ក្នុងរយៈពេលពេញមួយអាណត្តិនៃអាណត្តិទី២របស់ក្រុមប្រឹក្សាស្រុកក្រឡាញ់ កន្លងមកស្រុកនេះទទួលបាននូវសមិទ្ឋផល និងការអភិវឌ្ឍន៍រីកចម្រើនលើហេដ្ឋារចនាសម្ព័ន្ឋនានាជាច្រើន ពីសំណាក់រាជរដ្ឋាភិបាល ក្រោមការដឹកនាំដ៍ប៉ិនប្រសព្វនិងឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្រោមកិច្ចខិតខំ ប្រឹងប្រែង រួមគ្នាយ៉ាងសកម្មពីសំណាក់ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនិងជាប្រធានក្រុមការងារថ្នាក់ជាតិចុះជួយខេត្តសៀមរាប និងបានការចូលរួមយ៉ាងសស្រាក់សស្រាំ ពីសំណាក់ ឯកឧត្តមឧកញ៉ាបណ្ឌិត សៀង ណាំ សមាជិករដ្ឋសភា តំណាងរាស្ត្រ មណ្ឌលសៀមរាប និងជាប្រធានក្រុមការងារខេត្តចុះជួយស្រុកក្រឡាញ់ បានជួយសាងសង់សាលារៀន ផ្លូវលំ ផ្លូវចាក់បេតុង មណ្ឌលសុខភាព បន្ទប់ទឹក អណ្តូងទឹក និងសំភារៈសិក្សាយ៉ាងច្រើន ចែកជូន ដល់ លោកគ្រូ អ្នកគ្រូ និងសិស្សានុសិស្សក្នុងស្រុកក្រឡាញ់។
លោកស្រី ម៉ននី រង្សី អភិបាលស្រុកក្រឡាញ់ បានមានប្រសាសន៍ថា ក្រោមការដឹកនាំរបស់រាជរដ្ឋាភិបាលដែលបានយកចិត្តទុកដាក់គិតគូរនូវទុក្ខលំបាករបស់បងប្អូនប្រជាពលរដ្ឋក្នុងមូលដ្ឋាន និងការជួយជ្រោមជ្រែងរបស់ឯកឧត្តម អ្នកឧកញ៉ាបណ្ឌិត សៀង ណាំ ក្នុងការចូលរួមចំណែកអភិវឌ្ឍន៍ស្រុកក្រឡាញ់ ឲ្យកាន់តែមានភាពរីកចម្រើនរួមជាមួយ សមិទ្ធផលធំៗ និងសំខាន់ៗ ដែលបានផ្តល់ជូនដល់បងប្អូន ប្រជាពលរដ្ឋក្នុងស្រុកក្រឡាញ់ រួមមានសាលារៀន មានចំនួន ១០៣ ខ្នង ស្មើនឹង ៤៣៤ បន្ទប់ ការសាងសង់ផ្លូវចាក់បេតុងចំនួន ០៣ខ្សែក្នុងឃុំ សំណាលមានប្រវែង ២,៩៨២ម៉ែត្រ ជីកអណ្តូងស្នប់បាន ចំនួន ១៤៨អណ្តូង ចូលរួមសាងសង់ព្រះវិហារ ការសាងសង់ និងជួសជុលផ្លូវជាច្រើនតាមបណ្តាឃុំក្នុងស្រុក រួមជាមួយនិងសមិទ្ធផលជាច្រើនទៀត។
លោកស្រី ម៉ននី រង្សី បន្តថា ក្នុងនីតិកាលទី៥ នៃរដ្ឋសភានេះ រាជរដ្ឋាភិបាល បាននឹងបន្តអនុវត្តនូវយុទ្ធសាស្ត្រចតុកោណ ដំណាក់កាលទី៤ ដើម្បីធ្វើយ៉ាងណាឱ្យសេវា សាធារណៈ នៅកៀកប្រជាពលរដ្ឋ ព្រមទាំងការធ្វើឲ្យសេវា កាន់តែមាន គុណភាព និង ប្រសិទ្ធភាពខ្ពស់ ឆ្លើយតបតាមតម្រូវការចាំបាច់របស់បងប្អូនប្រជាពលរដ្ឋ ស្របតាមកំណែងទម្រង់ស៊ីជម្រៅរបស់រាជរដ្ឋាភិបាលអាណត្តិ ទី៦ ដើម្បីសំរេចបាននូវការអភិវឌ្ឍប្រកបដោយចីរភាព និង សមធម៍ ជាពិសេសអភិវឌ្ឍន៍ហេដ្ឋារចនាសម្ព័ន្ធរូបវន្តនៅមូលដ្ឋាន ដើម្បីបង្រួមគម្លាត ពីទីក្រុងទៅទីជនបទ ព្រមទាំងបានធ្វើឱ្យតំបន់ ជនបទ និង ទីប្រជុំជនមានសាលារៀនតាំងពីកម្រិតមត្តេយ្យរហូតដល់កម្រិតឧត្តមសិក្សា មានមណ្ឌលសុខភាព មន្ទីរពេទ្យ ផ្សារលក់ដូរ អគ្គិសនី ព្រះវិហារ ទីវត្តអារាម ប្រឡាយ អណ្តូងទឹក អាងស្តុកទឹក បង្គន់អនាម័យសាធារបណ្តាញផ្លូវគមនាគមន៍ ស្ពាន ផ្លូវថ្នល់ខ្វាត់ខ្វែង មធ្យោបាយបង្កបង្កើនផល និង ផលិតកម្មផ្សេងៗផងដែរ។
លោកស្រីអភិបាលស្រុក បន្ថែមថា ដោយផ្ដើមចេញពីសមិទ្ឋផលខាងលើនេះ រដ្ឋបាលស្រុក បានចូលរួមដោយខិតខំប្រឹងប្រែងធ្វើកំណែទម្រង់កាន់តែមានលក្ខណៈទូលំទូលាយ និងកាន់តែស៊ីជម្រៅឡើងជាបន្ដបន្ទាប់ ដើម្បីឱ្យ បណ្ដាអង្គភាពនានាក្រោមឱវាទ អនុវត្ដបានសមស្រប តាមរចនាសម្ព័ន្ធ និងការប្រព្រឹត្ដទៅនៃអង្គភាពទាំងនោះ ដោយបានកែសម្រួល រៀបចំធនធានមនុស្ស ឱ្យសមស្របតាមលក្ខណៈសម្បត្ដិជាក់ស្ដែងនៃការងារ សាមគ្គីផ្ទៃ ក្នុង រវាងគណៈអភិបាល និងក្រុមប្រឹក្សាស្រុក ។ ធ្វើឱ្យកិច្ចការក្នុងរដ្ឋបាលស្រុក មានដំណើរការកាន់តែមាន ប្រសិទ្ធភាពខ្ពស់ ទាំងកិច្ចការរដ្ឋបាលដែនដី ការគ្រប់គ្រងបុគ្គលិក ការបណ្ដុះបណ្ដាលវិជ្ជាជីវៈ ចំណេះ ដឹង លើ ការងាររដ្ឋបាល សេដ្ឋកិច្ច សង្គមកិច្ច ព្រមទាំងកិច្ចការផ្សេងៗទៀត ដើម្បីបម្រើឧត្ដមប្រយោជន៍ជាតិ និងជម្រុញ ការស្ដារ និងអភិវឌ្ឍសង្គមជាតិ ។
លោកស្រី ម៉ននី រង្សី បានបញ្ជាក់ថា ក្នុងឆ្នាំ២០១៨ កន្លង មកនេះ ស្រុកក្រឡាញ់បានទទួលអគារសិក្សាថ្មីដែលជាអំណោយដ៏ថ្លៃថ្លារបស់ឯកឧត្តម សៀង ណាំ និង សប្បុរសជនជប៉ុន មានចំនួន ៥អគារ ស្មើនឹង ២៩បន្ទប់ និងក្នុងនោះ កំពុងដំណើរការសាងសង់អគាសិក្សា ០១ខ្នង និងកំពស់ ២ជាន់ មាន ១០បន្ទប់ សម្រាប់បង្កើតវិទ្យាល័យក្នុងឃុំសែនសុខ ។ ជាមួយគ្នានេះដែរ ដើម្បីជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ឯកឧត្តមបាន ជួយសាងសង់ផ្លូវបេតុងចំនួន ០៣ខ្សែ ស្មើនឹង ២៩៨២ម៉ែត្រ ក្នុងឃុំស្រណាល និងកំពុងសាងសង់ស្ពានបេតុង ទទឹង ៦ម៉ែត្រ និងមានប្រវែង ៥០ម៉ែត្រ តភ្ជាប់ពីភូមិឱម៉ាល់ ឃុំសំបួរ ទៅភូមិបត់ ត្រង់ឃុំប្រាសាទ ស្រុកព្រះ នេត្រព្រះ ខេត្តបន្ទាយមានជ័យផងដែរ។នៅដើមខែសីហាឆ្នាំ២០១៩ថ្មីៗនេះ ផ្លូវគ្រួសក្រហមមួយខ្សែប្រវែងជាង ១១ គីឡូម៉ែត្របានបើកការដ្ឋានឲ្យដំណើរការសាងសង់នឹងក្លាយទៅជាផ្លូវក្រាលកៅស៊ូ ១០០% ក្នុងឆ្នាំ ២០២១ ជាអំណោយដ៏ថ្ងៃថ្លាសម្តេចតេជោ ហ៊ុន សែន នាយករដ្ឋមន្ត្រី កំណាត់ផ្លូវនេះ ភ្ជាប់ពីផ្លូវជាតិលេខ៦៨ ចេញពីភូមិចន្លាស់ដៃ ឆ្ពោះទៅភូមិគោកត្រុំ ត្រង់ចំណុចផ្លូវជាតិលេខ ៦ ( គីឡូម៉ែត្រលេខ៣៥៩ ) ឆ្លងកាត់៤ភូមិ រួមមាន ភូមិគោកត្នោត ភូមិឈូករ័ត្ន ភូមិរុន និង ភូមិខ្នារជោ ។
សូមបញ្ជាក់ថា ក្រឡាញ់គឺជាស្រុកមួយក្នុងចំណោមក្រុងស្រុកទាំង១២នៃខេត្តសៀមរាប ស្រុកក្រឡាញ់មាន ១០ ឃុំ ចែកចេញជា ៩៨ ភូមិ មានចំនួនគ្រួសារសរុប ១៥,០៧៣គ្រួសារ -មានប្រជាជនសរុប ៧១,៣៨៦នាក់ ស្រី៣៦,១៨៧ ដោយប្រជាជនប្រមាណ ៨៥% ជាកសិកររស់នៅពឹងផ្អែកលើវិស័យកសិកម្មជាចម្បង ក្រៅពីនេះក៏មានវិស័យ ផ្សេងៗទៀតដូចជា នេសាទត្រី សិប្បកម្ម សេវាកម្ម និងអាជីវកម្មផ្សេងៗ ដែលជាមូលដ្ឋានក្នុងការទ្រទ្រង់ ជីវភាព រស់នៅប្រជាពលរដ្ឋ។
អត្ថបទ និង រូបភាព ៖ យូ វង្ស
កែសម្រួល៖ អ៊ុន ណារាជ្យ
