ព្រឹកថ្ងៃទី០៦ ខែសីហា ឆ្នាំ២០១៩នេះ គណៈបញ្ជាការឯកភាពរដ្ឋបាលស្រុកពួក ដឹកនាំដោយលោក ស៊ីន ចាន់ថុល អភិបាលស្រុកស្តីទី បានដឹកនាំកម្លាំងសរុបចំនួន១០នាក់ រួមមានកម្លាំងប៉ុស្តិ៍នគរបាលរដ្ឋបាលឃុំកែវពណ៌ សហគមន៍នេសាទកែវពណ៌ សហការជាមួយខណ្ឌរដ្ឋបាលជលផលខេត្តសៀមរាប ដឹកនាំដោយលោកស្រី កែវ សុភៈ នាយរងខណ្ឌរដ្ឋបាលជលផល និង លោក សំ ផាន់ណា នាយរងផ្នែកទទួលបន្ទុករួមក្រឡាញ់ បានធ្វើចុះពិនិត្យមើលព្រំប្រទល់ដែនទឹកខេត្តសៀមរាម និងបាត់ដំបង , ពិនិត្យមើលស្ថានភាពនៃការប្រើឧបករណ៍នេសាទរបស់ប្រជានេសាទ និង បង្ក្រាបបទល្មើសនេសាទនារដូវត្រីពងកូន នៅចំណុចភូមិពាមតាអួរ ឃុំកែវពណ៌ ស្រុកពួក ។
លោក ស៊ីន ចាន់ថុល អភិបាលស្រុកស្តីទី មានប្រសាសន៍ថា ក្នុងប្រតិបត្តិការនេះ ទទួលបានលទ្ធផល ដោយបង្ក្រាបបាន០១ករណី នៅចំណុចស្ទឹងកំបុត ភូមិពាមតាអួរ ឃុំកែវពណ៌ ហើយកាប់បំផ្លាញចោលនៅនឹងកន្លែងមាន ៖ ឧបករណ៍-ប ចំនួន ០៥ គ្រឿង , របាំងសាច់មង ប្រវែង ៣០០ម និង ចម្រឹង ចំនួន ៣៥០ដើម ។
លោក ស៊ីន ចាន់ថុល មានប្រសាសន៍បន្ថែមថា ក្នុងផែនការ និងទិសដៅចំពោះមុខ អាជ្ញាធរស្រុក និងជំនាញជលផល បន្តអប់រំ ណែនាំ និងបង្ក្រាបជាប្រចាំ ដើម្បីចូលរួមថែរក្សាប្រកបដោយចីរភាព នូវធនធានជលផល ៕
អត្ថបទ និង រូបថត ៖ រដ្ឋបាលស្រុកពួក
កែសម្រួលអត្ថបទ ៖ លោក លីវ សាន្ត
