កីឡាករ កីឡាការិនីជាតិ និងអន្តរជាតិ ចំនួន៣,៥០០នាក់ បានមកចូលរួមទិវារត់ប្រណាំងម៉ារ៉ាតុនអន្តរជាតិចក្រភពខ្មែរលើកទី ៦ (Khmer Empire Marathon) ឆ្នាំ២០១៩ នាវេលាម៉ោង៤ព្រឹកស្រាងៗ ថ្ងៃទី០៤ ខែសីហានេះ នៅមុខប្រាសាទអង្គរវត្ត ខេត្តសៀមរាប ។
គណៈកម្មាធិការជាតិអូឡាំពិកកម្ពុជា បានឱ្យដឹងថា គោលបំណងនៃទិវារត់ប្រណាំងម៉ារ៉ាតុននាពេលនេះ ផ្ដោតសំខាន់លើការផ្សព្វផ្សាយ និងទាក់ទាញភ្ញៀវទេសចរ ក្នុងរដូវធ្លាក់ភ្លៀវ ហើយក៏ផ្សារភ្ជាប់នូវសកម្មភាព មនុស្សធម៌ ក្នុងការស្វែងរកថវិកាជួយដល់មន្ទីរពេទ្យកុមារ កិច្ចការសង្គម មនុស្សធម៌នានា ជាពិសេសគឺបន្ថែមគោលបំណងថ្មីមួយ គឺចាប់ពីឆ្នាំ២០១៩នេះតទៅ ទិវារត់ប្រណាំងម៉ារ៉ាតុន ក៏ដូចជាពាក់កណ្តាលម៉ារ៉ាតុង នៅកម្ពុជាទាំងអស់ គឺដើម្បីអបអរសាទរការរត់ឆ្ពោះទៅកាន់ស៊ីហ្គេមលើកទី៣២ នាឆ្នាំ២០២៣ ដែលព្រះរាជាណាចក្រកម្ពុជា ទទួលបានសិទ្ធិធ្វើជាម្ចាស់ផ្ទះ។
អត្តពលិក ចំនួន៣,៥០០នាក់ ក្នុងនោះជនបរទេសចំនួន ១,៥៨៤នាក់ បានមកពី៥០ប្រទេស ដោយចំនួននេះបានកើនឡើង ១៥% បើប្រៀបធៀបទៅនឹងព្រឹត្តិការណ៍ដូចគ្នា កាលពីឆ្នាំ២០១៨ កន្លងទៅ។ ក្នុងព្រឹត្តិការណ៍នេះ អ្នករត់ជាជនជាតិចិនមានចំនួនច្រើនជាងគេ ដោយឈរនៅលំដាប់ទី១ ជនជាតិវៀតណាម ទី២ និងជនជាតិជប៉ុន ឈរនៅលំដាប់ទី៣ ខណៈជនជាតិកម្ពុជា មានចំនួន ១,៩១៦នាក់ ក៏មានចំនួនកើនឡើង១០%ផងដែរ។
ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) បានអះអាងថា ចំពោះការផ្តល់នូវចំណាត់ថ្នាក់ជ័យលាភីនោះ គឺមានភាពយុត្តិធម៌បំផុត ដោយគណៈកម្មការធ្វើតាមបច្ចេកវិទ្យាទំនើប តាមម៉ាស៊ីនស្វ័យប្រវត្តិ ដោយមានភ្ជាប់បន្ទះឈីប (Chip) បំពាក់នៅលើស្បែកជើងរបស់អត្តពលិកទាំងអស់ នៅពេលចេញដំណើរ និងមកដល់ទី ពោលគឺផ្ទៀងផ្ទាត់ដោយម៉ាស៊ីនស្វ័យប្រវត្តិ ឥតមានល្អៀងឡើយ។
ចំពោះការរៀបចំការតាមដានដោយបច្ចេកវិទ្យាទំនើបនេះ កីឡាករដែលបានចូលរួមនាពេលនោះ លោក ទ្រីស្យ៊ែន ជនជាតិ រ៉ូម៉ានី និងបានទៅរស់នៅសហរដ្ឋអាមេរិក បានបង្ហាញនូវការភ្ញាក់ផ្អើលយ៉ាងខ្លាំងពីការរីកចម្រើនយ៉ាងខ្លាំងរបស់កម្ពុជា ហើយថែមទាំងស្ញើចសរសើរ ដល់គណៈកម្មការរៀបចំទិវាម៉ារ៉ាតុនកម្ពុជាផងដែរ។
ដោយឡែក ចំពោះវិញ្ញាសាដែលដាក់ឲ្យប្រកួត រួមមាន៖ រត់ចម្ងាយ ៤២គីឡូម៉ែត្របុរស-នារី ដែលត្រូវចេញដំណើរមុនគេ នាវេលាម៉ោង៤ទៀបភ្លឺ, វិញ្ញាសារត់ចម្ងាយ២១គីឡូម៉ែត្របុរស-នារី, ១០គីឡូម៉ែត្របុរស-នារី និងវិញ្ញាសារត់កម្សាន្ដលក្ខណៈគ្រួសារ៣គីឡូម៉ែត្រ ទីតាំងចេញដំណើរ និងដល់ទីព្រ័ត្រ គឺនៅមុខប្រាសាទអង្គរវត្ត។
លទ្ធផលជ័យលាភី វិញ្ញាសារត់ចម្ងាយ៤២គីឡូម៉ែត្រផ្នែកនារី ចំណាត់ថ្នាក់លេខ១បានទៅលើកីឡាការិនីចិន (SHN Hong Xia), លេខ២ កីឡាការិនីជប៉ុន (Yamamoto Mari) និងលេខ៣ កីឡាការិនីជប៉ុន (Yamamoto Eri)។ ចំពោះចំងាយ ៤២គីឡូម៉ែត្រ ផ្នែកបុរសលេខ១ បានទៅលើកីឡាករកម្ពុជា (Takizaki Kuniaki), លេខ២ កីឡាការិនីជប៉ុន (Yoneda Michiyo) និងលេខ៣ កីឡាករ អាមេរិក (Gruber Tim)។
ដៅយឡែក លទ្ធផលរត់ចម្ងាយ២១គីឡូម៉ែត្រ ផ្នែកនារី ជ័យលាភីបានទៅលើកីឡាការិនីជប៉ុនទាំងអស់ (លេខ១កីឡាការិនី Tanimara Yuko។ លេខ២ កីឡាការិនី SASAKI Natsuke និងលេខ៣ កីឡាការិនី Mashita Mieko) ខណៈផ្នែកបុរសលេខ១ បានទៅលើកីឡាករជប៉ុន (Yamauchi Daisuke) លេខ២បានទៅលើកីឡាករកម្ពុជា (ម៉ា វីរ៉ូ) និងលេខ៣ កីឡាករអង់គ្លេស (David George)។
លទ្ធផលរត់ចម្ងាយ១០គីឡូម៉ែត្រផ្នែកនារីលេខ១ បានទៅលើកីឡាការិនីសហរដ្ធអាមេរិក (Gernin Michlle) លេខ២ បានទៅលើកីឡាការិនីជប៉ុន (Konishi Mosako) និងលេខ៣ បានទៅលើកីឡាការិនីអង់គ្លេស (Vogel Sophie)។ ផ្នែកបុរស លេខ១បានទៅលើកីឡាករកម្ពុជា (ឡៃ តេរ៉ង់) លេខ២ បានទៅលើកីឡាករកម្ពុជា (វ៉ាន់ ភារ៉ា) និងលេខ៣បានទៅលើកីឡាករសហរដ្ធអាមេរិក (Vishnevsky Mark)៕
អត្ថបទ និង រូបភាព ៖ លោក ឃុត សៅ និងមន្ត្រីមន្ទីរព័ត៌មាន
កែសម្រួល៖ លោក សេង ផល្លី
