លោក ហែន ពុទ្ធី នាយករងរដ្ឋបាល សាលាខេត្តសៀមរាប បានមានប្រសាសន៍ថា ប្រជាពលរដ្ឋនៅភូមិធ្លកអណ្តូង សង្កាត់ស្លក្រាម ក្រុងខេត្តសៀមរាប ដែលបានធ្វើការតវ៉ាសុំឲ្យចេញប័ណ្ណកម្មសិទ្ធិដីធី្ល ហើយពុំទាន់ទទួលប័ណ្ណកម្មសិទ្ធិនៃការដោះស្រាយតាមរយៈអនុក្រឹត្យលេខ ១៥៨ គឺដោយសារប្រជាពលរដ្ឋពុំមានឯកសារគ្រប់គ្រាន់ ឬគ្មាន ខណៈដែលការចេញប័ណ្ណកន្លងមកនោះ គឺចំពោះដីទាំងឡាយណា ដែលមានឯកសារគ្រប់គ្រាន់ និងពុំពាក់ព័ន្ធនឹងទំនាស់ ប៉ុន្តែរដ្ឋបាលខេត្ត មិនទុកចោលចំពោះសំណូមពរ ឬការលំបាករបស់ប្រជាពលរដ្ឋណាឡើយ ហើយត្រូវដោះស្រាយនៅពេលក្រោយ ។
លោក ហែន ពុទ្ធី បញ្ជាក់ទៀតថា បញ្ហាដែលស្មុគស្មាញដូចជា តំបន់ដីដែលស្ទួន នៃសមត្ថកិច្ចចេញក្នុងការបញ្ជាក់លើការផ្ទេរកម្មសិទ្ធិ , ប្រជាពលរដ្ឋកាន់កាប់ពុំមានឯកសារគ្រប់គ្រាន់ ដោយពុំមានការបញ្ជាក់ ឬការដឹងឮពីអាជ្ញាធរជាដើម ដោយមានតែឯកសារទិញលក់តែពីរភាគី ពីព្រោះថា អាចមានជម្លោះកាន់ច្រើនឡើង ហើយមិនអាចដោះស្រាយបាន ចំពោះការចេញប្លង់ជារួមតែម្តង ដូច្នេះការចុះវាស់វែង ឬការចេញប្លង់ ចំពោះដីពុំមានឯកសារគ្រប់គ្រាន់ គឺជាហានិភ័យ និងការពិនិត្យលក្ខណៈបច្ចេកទេសពុំគ្រប់ជ្រុងជ្រោយ នាំឲ្យការដោះស្រាយ អាចបង្កការរងគ្រោះ ចំពោះអ្នកកាន់កាប់ពិតប្រាកដ ។
លោក ហែន ពុទ្ធី បានបញ្ជាក់បន្ថែមទៀតថា តាមរយៈការយកចិត្តទុកដាក់របស់អាជ្ញាធរខេត្ត ដឹកនាំដោយ ឯកឧត្តម បណ្ឌិត ឃឹម ប៊ុនសុង អភិបាលខេត្ត បានលើកសំណើជូនសម្តេចតេជោប្រមុខរាជរដ្ឋាភិបាល ជួយដោះស្រាយចំពោះបងប្អូនប្រជាពលរដ្ឋរស់នៅក្នុងតំបន់រមណីយដ្ឋានវប្បធម៌ និងទេសចរណ៍ តាមរយៈអនុក្រឹត្យលេខ ១៥៩ អនុក្រឹត្យលេខ ៥១ និងអនុក្រឹត្យលេខ ៥២ ហើយក្រោយពេលទទួលបានអនុក្រឹត្យរបស់រាជរដ្ឋាភិបាល ក្រុមការងារបានអនុវត្តអនុក្រឹត្យនេះ ដោយយកចិត្តទុកដាក់យ៉ាងសស្រាក់សស្រាំ ទើបបានជាខេត្តបានចេញប័ណ្ណកម្មសិទ្ធិសម្គាល់ម្ចាស់អចនវត្ថុមួយចំនួន នៃការដោះស្រាយ លើអនុក្រឹត្យទាំងបីខាងលើនេះ ហើយការចុះវាស់វែងជាក់ស្តែង ក្នុងការដោះស្រាយចេញប្លង់កន្លងមក គឺបានធ្វើចំពោះតំបន់បានដោះស្រាយពុំមានការស្មុគស្មាញ ។
លោក ហែន ពុទ្ធី បញ្ជាក់បន្ថែមទៀតថា តាមរយៈនៃការដោះស្រាយអនុក្រឹត្យទាំងបីខាងលើនេះ មានករណីពាក្យបណ្តឹងតវ៉ារវាងប្រជាពលរដ្ឋ និងប្រជាពលរដ្ឋគ្នាឯង ដែលមិនពាក់ព័ន្ធនឹងអាជ្ញាធរ ចំនួន ៣២០បណ្តឹង ប៉ុន្តែអាជ្ញាធរខេត្ត នៅតែបន្តសម្របសម្រួល និងដោះស្រាយជាប្រចាំជូនបងប្អូន ។
លោក ហែន ពុទ្ធី មានប្រសាសន៍បែបនេះ ក្នុងឱកាសអញ្ជើញបងប្អូនប្រជាពលរដ្ឋ ទាំង៥៩គ្រួសារ ដែលចូលរួមតវ៉ាជាមួយម្ចាស់ ផេក សាន ប៊ុនធឿន លើករណីតវ៉ាសុំចេញប័ណ្ណកម្មសិទ្ធិសម្គាល់ម្ចាស់អចលនវត្ថុ(ប្លង់រឹង) នៅភូមិធ្លកអណ្តូង សង្កាត់ស្លក្រាម ក្រុងសៀមរាប មកជួបសំណេះសំណាល និងដោះស្រាយបំភ្លឺ កាលពីព្រឹកថ្ងៃទី១២ ខែកញ្ញា ឆ្នាំ២០១៨នេះ ខណៈមានប្រជាពលរដ្ឋចំនួន ២៤នាក់ ប៉ុណ្ណោះដែលបានចូលរួមប្រជុំនៅសាលាខេត្តសៀមរាប ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
