សមត្ថកិច្ចជំនាញខេត្តសៀមរាប បានឲ្យដឹងថា នារសៀលថ្ងៃទី១៦ ខែកញ្ញា ឆ្នាំ២០១៨ម្សិលមិញនេះ បុរសម្នាក់ឈ្មោះ អ៊ួង ប៊ុនធឿន ភេទប្រុស ឆ្នាំកំណើត១៩៨០ មុខរបរជាបុគ្គលិកទូរទស្សន៍ប៉ុស្តិ៍លេខ៣ប្រចាំខេត្តសៀមរាប និងជាយោធា នៃកងពលតូចថ្មើរជើងលេខ៤១ មានទីលំនៅបច្ចុប្បន្នភូមិគោកធ្លក ឃុំកណ្ដែក ស្រុកប្រាសាទបាគង ខេត្ត សៀមរាប រួមដំណើរជាមួយឈ្មោះ សឹង គីម ភេទស្រី អាយុ២៥ឆ្នាំ មុខរបរលក់ដូរ មានទីលំនៅភូមិគោកគ្រើល ឃុំលាងដៃ ស្រុកអង្គរធំ ខេត្តសៀមរាប បានជិះឡានតាមបណ្ដោយផ្លូវកូរ៉េ មកពីភូមិគោកគ្រើល ឃុំលាងដៃ ក្នុងទិសដៅពីជើងទៅត្បូង កាត់តាមភូមិនគរក្រៅ សង្កាត់គោកចក ក្រុងសៀមរាប ។
សមត្ថកិច្ច បានឲ្យដឹងទៀតថា ពេលធ្វើដំណើរមកដល់ត្រង់ចំណុចក្រុមទី១៣ ភូមិនគរក្រៅ សង្កាត់គោកចក ក្រុងសៀមរាប ឈ្មោះ អ៊ួង ប៊ុនធឿន បានឈប់អែបឡានមកខាងស្ដាំដៃ ហើយឈ្មោះ សឹង គីម ក៏បានចុះពីទ្វារឡានខាងស្ដាំដៃចុះទៅក្រៀក ឈ្មោះ អ៊ួង ប៊ុនធឿន នៅទ្វារឡានខាងឆ្វេង ដោយស្រែកឲ្យអ្នកភូមិក្បែរផ្លូវជួយ ហើយក្រោយពីជួយក្រៀកមកដល់ត្រង់គ្រែអ្នកលក់ក្បែរផ្លូវចម្ងាយប្រហែល១៥ម៉ែត្រពីឡាន ឈ្មោះ អ៊ួង ប៊ុនធឿន មានអាការៈស្លេកស្លាំង ហត់ខ្លាំង ថប់ដើមទ្រូង និងក្រោយពីជួយធ្វើចលនាលើដើមទ្រូង ឈ្មោះ អ៊ួង ប៊ុនធឿន ក៏បានដាច់ដង្ហើមស្លាប់បាត់ទៅ ។
សមត្ថកិច្ច បានឲ្យដឹងទៀតថា ក្រោយពីធ្វើកោសល្យវិច័យរបស់សមត្ថកិច្ចជំនាញរួច បានបញ្ជាក់ថា ឈ្មោះ អ៊ួង ប៊ុនធឿននេះ បានស្លាប់ដោយសារខ្យល់គប្រាកដមែន ហើយសពនិងសម្ភារ ត្រូវបានប្រគល់ជូនគ្រួសារ យកទៅធ្វើបុណ្យតាមប្រពៃណី ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
