អាជ្ញាធរខេត្តសៀមរាបបើកសិក្ខាសាលាស្ដីពីសេចក្តីណែនាំស្តីពីកិច្ចពិគ្រោះយោបល់ភាពជាដៃគូនៅថ្នាក់ក្រោមជាតិ

នៅព្រឹកថ្ងៃពុធ ៧កើត ខែស្រាពណ៍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៧ ខែសីហា ឆ្នាំ២០១៩នេះ លោកជំទាវ ស៊ិន ណម សមាជិកា ក្រុមប្រឹក្សាខេត្ត តំណាងឯកឧត្តម អ៊ឹង ហឿន ប្រធានក្រុមប្រឹក្សាខេត្ត លោក ពៅ ពិសិដ្ឋ អភិបាលរង នៃគណៈអភិបាលខេត្ត និងជាតំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានចូលរួមសិក្ខាសាលាផ្សព្វផ្សាយ “សេចក្ដីណែនាំស្ដីពីកិច្ចពិគ្រោះយោបល់ភាពជាដៃគូរនៅថ្នាក់ក្រោមជាតិ” ក្រោមអធិបតីភាព ឯកឧត្តម អ៊ឹម សួរ អគ្គលេខាធិការរងគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា ឯកឧត្តម ហ៊ូ តាំងអេង រដ្ឋលេខាធិការ ក្រសួងផែនការ លោក ជ័យ សម្បត្តិ ប្រធានអង្គភាពវិភាគ និងអភិវឌ្ឍន៍គោលនយោបាយ នៃលេខាធិការដ្ឋាន គ.ជ.អ.ប និងមានការចូលរួមពី ឯកឧត្តម លោកជំទាវ លោក លោកស្រី តំណាងមន្ទីរ-អង្គភាព មកពីខេត្តចំនួន៤ គឺខេត្តសៀមរាប ឧត្តរមានជ័យ ព្រះវិហារ និងខេត្តកំពង់ធំ សរុបចំនួន ៦០នាក់។

ឯកឧត្តម អ៊ឹម សួរ បានមានប្រសាសន៍ថា គោលដៅសំខាន់នៃសិក្ខាសាលានេះ គឺការផ្សព្វផ្សាយសេចក្តីសម្រេចរបស់រាជរដ្ឋាភិបាលស្តីពី សេចក្តីណែនាំក្នុងការរៀបចំកិច្ចពិគ្រោះយោបល់ភាពជាដៃគូនៅថ្នាក់ក្រោមជាតិហើយសិក្ខាសាលានឹងផ្តោតលើរបៀបវារៈសំខាន់ចំនួន ០៤ រួមមាន ទី១ ការកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិល ទី២ សេចក្តីណែនាំស្តីពីកិច្ចពិគ្រោះយោបល់ភាពជាដៃគូនៅថ្នាក់ក្រោមជាតិ ទី៣ បទបង្ហាញស្តីពីប្រព័ន្ធទិន្នន័យហិរញ្ញប្បទានសហប្រតិបត្តិការ និងប្រព័ន្ធទិន្នន័យស្តីពីអង្គការមិនមែនរដ្ឋាភិបាល និងទី៤ ផ្តោតសំខាន់ទៅលើការពិភាក្សាពីការធ្វើសមាហរណកម្មយន្តការ ។

ឯកឧត្តម អ៊ឹម សួរ មានប្រសាសន៍បន្តថា ចំពោះគោលបំណងនៃកិច្ចពិគ្រោះយោបល់ភាពជាដៃគូនៅថ្នាក់ក្រោមជាតិវិញគឺផ្ដោតសំខាន់ទៅលើ ការលើកកម្ពស់អភិក្រមនៃការចូលរួមប្រកបដោយបរិយាប័ន្ន ដើម្បីពិនិត្យវឌ្ឍនភាពការអភិវឌ្ឍ និងបញ្ហាប្រឈមនៅមូលដ្ឋាន ការពង្រឹងសមត្ថភាពគ្រប់គ្រងរបស់រដ្ឋបាលថ្នាក់ក្រោមជាតិ ការពង្រឹងគុណភាព និងប្រសិទ្ធភាពនៃការផ្ដល់សេវាសាធារណៈនៅថ្នាក់ក្រោមជាតិ ការចែករំលែកព័ត៌មានរវាងតួអង្គអភិវឌ្ឍន៍ទាំងអស់ដែលបានផ្តល់ការគាំទ្រ ឬអនុវត្តសកម្មភាពនៅថ្នាក់ក្រោមជាតិ និងអ្វីដែរសំខាន់នោះ គឺការបំពេញបន្ថែមឲ្យយន្តការដទៃទៀត និងវេទិកាពិគ្រោះយោបល់ថ្នាក់ក្រោមជាតិដែលមានស្រាប់ ។