គិតត្រឹមយប់ថ្ងៃទី៣ ខែសីហា មនុស្សចំនួន៥នាក់បានស្លាប់ និង៤នាក់ផ្សេងទៀតបានរងរបួស បន្ទាប់ពីគ្រោះរញ្ជួយដីកម្រិត ៦,៩រ៉ិចទ័របានកើតឡើងនៅក្នុងខេត្ត Banten របស់ប្រទេសឥណ្ឌូណេស៊ីកាលពីមួយថ្ងៃមុននេះ។
យោងតាមទីភ្នាក់ងារគ្រប់គ្រងគ្រោះមហន្តរាយជាតិ (BNPB) បានឱ្យដឹងថា ក្នុងចំណោមអ្នកស្លាប់ទាំងនោះមានម្នាក់បានស្លាប់ដោយសារគាំងបេះដូង និងអស់កម្លាំង ខណៈដែលម្នាក់ទៀតបានស្លាប់ដោយ សារតែភាពភ័យស្លន់ស្លោពេក។
ភ្លាមៗបន្ទាប់ពីគ្រោះរញ្ជួយដី ទីភ្នាក់ងារគ្រប់គ្រងគ្រោះមហន្តរាយជាតិ (BNPB) បានបញ្ជូនក្រុមប្រតិកម្មបន្ទាន់ទៅកាន់តំបន់ដែលរងផលប៉ះពាល់ដោយការរញ្ជួយដីនោះ ដែលមានដូចជាតំបន់ Lampung ខាងត្បូងតំបន់ Pandeglang តំបន់ Serang តំបន់ Lebak និងតំបន់ Sukabumi ដើម្បីគាំទ្រដល់អាជ្ញាធរក្នុងតំបន់ទាំងនោះក្នុងការវាយតម្លៃក្រោយគ្រោះមហន្តរាយ នឹងចូលរួមជាមួយទីភ្នាក់ងារគ្រប់គ្រងគ្រោះមហន្តរាយធម្មជាតិក្នុងតំបន់ក្នុងការជួយដល់មូលដ្ឋាន។
ផ្ទះចំនួន១២២ខ្នងនៅក្នុងខេត្ត Banten រួមនឹងផ្ទះចំនួន២២៣ខ្នង នៅក្នុងខេត្តជ្វាខាងលិច ខេត្ត Bogor ខេត្ត Cianjur ខេត្ត Sukabumi និងខេត្ត West Bandung ក៏ត្រូវបានរងការបំផ្លាញដោយសារការរញ្ជួយដីនេះផងដែរ។ ក្រៅពីនេះ នៅមានកន្លែងគោរពបូជា ការិយាល័យ និងសាលារៀនមួយចំនួនទៀត បានរងផលប៉ះពាល់នេះ។
ក្នុងហេតុការណ៍នេះ មនុស្សជាង ១.០០០នាក់ត្រូវបានជម្លៀសទៅកាន់ជម្រកបណ្តោះអាសន្ន។
ប្រភព៖ VNA
បកប្រែដោយ៖ លោក យា ចិន្តាខន្តី
