយកថវិកាមួយចំនួន ចែកជូនអ្នកជំងឺផ្សេងទៀត ដែលកំពុងសម្រាកព្យាបាលជំងឺនៅមន្ទីរពេទ្យបង្អែកខេត្តសៀមរាបផងដែរ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
