អណ្តូងទឹកស្នប់អាហ្វ្រីដេស៍ ចំនួន២កន្លែង ដែលជាអំណោយរបស់សាខាកាកបាទក្រហមកម្ពុជាខេត្តសៀមរាប ត្រូវបានប្រគល់ជូនសហគមន៍ភូមិកន្សែងលើ និង ភូមិតាតោកកើត ក្នុងឃុំចាន់សរ ស្រុកសូទ្រនិគម កាលពីព្រឹកថ្ងៃទី១៩ ខែកញ្ញា ឆ្នាំ២០១៨ ក្រោមវត្តមានរបស់លោកជំទាវ គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្ត ។
លោកជំទាវ គួយ ណាលីន ឃឹម ប៊ុនសុង មានប្រសសន៍ថា បញ្ហាសុខភាព គឺជាកត្តាចម្បងសម្រាប់មនុស្សយើងគ្រប់រូប ដូច្នេះបញ្ហាទឹកស្អាត ក៏ជាកត្តាដ៏ចាំបាច់សម្រាប់មនុស្សជាតិយើងគ្រប់រូប ក្នុងការរស់នៅប្រចាំថ្ងៃ ដើម្បីបរិភោគប្រើប្រាស់ជាអចិន្ត្រៃយ៍ ទឹក គឺជាថាមពលចិញ្ចឹមសរីរាង្គកាយមនុស្ស សត្វ និង រុក្ខជាតិ ដូច្នេះតាមរយៈអណ្តូងទឹកទាំងពីរនេះ ជាសមទ្ធិផលថ្មីមួយបន្ថែមទៀត សម្រាប់បងប្អូនប្រជាពលរដ្ឋនៅភូមិកន្សែងលើ និង ភូមិតាតោកកើត បានប្រើប្រាស់គ្រប់ៗគ្នា ដែលមិនបានចោទជាបញ្ហា ការកង្វះខាតទឹកប្រើប្រាស់ទៀតឡើយ ទាំងរដូវប្រាំង និង វស្សា ព្រមទាំងធ្វើការដាំដុះដំណាំរួមផ្សំផងដែរ ។
ក្នុងឱកាសនោះដែរ លោកជំទាវ គួយ ណាលីន ឃឹម ប៊ុនសុង បានសម្ដែងនូវអំណរគុណ ចំពោះការជួយឧបត្ថម្ភរបស់សប្បុរសជនចិន ឈ្មោះ អ៊ុយ ស៊ូគុជ ដែលបានផ្តល់អណ្តូងទឹកទាំងពីរនេះ ដល់ប្រជាជនក្នុងឃុំចាន់សរ ស្រុកសូទ្រនិគម ដែលសរបញ្ជាក់នូវទឹកចិត្តដ៏សប្បុរសធម៌ ដើម្បីរួមចំណែកជាមួយរាជរដ្ឋាភិបាលកម្ពុជា ក្នុងកាត់បន្ថយភាពក្រីក្ររបស់ប្រជាពលរដ្ឋ តាមរយៈការធ្វើឲ្យប្រសើរឡើងលើវិស័យប្រើប្រាស់ទឹកស្អាត និង ដើម្បីសុខុមាលភាពរបស់ប្រជាពលរដ្ឋ ក្រោមទិសស្លោក ទឹកជាប្រភពនៃជីវិត ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
