កាលពីព្រឹកថ្ងៃទី១៨ ខែកញ្ញា ឆ្នាំ២០១៨ព្រឹកមិញនេះ សាខាកាកបាទក្រហមកម្ពុជាខេត្តសៀមរាប បានប្រារព្ធទិវាពិភពលោក នៃការសង្គ្រោះបឋម ក្រោមប្រធានបទ ការសង្គ្រោះបឋមពេលគ្រោះថ្នាក់ចរាចរណ៍តាមដងផ្លូវ នៅវិទ្យាល័យ ១០មករា១៩៧៩ ក្រោមអធិបតីភាពលោកជំទាវ គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្ត ដោយមានការអញ្ជើញចូលរួមពីសំណាក់ឯកឧត្តម លោកជំទាវជាសមាជិកគណៈកម្មាធិការសាខា កាកបាទក្រហមខេត្ត តំណាងនាយកដ្ឋានសុខភាពកាកបាទក្រហមកម្ពុជា តំណាងក្រុមហ៊ុន អ្នកស្ម័ត្រចិត្ត និង យុវជនកាកបាទក្រហម អាជ្ញាធរក្រុង សង្កាត់ ប្រជាពលរដ្ឋ និង សិស្សានុសិស្សប្រមាណជាង៣០០នាក់ចូលរួម ។
លោកជំទាវ គួយ ណាលីន ឃឹមប៊ុនសុង មានប្រសាសន៍ថា នៅក្នុងជីវិតរស់នៅ គឺតែងតែជួបប្រទះគ្រោះថ្នាក់ផ្សេងៗ ពិសេសគ្រោះថ្នាក់ចរាចរណ៍ ដូច្នេះទិវានេះ គឺជាការរំលឹក ការប្រមូលផ្តុំកម្លាំងទឹកចិត្តមនុស្សធម៌ជួយសង្គ្រោះគ្នា នៅពេលគ្រោះថ្នាក់ ព្រោះថាទស្សនៈនៃវិជ្ជាសង្គ្រោះបឋមនេះ បានផ្លាស់ប្តូរទាំងស្រុង ស្របតាមការវិវត្តន៍របស់សកលលោក ហើយវិជ្ជាសង្គ្រោះបឋម តែងផ្សាភ្ជាប់ជាមួយបញ្ហាឯទៀត ដោយពាក់ព័ន្ធនិងសុខភាព និង ការថែទាំសុខភាព ដូច្នេះវិជ្ជាសង្គ្រោះបឋម គឺជាចំណេះដឹង ឬ វិជ្ជាមួយសង្គ្រោះជនរងគ្រោះ ដែលរងរបួស មានជម្ងឺ ដោយមូលហេតុផ្សេងៗ មុនពេលគ្រូពេទ្យមកដល់ ឬ មុនមុននឹងបញ្ជូនទៅកាន់មន្ទីរពេទ្យ ។
លោកជំទាវមានប្រសាសន៍ទៀតថា សកម្មភាពមនុស្សធម៌ជាចម្បងគេ គឺការសង្គ្រោះបឋម តាមរយៈចលនាអន្តរជាតិ កាកបាទក្រហម អឌ្ឍចន្ធក្រហម ដែលមានវត្តមាននៅលើភពផែនដីយើង មានរយៈកាលជាង១៥៩ឆ្នាំហើយ គិតតាំងពីលោក ហង់រី ឌុយណង់ ជនជាតិស្វីស ដែលជាស្ថាបនិកនៃចលនាកាកបាទក្រហម នៅក្នុងសមរភូមិសុលហ្វេរីណូ ភាគខាងជើងប្រទេសអ៊ីតាលី ក្នុងឆ្នាំ១៨៥៩ ដោយលោកបានប្រមូលផ្តុំកម្លាំងមនុស្សធម៌របស់អ្នកភូមិជិតៗ សមរភូមិ ជួយដល់ទាហានរបួស មានជម្ងឺ មិនរើសអើងពូជសាសន៍ ព្រោះថាសេវាកម្មពេទ្យកងទ័ពសម័យនោះ ពុំទាន់មានគ្រប់គ្រាន់ ដូច្នេះតាមរយៈនេះផង សូមអំពាវនាវដល់ប្រជាពលរដ្ឋ ដែលបានធ្វើចរាចរណ៍គ្រប់ប្រភេទ នៅតាមដងផ្លូវសាធា រណៈ ឲ្យមានស្មារតីលើកកម្ពស់នូវការប្រុងប្រយ័ត្ន និង គោរពច្បាប់ចរាចរណ៍ ព្រមទាំងឲ្យមានការយោគយល់គ្នា និង មានសុជីវធម៌ក្នុងការបើកបរ ដើម្បីឆ្ពោះទៅការបញ្ឈប់ ឬ កាត់បន្ថយនូវកាគ្រោះថ្នាក់ ។
លោក ស៊ុ សំអន នាយកប្រតិបត្តិសាខា បានបញ្ជាក់ថា ក្នុងការផ្តល់សេវាសង្គ្រោះបឋម មន្ត្រីអ្នកស្ម័ត្រចិត្ត និង យុវជនកាកបាទក្រហមកម្ពុជាក្នុងខេត្ត បានចូលរួមសង្គ្រោះបឋមដល់ជនរងគ្រោះ មានចំនួន១៥១ករណី មានជនរងគ្រោះ ១៥១នាក់ ក្នុងនោះស្រី៦៥នាក់ ដែលរបួសស្រាលចំនួន៦៥ករណី , របួសធ្ងន់៣៨ករណី និង គ្រោះថ្នាក់ផ្សេងៗ មានសន្លប់ ស្លាក់ លង់ទឹក ឆ្កែខាំ ប្រកាច់ និងពស់ចឹក ចំនួន ៤៨ករណី និងបានដឹកជញ្ជូនជនរងគ្រោះទៅសង្គ្រោះចំនួន២៩នាក់ ។
សូមបញ្ជាក់ថា បច្ចុប្បន្ននេះ នៅក្នុងខេត្តសៀមរាប មានអ្នកស្ម័គ្រចិត្តកាកបាទក្រហមកម្ពុជា ចំនួន១.៨១៧នាក់ , យុវជនកាកបាទក្រហម មាន១.២៦២នាក់ ដែលបាននឹងកំពុងអនុវត្តភារកិច្ចដ៏ឧត្តមនេះ ៕
អត្ថបទ និង រូបថត ៖ លោក ទ្រា ពន្លឺ និង លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
