រយៈពេល ៦ខែដើមឆ្នាំ២០១៩នេះ កម្លាំងសមត្ថកិច្ចខេត្តសៀមរាបបានទប់ស្កាត់ និងបង្ក្រាបបទល្មើសគ្រឿងញៀន នៅ ទូទាងខេត្ត មានចំនួន ២៤២ករណី ធ្វើការឃាត់ខ្លួនជនសង្ស័យ បានចំនួន ៦៩០នាក់ ក្នុងនោះស្រី ៥០នាក់ រួមនិងវត្ថុតាងសរុបជិត ៨គីឡូក្រាម។ នេះបើតាមការបញ្ជាក់របស់ លោក ពៅ ពិសិដ្ឋ អភិបាលរងខេត្តសៀមរាប ក្នុងពិធីបើកវគ្គបណ្តុះបណ្តាលច្បាប់ ស្តីពីការត្រួតពិនិត្យគ្រឿងញៀន នាព្រឹកថ្ងៃទី ១៤ ខែ សីហា ឆ្នាំ២០១៩នេះ នៅសាលាខេត្តសៀមរាប។
លោក ពៅ ពិសិដ្ឋ បានបញ្ជាក់បន្ថែមថា ខេត្តសៀមរាបមិនមែនមូលដ្ឋាននៃការផលិតគ្រឿងញៀននោះទេ តែជាកន្លែងកំពុងទទួលរងឥទ្ធិពលនៃការធ្វើចរាចរណ៍គ្រឿងញៀនឆ្លងកាត់ទាំងក្នុង និង ក្រៅប្រទេស ដែលវាបាននិងកំពុងបង្កបញ្ហាស្មុគស្មាញជាច្រើន ដល់ការងារការពារសន្តិសុខ សុវត្ថិភាព សណ្តាប់ធ្នាប់ និង ការអភិវឌ្ឍ ក្នុងខេត្តសៀមរាប ក៏ដូចជាសង្គមជាតិទាំងមូលផងដែរ។ ក្នុងនោះ ជនរងគ្រោះ ដោយសារគ្រឿងញៀនត្រូវបញ្ជូនទៅអប់រំ ព្យាបាល និង ស្តារនីតិសម្បទា នៅមជ្ឈមណ្ឌលស្តារនីតិសម្បទាអ្នកញៀនគ្រឿងញៀន នៃស្នងការនគរបាលខេត្តសៀមរាប ក្នុងឆមាសទី ១ ឆ្នាំ២០១៩នេះ មានចំនួន៦៨០នាក់ ក្នុងនោះស្រី៣១នាក់ និង បានធ្វើសមាហរណកម្មទៅរស់នៅក្នុងសហគមន៍វិញបានចំនួន ៤៧០នាក់ ក្នុងនោះស្រី២៤នាក់។ ទន្ទឹមនឹងនោះ ក្រុមមន្ត្រីជំនាញ និងកម្លាំងសមត្ថកិច្ចខេត្ត ក៏បានធ្វើការផ្សព្វផ្សាយ អប់រំ អំពីខ្លឹមសារប្រយុទ្ធប្រឆាំងគ្រឿងញៀន សរុបបាន ១ពាន់៥០០លើក មានអ្នកចូលរួមជិត៨ម៉ឺននាក់ ក្នុងនោះស្ត្រី ជិត៥ម៉ឺននាក់ និង អនុវត្តន៍វិធានការរដ្ឋបាល ចំពោះអ្នកបើកបរយានយន្ត ចំនួន១៦លើក ស្មើ ៣៨៩នាក់ លទ្ធផលវិជ្ជមាន មាន៤២នាក់ និងបានបញ្ជូនទៅមជ្ឈមណ្ឌលស្តារនីតិសម្បទា អ្នកញៀនគ្រឿងញៀនខេត្តសៀមរាបផងដែរ ។
មានប្រសាសន៍ក្នុងឱកាសនោះ ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងថា គ្រឿង ញៀន គឺជាបញ្ហាសកល និង ជាឧក្រិដ្ឋកម្មឆ្លងដែន ដែលឈានទៅបង្កមហន្តរាយយ៉ាងធំធេងដល់ប្រជាពលរដ្ឋ គ្រួសារ សហគមន៍ និង សង្គមជាតិទាំងមូល ។ ដូច្នេះ វគ្គបណ្តុះបណ្តាលនាពេលនេះ នឹងផ្តល់ពុទ្ធិគន្លឹះជាដើមទុន និង ជាមូលដ្ឋានគ្រឹះដល់ថ្នាក់ដឹកនាំ និង មន្ត្រីអនុវត្តន៍ច្បាប់គ្រប់ជាន់ថ្នាក់នៅមូលដ្ឋាន ដើម្បីឈានទៅបន្តស្វែងយល់បន្ថែម លើច្បាប់ និង លិខិតគតិយុត្តនានាជាធរមាន ក៏ដូចជាការបង្កើនឆន្ទៈ និង ភាពម្ចាស់ការរបស់ថ្នាក់ដឹកនាំ ទាំងកម្រិតជំនាញ និង បច្ចេកទេស ក្នុងការអនុវត្តការងារប្រចាំថ្ងៃ និង ការកែទម្រង់ច្បាប់ ការអនុវត្តគោលនយោបាយ ភូមិឃុំមានសុវត្ថិ ភាព និង យុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាល ។ ឯកឧត្តមក៏មានសង្ឃឹមយ៉ាងមុតមាំថាវគ្គបណ្តុះបណ្តាល នេះ សិក្ខាកាមទាំងអស់និងបានធ្វើការពិភាក្សា និង ចែករំលែកបទពិសោធន៍ ដើម្បីប្រមូលផ្តុំពុទ្ធិថ្មីៗ នឹងទទួលបាននូវចំណេះដឹង បទពិសោធន៍ថ្មីៗ ដើម្បីយកទៅអនុវត្តតួនាទី ភារកិច្ចរបស់ខ្លួននៅតាមមូលដ្ឋានរបស់ខ្លួន ៕
អត្ថបទ និង រូបភាព ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
