ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី១ ខែសីហា ឆ្នាំ២០១៩នេះថា ព័ន្ធផ្សព្វផ្សាយក្នុងស្រុករាយការណ៍ ឲ្យដឹងកាលពីថ្ងៃពុធថា ភ្លៀងមូសុងយ៉ាងខ្លាំងបានបំផ្លាញទីក្រុងកំពង់ផែ ការ៉ាជី ដែលស្ថិតនៅភាគខាងត្បូង នៃប្រទេសប៉ាគីស្ថាន ដោយបានសម្លាប់ មនុស្ស២០នាក់ និងបង្កឲ្យរបួសជាច្រើននាក់ ក្នុងរយៈពេល៣ថ្ងៃ ចុងក្រោយនេះ ។
ប្រព័ន្ធផ្សព្វផ្សាយ ក្នុងតំបន់បានរាយការណ៍ថា ភ្លៀងបានចាប់ផ្តើមបោកបក់ មកលើទីប្រជុំជននៃខេត្ត Sindh ដែលស្ថិតនៅភាគខាងត្បូងប្រទេសកាលពីថ្ងៃច័ន្ទ ហើយភ្លៀងបានបន្តរហូតដល់ថ្ងៃពុធ ដែលធ្វើឱ្យសកម្មភាពសង្គម និងសេដ្ឋកិច្ចនៅតំបន់ផ្សេងៗនៃទីក្រុងនានាថយខ្សោយ ។
អ្នកស្លាប់ភាគច្រើនបានកើតឡើង ដោយសារតែការឆ្លងចរន្តអគ្គិសនី គ្រោះថ្នាក់ចរាចរណ៍ និងឧប្បត្តិហេតុបាក់ដំបូល។ អាជ្ញាធរក្រុងក៏បានប្រកាសថា អគារដែលទ្រុឌទ្រោមមួយចំនួនមានគ្រោះថ្នាក់ ដោយស្នើឱ្យអ្នកស្រុកចាកចេញ ព្រោះអគារទាំងនោះអាចនឹងដួលរលំដោយសារភ្លៀងធ្លាក់ខ្លាំង។
ទឹកភ្លៀងបានជន់លិចតំបន់ទំនាបមួយចំនួន និងផ្ទះលិចទឹក ផ្សារ និងផ្លូវនានារងការរំខានដល់ផ្លូវថ្នល់ ផ្លូវដែកនិងចរាចរណ៍ផ្លូវអាកាស ។ នៅពេលដែលស្ថានភាពបានផុត ពីការគ្រប់គ្រងរបស់អាជ្ញាធរក្រុងរដ្ឋបាលខេត្ត ត្រូវស្វែងរកជំនួយពីយោធា ដើម្បីចូលរួមក្នុងប្រតិបត្តិការជួយសង្គ្រោះ ៕
ប្រភព៖ដើមអំពិល
ប្រែសម្រួលដោយ៖ ម៉ៅ បុប្ផាមករា
