ទីភ្នាក់ងារព័ត៌មាន IRNA ផ្លូវការរាយការណ៍ពីថ្ងៃអាទិត្យថា អង្គភាពឆ្មាំបដិវត្តន៍អ៊ិស្លាមអ៊ីរ៉ង់ (IRGC ) បានចាប់នាវាដឹកប្រេងបរទេសមួយ ដោយចោទពីបទដឹកប្រេងរត់ពន្ធនៅក្នុងឈូងសមុទ្រពែក ក្បែរកោះហ្វាស៊ី។
ទីភ្នាក់ងារព័ត៌មាន IRNA បានឲ្យដឹងបន្ថែមថា នាវានេះកំពុងដឹកប្រេង ៧០ម៉ឺនលីត្រ ទៅឱ្យ បណ្តាប្រទេស នៃរដ្ឋអារ៉ាប់។
សេចក្តីរាយការណ៍របស់សារព័ត៌មានពាក់កណ្ដាល់ផ្លូវការ បាននិយាយថា នាវាដឹកប្រេងនេះ ត្រូវគេចាប់កាលពីថ្ងៃអាទិត្យ ។
បើតាមសម្រង់សម្តី លោក Ramezan Zirahi មេបញ្ជាការ IRGC ថា ប្រតិបត្តិការនេះ ធ្វើឡើងបន្ទាប់ពីទទួលបានព័ត៌មានក្រុមស៊ើបការណ៍ ហើយកងនាវាចរសង្កាត់២ របស់ IRGC បានរឹបអូសយកនាវានេះ នៅក្បែរកោះ Farsi កាលពីយប់ថ្ងៃពុធ ។
IRNA បាននិយាយថា នាវាដឹកប្រេងដែលគេចាប់នេះ ត្រូវបានគេផ្ទេរទៅកាន់កំពង់ផែ Bushehr ប្រទេសអ៊ីរ៉ង់ភាគខាងត្បូង ។
លោក Zirahi បាននិយាយបន្ថែមថា សមាជិកនាវិក ៧ នាក់ដែលមានសញ្ជាតិផ្សេងៗ ត្រូវបានគេឃុំខ្លួន ។
បន្ទាប់ពីធ្វើការសម្របសម្រួលជាមួយពួកមន្ត្រីតុលាការ អ៊ីរ៉ង់មកប្រេងរបស់នាវានេះ ត្រូវបានគេប្រគល់ទៅឱ្យក្រុមហ៊ុនចែកចាយផលិតផលប្រេងអ៊ីរ៉ង់ថ្នាក់ជាតិនៅក្នុង ខេត្ត Bushehr ។
IRGC បានប្រកាសថា ខ្លួននឹងមិនរារែកដើម្បីការពារផលប្រយោជន៍របស់ប្រទេសនេះ នៅក្នុងឈូងសមុទ្រពែកឡើយ ។
ប្រភព ស៊ីនហួ
បកប្រែដោយ៖ លោក ប៉ិនមឿន
