កាលពីព្រឹកថ្ងៃទី០៥ ខែសីហា ឆ្នាំ២០១៩ម្សិលមិញនេះ នៅស្នងការ ដ្ឋាននគរបាលខេត្តសៀមរាប មានបើកកិច្ចប្រជុំមួយ ដើម្បីផ្សព្វ ផ្សាយផែនការការពារ ដំណើរទស្សនកិច្ចផ្លូវរដ្ឋរបស់ឯកឧត្តម MaithripalaSirisena ប្រធានាធិបតី នៃសាធារណរដ្ឋប្រជាធិបតេយ្យស្រីលង្កា នៅខេត្តសៀមរាប ក្រោមអធិបតីភាពឯកឧត្តមនាយឧត្តមសេនីយ៍ ទូច ណារ៉ុថអគ្គស្នងការរងនគរបាលជាតិ និងជាប្រធាននាយកដ្ឋានអង្គរក្ស តំណាងដ៏ខ្ពង់ខ្ពស់ឯកឧត្តមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និង លោក លី សំរិទ្ធ អភិបាលរងខេត្ត និង ជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប ដោយមានការអញ្ជោះញចូលរួមក្នុពីសំណាក់ ឯកឧត្តម និង លោក ជាស្នងការ ស្នងការរង និងមន្ត្រីសំខាន់ៗ នៃស្នងការដ្ឋាននគរបាលខេត្តសៀមរាប , មេបញ្ជាការ មេបញ្ជាការរង នៃទីបញ្ជាការដ្ឋានកងរាជអាវុធហត្ថខេត្ត , តំបន់ប្រតិបត្តិការសឹករងខេត្ត និង តំណាងមន្ទីរអង្គភាពពាក់ព័ន្ធជាច្រើនរូបទៀត ។
មានប្រសាសន៍ក្នុងឱកាសនោះ ឯកឧត្តមនាយឧត្តមសេនីយ៍ ទូច ណារ៉ុថ បានក្រើនរំលឹកដល់ថ្នាក់ដឹកនាំ និងកងកម្លាំងទាំងអស់ ត្រូវបង្កើនការយកចិត្តទុកដាក់សហការគ្នាឲ្យបានល្អ នៅតាមបណ្តាគោលដៅនិមួយៗ និង ការរៀបចំសណ្តាប់ធ្នាប់ សម្រួលចរាចរណ៍ឲ្យបានល្អ យកចិត្តទុកដាក់ក្នុងការការពារ និងបង្ការទប់ស្កាត់បទល្មើស សំដៅរក្សាការពារ និងធានាសន្តិសុខ សុវត្តិភាព ជូនថ្នាក់ដឹកនាំ និងគណៈប្រតិភូជាន់ខ្ពស់ជាតិ និងអន្តរជាតិ ដែលបានអញ្ជើញមកទស្សកិច្ចនៅក្នុងខេត្តសៀមរាបនាពេលនោះ ពិសេស សូមឲ្យកងកម្លាំងត្រូវវិភាគវាយតម្លៃនូវរាល់សភាពការណ៍់ និងឧបាយកលនានា ដែលប៉ុនប៉ងបំផ្លិចបំផ្លាញ ឬការបង្កចលាចលណាមួយ ដែលធ្វើឲ្យបាត់សណ្តាប់ធ្នាប់ហើយត្រូវមានវិធានការម្ចាស់ការ ដើម្បីវាយបក ទប់ស្កាត់ និងដោះស្រាយឲ្យបានទាន់ពេលវេលា និង មានប្រសិទ្ធភាព ។
សូមបញ្ជាក់ថា យោងតាមសេចក្តីប្រកាសព័ត៌មាន របស់នាយកដ្ឋានព័ត៌មាន នៃក្រសួងការបរទេស និងសហប្រតិបត្តិការអន្តរជាតិ នៅថ្ងៃទី០៦ ខែសីហា ឆ្នាំ២០១៩នេះ បានបញ្ជាក់ថា តបតាមការអញ្ជើញរបស់ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ឯកឧត្តម ម៉ៃទ្រីប៉ាឡា ស្មីសេនា (Maithripala Sirisena) ប្រធានាធិបតីនៃសាធារណរដ្ឋប្រជាធិបតេយ្យសង្គមនិយមស្រីលង្កា នឹងអញ្ជើញមកបំពេញទស្សនកិច្ចផ្លូវរដ្ឋ នៅព្រះរាជាណាចក្រកម្ពុជា ពីថ្ងៃទី០៧ ដល់ថ្ងៃទី១០ ខែសីហា ឆ្នាំ២០១៩។
ក្នុងដំណើរបំពេញទស្សនកិច្ចផ្លូវរដ្ឋនេះ ឯកឧត្តមប្រធានាធិបតី នឹងចូលគាល់ព្រះករុណា ព្រះមហាក្សត្រ នៃព្រះរាជាណាចក្រកម្ពុជា នៅក្នុងព្រះបរមរាជវាំង , ឯកឧត្តមប្រធានាធិបតី នឹងជួបប្រជុំទ្វេភាគីជាមួយសម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលក្នុងអំឡុងពេលនោះ កិច្ច សហ ប្រតិបត្តិការទ្វេភាគីនៅក្នុងវិស័យជាច្រើននឹងត្រូវលើក យក មកពិភាក្សា សំដៅពង្រឹងថែមទៀតនូវចំណងទាក់ទងមិត្តភាពរវាង ប្រទេសទាំងពីរ ដែលបានចងភ្ជាប់គ្នាយ៉ាងជ្រាលជ្រៅ តាមរយៈព្រះពុទ្ធសាសនា ។
ថ្នាក់ដឹកនាំទាំងពីរ ក៏នឹងធ្វើការផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិ ដែលជាការព្រួយបារម្ភនិងផលប្រយោជន៍រួមផងដែរ និង បន្ទាប់ពីបញ្ចប់កិច្ចប្រជុំ ឯកឧត្តមប្រធានាធិបតី និងសម្តេចតេជោនាយករដ្ឋមន្ត្រី នឹង អញ្ជើញធ្វើសាក្សីក្នុងពិធីចុះហត្ថលេខាលើឯកសារកិច្ចសហប្រតិបត្តិការមួយចំនួន។
ក្នុងអំឡុងពេលស្នាក់នៅប្រទេសកម្ពុជា ឯកឧត្តមប្រធានាធិបតី នឹងអញ្ជើញទៅកាន់វត្ត លង្កា និងប្រគេនសម្តេចព្រះមហាអរិយវង្ស សៅរ៍ ច័ន្ទថុល្ល ព្រះចៅអធិការវត្តលង្កា នូវកូនដើម ពោធិ៍នៃមហាពោធិព្រឹក្សពីក្រុងអនុរាធបុរៈ ហើយបន្ទាប់មក ឯកឧត្តមនឹងអញ្ជើញចូលរួមក្នុងពិធីដើមឈើតំណាងប្រទេសស្រីលង្កា នៅមជ្ឈមណ្ឌលវិបស្សនាភ្នំឧត្តុង្គ ។
ឯកឧត្តម ម៉ៃទ្រីប៉ាឡា ស្មីសេនា និងសមាជិកគណៈប្រតិភូ ក៏នឹងអញ្ជើញទៅទស្សនាប្រាសាទនានានៅក្នុងឧទ្យានអង្គរ ក្នុងខេត្តសៀមរាបផងដែរ។
ក្នុងដំណើរទស្សនកិច្ចលើកដំបូងមកកាន់កម្ពុជារបស់ឯកឧត្តមប្រធានាធិបតី ម៉ៃទ្រីប៉ាឡា ស្មីសេនា នាពេលនេះ នឹងរួមចំណែកយ៉ាងសំខាន់ដល់ការពង្រឹងចំណងមិត្តភាព និងពង្រីកកិច្ចសហ ប្រតិបត្តិការនៅក្នុងវិស័យសេដ្ឋកិច្ច ពាណិជ្ជកម្ម និងវប្បធម៌ រវាងកម្ពុជានិងស្រីលង្កា៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
