លោក ពៅ ពិសិដ្ឋ អភិបាលរងខេត្តសៀមរាប បានមានប្រសាសន៍ថា ក្រោយថ្ងៃ៧មករា១៩៧៩ ប្រទេសកម្ពុជាឆ្លងផុតពីរបបប្រល័យពូជសាសន៍ ហើយខេត្តសៀមរាប បានខិតខំជំរុញនិងបង្កើនល្បឿនអភិវឌ្ឍលើហេដ្ឋារចនាសម្ព័ន្ឋនានា ដូចជាជាជួសជុលកែលំអផ្លូវ ជួសជុលកែលំអនិងស្តារឡើងវិញប្រព័ន្ឋលូបង្ហូរទឹកភ្លៀង ប្រព័ន្ឋបង្ហូរទឹកកខ្វក់ ។ល។ដោយប្រើប្រាស់តាមគំរោងប្លង់ចាស់សល់ពីសម័យបារាំង ហើយបច្ចុប្បន្ននេះ ក្នុងខេត្តយើងមានប្លង់គោល និងមានផែនការបែងចែកច្បាស់លាស់និងកំណត់គោលដៅធំៗដែលគ្រោងថា នឹងបង្កើតនូវមណ្ឌលពាណិជ្ជកម្ម មណ្ឌលកំសាន្ត ផ្សារទំនើប។ល។ តាមរយៈការចូលរួមពីបណ្តាដៃគូអភិវឌ្ឍនានា និងវិនិយោគិនជាតិ និងអន្តរជាតិ ។
លោក ពៅ ពិសិដ្ឋ មានប្រសាសន៍ទៀតថា បច្ចប្បន្នអាជ្ញាធរខេត្ត បាននឹងកំពុងអនុវត្តលើប្រព័ន្ឋបច្ចេកទេសជាមួយជប៉ុន នៃគម្រោងប្រព័ន្ឋទីក្រុងវ័យឆ្លាត តាមរយៈមូលនិធិគម្រោងរបស់ទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា ចាយកា ដោយបានបំពាក់អំពូលភ្លើង អ៊ិលអីឌី តាមដងផ្លូវសាធារណៈសំខាន់ៗក្នុងក្រុង ដែលប្រព័ន្ឋនេះចូលរួមកាត់បន្ថយការចំណាយថ្លៃភ្លើងដល់ទៅ៧០ភាគរយ រួមទាំងការបង្កើតរមណីយដ្ឋានកែច្នៃ ប្លែកៗ គួបផ្សំនឹងរមណីយដ្ឋានវប្បធម៌ ប្រវត្តិសាស្ត្រ និង រមណីយដ្ឋានធម្មជាតិដែលមានស្រាប់ ដើម្បីទាក់ទាញចំណាប់អារម្មណ៍របស់ភ្ញៀវទេសចរណ៍ ដែលបានចូលមកទស្សនាកំសាន្តក្នុងខេត្តសៀមរាប ឲ្យស្នាក់នៅក្នុងរយៈពេលយូរជាងមុន ។
លោក ពៅ ពិសិដ្ឋ បានមានប្រសាសន៍ដូច្នេះ ក្នុងឱកាសជួបសំណេះសំណាលជាមួយប្រតិភូនាវាយុវជនកម្ពុជាចំនួន៥០រូប ដឹកនាំដោយលោក ណៃ សេមណារត្ន័ នៅរដ្ឋបាលខេត្តសៀមរាប នាព្រឹកថ្ងៃទី១៤ ខែកញ្ញា ឆ្នាំ២០១៨ នេះ ក្នុងគោលបំណងផ្តល់ជាអនុសាសន៍ ពាក់ព័ន្ឋទៅនឹងសក្តានុពល ក៏ដូចជាដំណើរការអភិវឌ្ឍន៍លើហេដ្ឋារចនាសម្ព័ន្ឋរបស់ខេត្តសៀមរាប ដើម្បីប្រមូលជាគំនិតយោបល់សម្រាប់បង្ហាញដល់ក្រុមប្រតិភូនាវាយុវជនអាស៊ីអាគ្នេយ៍និងជប៉ុន ដែលគ្រោងធ្វើឡើងនៅទីក្រុងតូក្យូប្រទេសជប៉ុន ដោយមានយុវជនចូលរួមចំនួន៣៣០នាក់ ។
ក្នុងឱកាសនោះដែរ លោក ពៅ ពិសិដ្ឋ បានផ្តាំផ្ញើដល់នាវាយុវជនកម្ពុជា ពេលស្នាក់នៅនិងចូលរួមក្នុងវេទិកាកម្មវិធីនាវាយុវជនអាស៊ាននិងជប៉ុន ត្រូវបង្ហាញដល់ពួកគេ នូវអរិយធម៌ វប្បធម៌ ប្រវត្តិសាស្ត្រ សាសនា ប្រពៃណី ទំនៀមទម្លាប់រស់នៅរបស់ប្រជាជនកម្ពុជា ព្រមជាមួយស្នាមញញឹម រួសរាយ រាក់ទាក់ផងដែរ។
សូមបញ្ជាក់ថា ប្រតិភូនាវាយុវជននាវាអាស៊ីអាគ្នេយ៍កម្ពុជាចំនួន៥០រូប នឹងចូលរួមកម្មវិធីនាវាយុវជនអាស៊ីអាគ្នេយ៏ និង ជប៉ុនលើកទី៤៥ ឆ្នាំ២០១៨ រយៈពេល៥២ថ្ងៃ ពីថ្ងៃទី២៣ខែតុលា ដល់ថ្ងៃទី១២ខែធ្នូឆ្នាំ២០១៨ ដែលនឹងជួបជុំគ្នានៅទីក្រុងតូក្យូ រួចបន្តដំណើរតាមនាវាទេសចរណ៍មួយគ្រឿង ដែលមានឈ្មោះថា Nippon Maru ទៅកាន់ប្រទេសព្រុយណេ , ហ្វីលីពីន , ថៃ និង ប្រទេសវៀតណាម មានគោលបំណងសំខាន់ៗ របស់កម្មវីធីនេះ គឺដើម្បីពង្រឹកចំណងសាមគ្គីភាពរវាងអាស៊ាន និង ជប៉ុនតាមរយះយុវជន ដោយផ្តោតសំខាន់ទៅលើ ការប្រជុំពីភាក្សា ការសំដែង សិល្បៈ វប្បធម៌ និង ការធ្វើដំណើរ។
ក្នុងអំឡុងពេលពេលធ្វើដំណើរតាមនាវា យុវជនទាំងអស់នឹងត្រូវចូលរួមសកម្មភាពមួយចំនួនដូចជា ការពិភាក្សាជាក្រុមជាមួយប្រទេសទាំង ១១ ដោយលើកយកប្រធានបទផ្សេងៗដើម្បីយកមកបង្ហាញយុវជនដទៃ មានការសម្ដែងសិល្បៈរបស់ប្រទេសនីមួយៗ និង សកម្មភាពជាក្រុមមួយចំនួនទៀត រួមទាំងទៅទស្សនកិច្ចនោះតាមស្ថាប័នមួយចំនួនរបស់ប្រទេសនោះ ក៏ដូចជាទទួលបានបទពិសោធន៍នៃការស្នាក់នៅជាមួយគ្រួសាររបស់ប្រទេសនោះផ្ទាល់ផងដែរ ។
សមាគមនាវាយុវជនអាស៊ីអាគ្នេយ៍កម្ពុជា (SSEAYP International Cambodia (SIC)) ត្រូវបានបង្កើតឡើង នៅឆ្នាំ ២០០៤ ដោយមានការគំទ្រពីក្រសួងអប់រំយុវជននិងកីឡា ដើម្បីជាមជ្ឈមណ្ឌលទំនាក់ទំនងរបស់កម្មវិធីនេះប្រចាំកម្ពុជាផង និងមជ្ឈមណ្ឌលហ្វឹកហាត់បណ្តុះបណ្តាលប្រតិភូយុវជនមុនពេលចេញដំណើរផង ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
