នាព្រឹកថ្ងៃទី០៦ ខែសីហា ឆ្នាំ២០១៩នេះ លោក ពៅ ពិសិដ្ឋ អភិបាល រងខេត្ត និង ជាតំណាងដ៏ខ្ពង់ខ្ពស់របស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំកិច្ចប្រជុំពិភាក្សាការងារមួយ ស្តីពីការៀបចំសុខសណ្តាប់ធ្នាប់ និងរបៀបរៀបរយសាធារណៈបានល្អប្រសើរក្នុងដំណើរការប្រឡងសញ្ញាបត្រមធ្យមសិក្សាទុតិយភូ ដែលនឹងប្រព្រឹត្តទៅនៅថ្ងៃទី១៩ និង ថ្ងៃទី២០ ខែសីហា ឆ្នាំ២០១៩ខាងមុខនេះ ដោយមានការចូលរួមពីសំណាក់លោក លោកស្រី ជានាយករងរដ្ឋបាលសាលាខេត្ត ប្រធាន-អនុប្រធាន មន្ទីរ-អង្គភាព កងកំលាំងប្រដាប់អាវុធខេត្ត តំណាងសហភាពសហព័ន្ធយុវជនកម្ពុជាខេត្តសៀមរាប និងមន្ត្រីពាក់ព័ន្ធមួយចំនួនទៀត ។
លោកពៅ ពិសិដ្ឋ អភិបាលរងខេត្ត បានបញ្ជាក់ថា ការប្រឡងជាច្រើនលើកកន្លងមកនៅក្នុងខេត្តសៀមរាប អនុវត្តបានយ៉ាងល្អប្រសើរ ដូច្នេះសម្រាប់ការប្រឡងលើកនេះ ក៏សុំឲ្យស្ថាប័នពាក់ព័ន្ធទាំងអស់ ត្រូវយកចិត្តទុកដាក់បន្ថែមទៀត ដើម្បីរៀបចំសន្តិសុខ សណ្ដាប់ធ្នាប់ គ្រូពេទ្យសង្គ្រោះ ក្រុមការងារត្រួតពិនិត្យតាមដានការប្រឡង និងធ្វើការផ្សព្វផ្សាយរាល់លិខិតបទដ្ឋានដែលពាក់ព័ន្ធឲ្យបានទូលំទូលាយជូនប្រជាពលរដ្ឋ និងបេក្ខជន បេក្ខនារីប្រឡង ឱ្យមានប្រសិទ្ធភាពខ្ពស់ និង ជាទំនុកចិត្តដល់ប្រជាពលរដ្ឋ ។
គួររំលឹកថា នៅមណ្ឌលខេត្តសៀមរាប សម្រាប់ឆ្នាំសិក្សា ២០១៨ – ២០១៩នេះ មានបេក្ខជនដែរត្រូវចូលរួមប្រឡងសញ្ញាបត្រមធ្យមសិក្សាទុតិយភូមិមានចំនួន៨.៧១៤ នាក់ ក្នុងនោះស្រីមានចំនួន ៤.៨២៩នាក់ និងមាន១៣ មណ្ឌល ស្មើនឹង៣៨៤បន្ទប់ ចែកចេញជា ២ ផ្នែក ៖ គឺ១. ផ្នែកវិទ្យាសាស្ត្រពិត មាន៤មណ្ឌល ស្មើនឹង ១១៨បន្ទប់ មានបេក្ខជនចំនួន ២.៩៤៤ នាក់ ក្នុងនោះស្រីមានចំនួន ១.៧០៧ នាក់ និង ២. ផ្នែកវិទ្យាសាស្ត្រសង្គម មាន០៩មណ្ឌល ស្មើនឹង១៣០ បន្ទប់ មានបេក្ខជនចំនូន៥.៧៧០ នាក់ ក្នុងនោះស្រីចំនួន១២២ នាក់ កើនឡើងចំនួនមួយមណ្ឌល ខណៈឆ្នាំ២០១៨ មានតែ ១២ មណ្ឌល ប៉ុណ្ណោះ ។
គួររំលឹកផងដែរថា ក្នុងពិធីចែករង្វាន់សិស្សឆ្នើម នៃវិទ្យាល័យអង្គរ ខេត្តសៀមរាប កាលព្រឹកថ្ងៃទី៣១ ខែកក្កដា ឆ្នាំ២០១៩កន្លងទៅនេះ ឯកឧត្តម ទៀ សីហា អភិបាលនៃគណៈអភិបាលខេត្ត បានប្រកាសជាសាធារណៈថា សិស្សានុសិស្សប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០១៨-២០១៩ នៅក្នុងទូទាំងខេត្ត ដែលជាប់ ទទួល និទ្ទេស A , B និង C នឹងទទួលបានរង្វាន់លើកទឹកចិត្តពី អាជ្ញាធរខេត្តសៀមរាប ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០១៧-២០១៨ នៅទូទាំងខេត្តសៀមរាបមានបេក្ខជនដែលបានប្រឡងចំនួន ៧.៧៥៣នាក់ ក្នុងនោះបេក្ខជនប្រឡងជាប់ចំនួន ៥.៩០២នាក់ ស្រីចំនួន ៣.៣៣៧នាក់ ស្មើនឹង ៧៦,១៣ភាគរយ ក្នុងនោះសិស្សទទួលបាន និទ្ទេស A មានចំនួន ២១រូប , និទ្ទេសB ចំនួន ៩៥រូប , និទ្ទេស C ចំនួន ៣៧៤រូប , និទ្ទេស D ចំនួន ១.៤២០រូប និងនិទ្ទេស E ចំនួន ៣.៩៩២រូប ហើយសិស្សដែលទទួលបាននិទ្ទេស A ចំនួន ២១រូប ក្នុងនោះស្រីចំនួន២រូប ត្រូវទទួលបានរង្វាន់ម៉ូតូម្នាក់មួយគ្រឿង ពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះមូលដ្ឋានខេត្តសៀមរាប។
សិស្សដែលទទួលបាននិន្ទេស A ចំនួន ២១នាក់នោះ ៖ មកពីសាលា វិទ្យាល័យ១០ មករា ១៩៧៩ ចំនួន ០៩នាក់ , វិទ្យាល័យ អង្គរ ចំនួន ០៤នាក់ , វិទ្យាល័យកំពង់ក្ដី ចំនួន ០២នាក់ , សាលាអន្តរជាតិ ភ្យូឆឺរប្រាយ ចំនួន ០២នាក់ , វិទ្យាល័យ ហ៊ុនសែន វត្តស្វាយ ចំនួន ០១នាក់ , វិទ្យាល័យ ដំដែក ចំនួន ០១នាក់ , វិទ្យាល័យ អេអូអេស ០១នាក់ និងសាលាញូវយ៉កអន្តរជាតិ ចំនួន១នាក់ ៕
អត្ថបទ និង រូបថត ៖ លោក លីវ សុខុន និង រដ្ឋបាលខេត្តសៀមរាប
កែសម្រួលអត្ថបទ ៖ លោក លីវ សាន្ត
