អ្នកនាំពាក្យ របស់កងកម្លាំង ប្រដាប់អាវុធប៉ាគីស្ថាន លោក Asif Ghafoor បាននិយាយកាលពីថ្ងៃចន្ទម្សិលមិញនេះថា ប្រទេសប៉ាគីស្ថាន មានបទប្បញ្ញត្តិសន្តិសុខចាំបាច់ ដើម្បីធានាការការពារប្រជាជន របស់ខ្លួននៅក្នុងតំបន់កាស្មៀរ។
យោងតាមសារព័ត៌មាន Sputnik ចេញផ្សាយនៅថ្ងៃទី០៦ ខែសីហា នេះ បានឱ្យដឹងថា នៅព្រឹកថ្ងៃដដែលនេះក្រសួងការបរទេសប៉ាគីស្ថានបាននិយាយថា រដ្ឋាភិបាលទីក្រុងអ៊ីស្លាម៉ាបាដ នឹងប្រើគ្រប់មធ្យោបាយដែលអាចធ្វើទៅបាន ដើម្បីប្រឆាំងនឹងអ្វី ដែលខ្លួនចាត់ទុកថា ជាការសម្រេចចិត្តខុសច្បាប់របស់ឥណ្ឌា ក្នុងការដកហូតឋានៈពិសេសរបស់រដ្ឋ ចាមួ និងកាស្មៀរ នៅតំបន់កាស្មៀរឥណ្ឌា និងដាក់នៅក្រោមការ គ្រប់គ្រងដោយផ្ទាល់ នៃរដ្ឋាភិបាលសហព័ន្ធ។
លោក Ghafoor បាននិយាយថា ប៉ាគីស្ថានមានវិធានការការពារ របស់ខ្លួនជាស្រេច។ ប៉ាគីស្ថាននឹងចាត់វិធានការចាំបាច់ទាំងអស់ និងបន្តឈរយ៉ាងរឹងមាំជាមួយនឹងបុព្វហេតុ នៃការជិះជាន់របស់តំបន់ ចាមួ និងកាស្មៀរ ដែលគ្រប់គ្រងដោយប្រទេសឥណ្ឌា ដើម្បីទទួលបានសិទ្ធិក្នុង ការប្តេជ្ញាចិត្តរបស់ខ្លួន ដូចទៅនឹងដំណោះស្រាយរបស់ក្រុមប្រឹក្សា សន្តិសុខអង្គការសហប្រជាជាតិ UNSC »។
សូមជម្រាបថា ចាប់តាំងពីឆ្នាំ ១៩៤៧ ទឹកដីចាមួ និងកាស្មៀរ មានឋានៈពិសេសក្រោមមាត្រា ៣៧០ នៃរដ្ឋធម្មនុញ្ញឥណ្ឌាដែលបានផ្តល់សិទ្ធិឱ្យរដ្ឋធម្មនុញ្ញ និងសិទ្ធិធ្វើសេចក្តីសម្រេចចិត្តលើ គ្រប់វិស័យទាំងអស់លើកលែង តែកិច្ចការការពារជាតិកិច្ចការ បរទេសនិងទំនាក់ទំនង។
កាលពីថ្ងៃចន្ទម្សិលមិញនេះ មាត្រា ៣៧០ ត្រូវបានដកហូតដោយក្រឹត្យប្រធានាធិបតី។ សភាជាន់ខ្ពស់នៃប្រទេសឥណ្ឌា បានបោះឆ្នោត ១២៥-៦១ ដោយ១សំឡេង អនុប្បវាទ ចំពោះការបំបែករដ្ឋចាមួ និងកាស្មៀរ។ ច្បាប់នេះមិនទាន់ត្រូវបានអនុម័តដោយសភាជាន់ទាបនៅឡើយទេ ៕
ប្រភព៖ដើមអំពិល
ប្រែសម្រួលៈ ណៃ តុលា
