ការដ្ឋានសាងសង់ផ្លូវផ្លូវក្រាលកៅស៊ូ តភ្ជាប់ពីផ្លូវជាតិលេខ៦៨ ស្ថិតនៅឃុំជន្លាស់ដៃ ស្រុកក្រឡាញ់ ខេត្តសៀមរាប ប្រវែងជាង ១១ គីឡូម៉ែត្រ បានបើកជាផ្លូវការហើយ កាលពីថ្ងៃទី០៣ ខែសីហា នេះ ក្រោមអធិបតីភាព ឯកឧត្តម ឧកញ៉ា សៀង ណាំ តំណាងរាស្ត្រមណ្ឌលសៀមរាប និងជាប្រធានក្រុមការងារថ្នាក់ខេត្ត ចុះជួយស្រុកក្រឡាញ់ ។
កំណាត់ផ្លូវក្រាលកៅស៊ូនេះ ត្រូវបានសាងសង់លើផ្លូវគ្រួសក្រហមចាស់តូចចង្អៀត និងខូចខាតធ្ងន់ធ្ងរប្រវែងជាង ១១គីឡូម៉ែត្រ ដែលផ្លូវគ្រួសក្រហមនេះជាគម្រោងរបស់ក្រសួងអភិវឌ្ឍជនបទ កាលពីឆ្នាំ២០០០។ ផ្លូវនេះដែរ បានតភ្ជាប់ពីផ្លូវជាតិលេខ៦៨ ចេញពីភូមិជន្លាស់ដៃ ឆ្ពោះទៅភូមិគោកត្រុំ ត្រង់ចំណុចផ្លូវជាតិលេខ ៦ ( គីឡូម៉ែត្រលេខ៣៥៩ ) ឆ្លងកាត់៤ភូមិ រួមមាន ភូមិត្រាំកង់ ភូមិឈូករត្នន៍ ភូមិរុន និង ភូមិខ្នារជោ ដែលមានប្រជាពលរដ្ឋទទួលផលផ្ទាល់ពីផ្លូវនេះ ប្រមាណជិតមួយពាន់គ្រួសារ។ ការដ្ឋានស្ថាបនាផ្លូវជាថ្មីឡើងវិញនេះ ត្រូវបានអនុវត្តលើផ្លូវចាស់ដែលតូចចង្អៀត ស្ថិតក្នុងសភាពខូចខាតធ្ងន់ធ្ងរ ដែលជាគម្រោងរបស់ក្រសួងអភិវឌ្ឍជនបទឆ្នាំ២០០០។
មានប្រសាសន៍ក្នុងពិធីបើកការដ្ឋានស្ថិតក្នុងភូមិជន្លាស់ដៃ ឯកឧត្តម ឧកញ៉ា សៀង ណាំ បានបញ្ជាក់ថា ការស្ថាបនា ផ្លូវក្រាលកៅស៊ូនេះ គឺឆ្លើយតបតាមការសំណូមពររបស់ប្រជាពលរដ្ឋ និងអាជ្ញាធរមូលដ្ឋាន ដែលចង់បានផ្លូវកៅស៊ូដើម្បីងាយស្រួលក្នុងការធ្វើចរាចរណ៍ ក៏ដូចជាការដឹកទំនិញផ្សេងៗ សម្រាប់ដោះស្រាយជីវភាពប្រចាំថ្ងៃ។ ផ្លូវក្រាលកៅស៊ូនេះ ក៏ជាការផ្តល់ជូនប្រជាពលរដ្ឋស្រុកក្រឡាញ់ ពីសំណាក់សម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា។
ព័ត៌មានជាតិ ថ្មីៗ
ឯកឧត្តមបានបញ្ជាក់បន្ថែមថា បច្ចុប្បន្ននេះ សម្តេចអគ្គមហាសេនាបតីតេជោ ហ៊ុន សែន បានយកចិត្តទុកដាក់ខ្ពស់ចំពោះជីវភាពរស់នៅរបស់បងប្អូនប្រជាពលរដ្ឋ ដោយបានជំរុញការស្តារស្ថាបនា និងអភិវឌ្ឍន៍ហេដ្ឋាចរនាសម្ព័ន្ធគមនាគមន៏ដឹកជញ្ជូនគ្រប់ទីកន្លែង ទូទាំងប្រទេស គឺដើម្បីជំរុញសមាហរណកម្មផ្ទៃក្នុងជាតិ និងតំបន់សម្រាប់ ជំរុញការអភិវឌ្ឍន៏ប្រទេសលើគ្រប់វិស័យ និង លើកកម្ពស់ជីវភាពរស់នៅរបស់ប្រជាជនឲ្យកាន់តែមានភាពល្អប្រសើរជាលំដាប់។ ហេដ្ឋារចនាសម្ព័ន្ធទាំងអស់ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន ត្រូវបានរាប់បញ្ចូលជាសមិទ្ធផលសាធារណៈរបស់រដ្ឋទាំងអស់ ដូច្នេះអត្ថប្រយោជន៍របស់កំណាត់ផ្លូវតភ្ជាប់មួយនេះ មានតួនាទីយ៉ាងសំខាន់ និងជាសមិទ្ធផលថ្មីមួយទៀតក្នុង ចំណោមសមិទ្ធផលជាច្រើន ដែលរាជរដ្ឋាភិបាល បាននិងកំពុងអភិវឌ្ឍន៍នៅស្រុកក្រឡាញ់ ខេត្តសៀមរាប។
សូមជម្រាបថា ផ្លូវប្រវែងជាង ១១ គីឡូម៉ែត្រនេះ មានទទឹង ៨ ម៉ែត្រ ចំពោះការសាងសង់ក្នុងដំណាក់កាលដំបូងក្នុងឆ្នាំ២០១៩នេះ គឺមានប្រវែង៤គីឡូម៉ែត្រ ទទឹង ៦ ម៉ែត្រ និងស្ថាបនាជាផ្លូវចាក់ក្រាលកៅស៊ូពីរស្រទាប់ ឌីប៊ីអេសធី( DBST ) ។ ការស្ថាបនាផ្លូវក្រាលកៅស៊ូលើកំណាត់ផ្លូវនេះ នឹងត្រូវបានអនុវត្តបន្តនៅឆ្នាំបន្តបន្ទាប់ ដែល គ្រោងនឹងរួចរាល់១០០ភាគរយនៅក្នុងឆ្នាំ២០២១ ។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ៖ លោក សេង ផល្លី
