មហោស្រពតន្ត្រី និងចម្រៀងកុមារ ពានរង្វាន់ក្រសួង ព័ត៌មាន លើកទី៨ ឆ្នាំ ២០១៩ បានឈានមកដល់វគ្គផ្តាច់ព្រ័ត្រ និងការប្រកាសជ័យលាភី ម្ចាស់ពានរង្វាន់ហើយ កាលព្រឹកថ្ងៃទី០៤ ខែ សីហានេះ នាសាលមហោស្រពចតុមុខ ក្រោមវត្តមានអញ្ជើញជាអធិបតី ឯឧ ខៀវ កាញារីទ្ធ រដ្ឋមន្ត្រី ក្រសួងព័ត៌មាន និងលោកជំទាវ ទេព រង្ស៊ី ខៀវ កាញារីទ្ធ។
មហោស្រពតន្ត្រី និងចម្រៀងកុមារនេះ រៀបចំឡើងដោយក្រុមប្រឹក្សាជាតិកម្ពុជាដើម្បីកុមារ សហការគ្នារវាង ក្រសួង ព័ត៌មាន ជាមួយនឹងក្រសួង អប់រំ យុវជន និងកីឡា និងក្រសួង វប្បធម៌ និង វិចិត្រសិល្បៈ។ កម្មវិធីនេះ បង្កើតឡើងក្នុងគោលបំណង ផ្សារភ្ជាប់ ការសិក្សាអប់រំ ជាមួយនឹងសិល្បៈដែលជាចំណីសតិអារម្មណ៍បណ្តុះឲ្យកុមារចេះស្រឡាញ់ វប្បធម៌ ប្រពៃណី ទំនៀម ទម្លាប់ សាសនា អក្សរសាស្ត្រជាតិ ខ្មែរទាំងការសរសេរ ការអាន ឱ្យច្បាស់ តួអក្សរ និងព្យញ្ជនៈ បទចម្រៀងមាន អត្ថន័យ ស្របតាម វ័យ របស់កុមារ ប្រកប ដោយគុណធម៌ គុណភាព សុជីវធម៌ សីលធម៌សង្គម ។
ក្នុងឱកាសបិទកម្មវិធីនាពេលនោះ ឯ ឧ រដ្ឋមន្ត្រី ខៀវ កាញារីទ្ធ បានគួសបញ្ជាក់ថាមហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មានឆ្នាំ២០១៩ បានឈានមកដល់ថ្ងៃបញ្ចប់ដោយជោគជ័យ។ ឯ ឧ រដ្ឋមន្ត្រី មានជំនឿថា គំនិត និងស្នាដៃរបស់មាតា បិតា លោកគ្រូ អ្នកគ្រូ រួមជាមួយក្មួយៗកុមារ ទាំងអស់ នៅក្នុងឆ្នាំនេះ បានក្លាយទៅជាបុព្វហេតុកុមារខ្លួនឯងផ្ទាល់ និងទទួលបាននូវការអភិវឌ្ឍកាន់តែប្រសើរជាងនេះ សម្រាប់មហោស្រពតន្ត្រី និងចម្រៀងកុមារ ថ្នាក់ជាតិឆ្នាំ២០២០ ខាងមុខទៀត។ ឯ ឧ បានបញ្ជាក់ដែរថា ក្រសួង ព័ត៌មាន ដែលមានប្រព័ន្ធផ្សព្វផ្សាយ និងក្រុមការងារដើម្បីកុមារជាសេនាធិការ នឹងខិតខំបង្កើនការផលិតនូវកម្មវិធីល្អៗ គ្រប់រូបភាព ប្រកបដោយភាពទាក់ទាញ ឲ្យកាន់ តែច្រើនដើម្បីអប់រំកុមារ ឲ្យប្រព្រឹត្តិអំពើល្អ និងលើកកម្ពស់ការយល់ដឹង របស់ប្រជាពលរដ្ឋ អំពីតម្លៃរបស់កុមារ និងអំពីបញ្ហាប្រឈមនានារបស់កុមារ។ សម្រាប់មហោស្រព ចម្រៀងនិងតន្ត្រី កុមារនេះ ឯ ឧ នឹងណែនាំដល់ទូរទស្សន៍ជាតិកម្ពុជា ធ្វើការផ្សាយបន្តផ្ទាល់តែម្តង ដើម្បីអាចឲ្យអ្នកនៅគេហដ្ឋាន និងទីកន្លែងផ្សេង ដែលមិនបានមកចូលរួម ក៏អាចមើលឃើញដែរ។
ឆ្លៀតក្នុងឱកាសនោះ ឯ ឧ ខៀវ កាញារីទ្ធ បានផ្តាំផ្ញើដល់ ក្មួយៗកុមារទាំងអស់ ខិតខំកសាងខ្លួន សិក្សារៀនសូត្រ ដើម្បីក្លាយជាកូនល្អ សិស្សល្អ មិត្តល្អ និង ពលរដ្ឋល្អ ដែលជាធនធានដ៏សំខាន់ក្នុងការរួម ចំណែកអភិវឌ្ឍន៍
ប្រទេសជាតិ។ ទន្ទឹមនេះក៏សូមអរគុណចំពោះដល់គ្រប់ផ្នែកពាក់ពន្ធ័ទាំងអស់ ដែលបាន រួមគ្នារៀបចំកម្មវិធីនេះ ឲ្យ ប្រព្រឹត្តទៅយ៉ាងរលូន និងទទួលបានជោគជ័យ ជាពិសេសបានរួមគិត រួមធ្វើ ជាមួយគ្នា ដើម្បីបុព្វហេតុជាតិ និងគុណប្រយោជន៍កុមារកម្ពុជា តាមរយៈការបង្កើត ស្នាដៃនិពន្ធបទ ភ្លេង និងទំនុកច្រៀងសម្រាប់កុមារដោយឈរលើ គោលការ ងាយចេះ ងាយចាំ។
គួរបញ្ជាក់ដែរថា ក្រុមកុមារដែលមកចូលរួម ប្រឡងនាឱកាសឆ្នាំនេះ មាន ចំនួន ៣៩ ក្រុម ហើយមានទំនុកច្រៀង ចំនួន ៨០ អត្ថបទ ដែលមានអត្ថរូប អត្ថន័យ អត្ថរសល្អៗ និងជាសារផ្តល់ការអប់រំ ចំណេះដឹង យ៉ាងទូលំទូលាយ គ្របដណ្តប់ទៅលើសិលធម៏ អត្ថចរិក របស់កុមារ ។ ជាលទ្ធផល សម្រាប់ម្ចាស់ជ័យលាភី លេខ ១ មហោស្រពតន្ត្រី និង ចម្រៀងកុមារ ពានរង្វាន់ក្រសួង ព័ត៌មាន ឆ្នាំ ២០១៩ បានទៅលើក្រុមកុមារ មក ពីសាលា បឋមសិក្សាទួលគោក ដោយទទួលបានពាន ១ និងថវិកា ២០០០ដុល្លារ សម្រាប់លេខ ២ បានទៅលើក្រុមកុមារ មកពីសាលាបឋមសិក្សា វត្តកោះ ក្រុម ២ ទទួលបាន ពាន ១ និងថវិកា ១៥០០ ដុល្លារ និងលេខ ៣ បានទៅលើក្រុម កុមារ មកពីសាលាបឋមសិក្សាព្រះនរោត្តម ក្រុម ១ ទទួលបាន ១០០០ដុល្លារ និងពាន ១។ សម្រាប់ក្រុមជាប់លេខ ៤ សាលាបឋនសិក្សា ជ្រោយចង្វា និង លេខ ៥ សាលា បឋសិក្សាកុយតឹប ដោយក្នុង ១ក្រុម ទទួលបានថវិកា ២៥០ ដុល្លារ៕
អត្ថបទ និង រូបភាព ៖ ក្រសួងព័ត៌មាន
