ទូរទស្សន៍សិង្ហបុរី Channel News Asia បានផ្សព្វផ្សាយថា ក្រសួងពាណិជ្ជកម្មចិន បានឲ្យដឹងនៅថ្ងៃទី៦ សីហានេះថា បណ្តាក្រុមហ៊ុនចិន បានបញ្ឈប់ការទិញផលិតផលកសិកម្មរបស់សហរដ្ឋអាមេរិក បណ្ដាលឲ្យការនាំចេញរបស់កសិករអាមេរិក មានធ្លាក់ចុះ ដែលជាហេតុនៃសង្គ្រាមពាណិជ្ជកម្ម ដែលមានអាយុកាលជាងមួយឆ្នាំមកហើយនោះ ។
ក្រសួងដដែលនេះបានឲ្យដឹងថា ប្រទេសចិន ក៏អាចដាក់ពន្ធគយបន្ថែមលើ ផលិតផលកសិកម្ម របស់សហរដ្ឋអាមេរិកផងដែរ ដោយបង្កើនឧបសគ្គចំពោះ ពាណិជ្ជកម្មនាពេលអនាគត ដែលផ្តោតលើបណ្តារដ្ឋ នៅតាមជនបទដែលគាំទ្រ ប្រធានាធិបតីអាមេរិក លោក ដូណាល់ ត្រាំ ក្នុងការបោះឆ្នោតឆ្នាំ២០១៦ ។
លោក ត្រាំ បានថ្លែងកាលពីថ្ងៃព្រហស្បតិ៍ថា ក្រុងប៉េកាំង មិនបានបំពេញតាមការសន្យា ក្នុងការទិញផលិតផលកសិកម្ម ពីអាមេរិកយ៉ាងច្រើនឡើយ ហើយលោកត្រាំបានប្តេជ្ញាថា នឹងយកពន្ធថ្មីលើទំនិញចិនមានទំហំប្រមាណ បីរយពាន់លានដុល្លារវិញ ដែលជាការរំពឹងទុកយ៉ាងខ្លាំង ចំពោះកិច្ចព្រមព្រៀងពាណិជ្ជកម្ម ។
កាលពីថ្ងៃចន្ទម្សិលមិញនេះ ប្រទេសចិន ក៏បានអនុញ្ញាតឱ្យប្រាក់យ័ន ថយចុះដល់កម្រិតដ៏ទាបជាងប្រាក់ដុល្លារអាមេរិចជាលើកដំបូង នៅក្នុងរយៈពេលជាងមួយទសវត្សរ៍មកនេះ ។
ប្រភព៖ដើមអំពិល
ប្រែសម្រួលដោយ៖ ម៉ៅ បុប្ផាមករា
