មន្ត្រីនគបាលចរាចរណ៍ខេត្តសៀមរាប បានឲ្យដឹងថា វេលាម៉ោង១ និង៣០នាទី រំលងអាធ្រាត្រ ឈានចូលថ្ងៃទី០៦ ខែសីហា ឆ្នាំ ២០១៩ នេះ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តនិងរថយន្ត នៅលើកំណាត់ផ្លូវជាតិលេខ៦ ត្រង់ចំណុចភូមិប៉ាក់ប៉ាន់ ឃុំសសរស្តម្ភ ស្រុកពួក ខេត្តសៀមរាប បណ្ដាលឲ្យស្លាប់ស្ត្រីម្នាក់នៅនឹងកន្លែងកើតហេតុ ឈ្មោះ សឿនស្រីមុំ ភេទស្រី អាយុ៤៦ឆ្នាំ នៅភូមិទ្រា ឃុំជប់ ស្រុកត្បូងឃ្មុំ ខេត្តត្បូងឃ្មុំ ។
មន្ត្រីនគបាលចរាចរណ៍ បានឲ្យដឹងទៀតថា ករណីនេះគឺ មុនពេលកើតហេតុ មានម៉ាកសាំងយ៉ុងមួយគ្រឿង ពាក់ស្លាកលេខ: ភ្នំពេញ 2AF-6476 ប្រភេទដឹកអ្នកដំណើរធុនតូច អ្នកបើកបរឈ្មោះ ឥន សុភី ភេទប្រុស អាយុ៥៤ឆ្នាំ នៅភូមិទួលទ្រា ឃុំជប់ ស្រុកត្បូងឃ្មុំ ខេត្តត្បូងឃ្មុំ មានដឹកមនុស្ស១នាក់ ឈ្មោះ សឿនស្រីមុំ ភេទស្រី អាយុ៤៦ឆ្នាំ នៅភូមិទ្រា ឃុំជប់ ស្រុកត្បូងឃ្មុំ បើកបរមានទិសដៅពីលិចទៅកើត ដោយប្រជែងខ្វះការប្រុងប្រយ័ត្ន បានបុកពីក្រោយរថយន្តម៉ាកហ៊ីយ៉ាន់ដាយ ពាក់ស្លាកលេខ កំពង់ចាម 3A-7022 ប្រភេទដឹកទំនិញធុនធំ អ្នកបើកបរមិនស្គាល់អត្តសញ្ញាណ បើកបរមានទិសដៅពីលិចទៅកើត ខណៈក្រោយពេលកើតហេតុ អ្នកបើកបររថយន្តម៉ាកហ៊ីយ៉ាន់ដាយរត់គេចខ្លួន ហើយរថយន្តទាំង២គ្រឿង រងការខូចខាតធ្ងន់ ៕
ព័ត៌មានជាតិ ថ្មីៗ
អត្ថបទ និង រូបថត ៖ នគបាលចរាចរណ៍
កែសម្រួលអត្ថបទ ៖ លោក លីវ សាន្ត
