កាលពីព្រឹកថ្ងៃទី០៥ ខែសីហា ឆ្នាំ២០១៩នេះ លោកស្រី យូ សុភា អភិបាលរងខេត្ត និងជាប្រធានគម្រោងលើកកម្ពស់វិស័យសេវាសង្គមខេត្តសៀមរាប បានដឹកនាំកិច្ចប្រជុំមួយ ស្តីពីការពិនិត្យសំណើគម្រោងអាទិភាពផ្នែកសេវាសង្គម ឃុំ-សង្កាត់ ដើម្បីបញ្ចូលទៅក្នុងកម្មវិធីវិនិយោគបីឆ្នាំរំកិល២០២០-២០២២ និងនីតិវិធីនៃការទូទាត់ ដោយមានការអញ្ជើញចូលរួមពីតំណាងទីចាត់ការផែនការវិនិយោគខេត្ត , តំណាងរតនាគារខេត្ត , តំណាងទីចាត់ការហិរញ្ញវត្ថុ , តំណាងរដ្ឋបាលក្រុង ស្រុកទាំង១២ និងតំណាងអង្គការ UNICEF ផងដែរ។
លោកស្រី យូ សុភា មានប្រសាសន៍ថា រយៈ កាល កន្លង មក ការ ធ្វើ ការ ងារ ផ្នែកសេវាសង្គមនេះ យើង ពុំ មាន ថវិកា សម ស្រប សម្រាប់ ឲ្យ ការងារ ផ្នែក នេះ មាន ដំណើរ ការ ដោយ ភាព រលូន នោះ ទេ ដូច្នេះ នេះជាកិច្ចប្រជុំមួយដែលមានសារៈសំខាន់ ដើម្បីធ្វើការពិនិត្យទៅលើសំណើគម្រោងអាទិភាពផ្នែកសេវាសង្គម ដែលយើងបានរកឃើញតាមរយៈផែនទីសេវាសង្គមភូមិ សម្រាប់ដាក់បញ្ចូលក្នុងកម្មវិធីវិនិយោគ៣ឆ្នាំរំកិលឃុំ សង្កាត់ ឆ្នាំ២០២០-២០២២ ចំពោះថវិកាលើផ្នែកសេវាសង្គមឲ្យបាន៥ភាគរយ ដោយផ្អែកទៅតាមសេចក្តីណែនាំអន្តរក្រសួង រួមមានក្រសួងមហាផ្ទៃ និងក្រសួងសេដ្ឋកិច្ចនិងហិរញ្ញវត្ថុ ក្នុងការគ្រោងកញ្ចប់ថវិកាការប្រើប្រាស់ និងការទូទាត់ឲ្យបានត្រឹមត្រូវតាមការណែនាំរបស់ថ្នាក់ជាតិ និងតាមតម្រូវការនៅមូលដ្ឋាន ។
លោកស្រី យូ សុភា មានប្រសាសន៍បន្ថែមថា ដូចយើងទាំងអស់គ្នាបានដឹងស្រាប់ហើយថា ផ្នែកសេវាសង្គមនេះ រួមមាន ៖ បញ្ហាការអប់រំកុមារតូច , បញ្ហាភាពងាយរងគ្រោះ , បញ្ហាសុខភាពមាតា ទារក និង អាហារូបត្ថម្ភ , បញ្ហាទឹកស្អាតនិងអនាម័យ , បញ្ហាកិច្ចការពារកុមារ ។ល។ ជាកិច្ចការមួយដែលមានសារៈសំខាន់ណាស់ ដែលប្រមុខរាជរដ្ឋាភិបាលកម្ពុជា ក្រសួងមហាផ្ទៃ និង អាជ្ញាធរខេត្តសៀមរាប បាននឹងកំពុងយកចិត្តដាក់ជាខ្លាំង ក្នុងការលើកស្ទួយ ការគាំពារ និង ការការពារ ដូច្នេះសូមឲ្យមន្ត្រីជំនាញទាំងនៅថ្នាក់ខេត្ត និងក្រុង-ស្រុក ត្រូវបង្កើនការយកចិត្តទុកដាក់បន្ថែម ដើម្បីឲ្យការងារនេះ ទទួលបានលទ្ធផលកាន់តែប្រសើរឡើង ជាពិសេស សូមឲ្យបង្កើនការបណ្តុះបណ្តាលពង្រឹងសមត្ថភាពដល់អ្នកទទួលបន្ទុកកិច្ចការនារី និងកុមារឃុំ-សង្កាត់ ដែលជាអ្នកអនុវត្តគម្រោងសេវាសង្គមផ្ទាល់ ទាំងអ្នកចាស់ និងអ្នកថ្មី ៕
ព័ត៌មានជាតិ ថ្មីៗ
អត្ថបទ និង រូបថត ៖ ក្រុមការងារគម្រោងលើកកម្ពស់វិស័យសេវាសង្គមខេត្តសៀមរាប
កែសម្រួលអត្ថបទ ៖ លោក លីវ សាន្ត
