ក្រសួងសុខាភិបាល បានបើកវគ្គបណ្តុះបណ្តាលមួយ មានរយៈពេល៤ថ្ងៃ គឺចាប់ពីថ្ងៃទី២០ដល់ថ្ងៃទី២៣ ខែសីហា ឆ្នាំ២០១៩នេះ ស្តីពីអធិការកិច្ចសុវត្ថិភាពចំណីអាហារនៅកន្លែងប្រើប្រាស់ចុងក្រោយ នៅក្រុងសៀមរាប ដោយផ្អែកតាមកម្រិតហានិភ័យ ដែលបានរៀបចំដោយការិយាល័យសុវត្ថិភាពចំណីអាហារ នៃនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាងរបស់ក្រសួងសុខាភិបាល ក្នុងគោលបំណងដើម្បីការពារថែទាំ សុខភាពរបស់ប្រជាជនទូទាំងប្រទេស ក៏ដូចជាភ្ញៀវទេសចរណ៍អន្ដរជាតិដែលបាន និងកំពុងមកទស្សនាទឹកដីនៃខេត្តសៀមរាប ។
មានប្រសាសន៍បើកវគ្គបណ្ដុះបណ្ដាលនេះ ឯកឧត្ដមបណ្ឌិត អឿន បូរារ័ត្នន៍ រដ្ឋលេខាធិការក្រសួងសុខាភិបាល បានបញ្ជាក់ថា ដោយកត្តាប្រទេសជាតិមានសុខសន្ដិភាព និងការអភិវឌ្ឍរីកចម្រើនលើគ្រប់វិស័យ ប្រជាពលរដ្ឋកម្ពុជាមានជីវភាពធូរធារ ធ្វើឲ្យគាត់មានលទ្ធភាពក្នុងការចេញទៅបរិភោគអាហារនៅតាមភោជនីយដ្ឋាន អាហារដ្ឋាន និងកន្លែងលក់ម្ហូបអាហារផ្សេងៗទៀត ព្រមទាំងធ្វើដំណើរទេសចរជាលក្ខណៈគ្រួសារ ទៅតាមតំបន់ទេសចរនានានៅក្នុងប្រទេសកម្ពុជាយើង ខណៈដែលភ្ញៀវទេសចរអន្ដរជាតិ ក៏កំពុងមានការកើនឡើងយ៉ាងខ្លាំងផងដែរ ហេតុដូច្នេះហើយបានធ្វើឲ្យអាជីវកម្មចំណីអាហារ ក៏មានការកើនឡើង ពិសេសនៅតាមរាជធានីភ្នំពេញ និង ខេត្តគោលដៅទេសចរណ៍ធំៗដូចជាខេត្តសៀមរាប , ព្រះសីហនុ , កំពត , កែប និង ខេត្តបាត់ដំបង រួមទាំងខេត្តមួយចំនួនទៀត ។
ឯកឧត្ដមបណ្ឌិត អឿន បូរារ័ត្នន៍ បញ្ជាក់បន្ថែមថា ដោយមានការព្រួយបារម្ភពីបញ្ហាគុណភាពអនាម័យ និង សុវត្ថិភាពចំណីអាហារ នៅតាមភោជនីយដ្ឋាន អាហារដ្ឋាន និងកន្លែងលក់ម្ហូបអាហារផ្សេងៗទៀតនោះ ឯកឧត្ដមសាស្ដ្រចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល បានធ្វើការណែនាំ និងជំរុញឲ្យថ្នាក់ដឹកនាំ និងមន្ដ្រីជំនាញមានការយកចិត្តទុកដាក់ចុះណែនាំ ត្រួតពិនិត្យគុណភាព អនាម័យ និងសុវត្ថិភាពចំណីអាហារឲ្យបានហ្មតចត់ និងបានគ្រប់ភោជនីយដ្ឋាន អាហារដ្ឋាន និងកន្លែងលក់ម្ហូបអាហារនានា ពីព្រោះកន្លងមកនៅប្រទេសកម្ពុជាយើង ក៏មានការពុលចំណីអាហារ និងភេសជ្ជៈជាច្រើនលើកមកហើយ ។
ឯកឧត្ដម អឿន បូរារ័ត្នន៍ បញ្ជាក់បន្ថែមទៀតថា យោងតាមស្ថិតិនៃការពុលចំណីអាហាររបស់ក្រសួងសុខាភិបាល ពីឆ្នាំ២០១៤ ដល់ឆ្នាំ២០១៨ ក្នុងប្រទេសកម្ពុជា មានការពុលចំណីអាហារសរុបចំនួន ១១៩ ដង មានជនរងគ្រោះចំនួន ៥.៣២០នាក់ និងស្លាប់ចំនួន៧៨នាក់ ដែលបណ្តាលមកពីការបរិភោគចំណីអាហារ ស្រា-ស និងស្រាថ្នាំ ដែលចម្លងដោយមេរោគ សារធាតុគីមីពុល ឬលើកំរិត និងមានមេតាណុលកម្រិតខ្ពស់ ដែលនេះជាតួលេខមួយគួរឱ្យចាប់អារម្មណ៍ និងពង្រឹងសកម្មភាពអធិការកិច្ច ។
ឯកឧត្ដម អឿន បូរារ័ត្នន៍ មានប្រសាសន៍បន្ថែមទៀតថា កន្លែងឈប់សំចតរថយន្តក្រុង តាក់ស៊ី និងយាន្តជំនិះផ្សេងៗតាមផ្លូវធ្វើដំណើរ ដូចជានៅស្គន់ ស្ទោង និងបណ្តាស្រុកដទៃដែលមានភោជនីយដ្ឋាន និងកន្លែងលក់ចំណីអាហារបម្រើអ្នកដំណើរ គឺមានមនុស្សសម្រាកបរិភោគច្រើន ត្រង់កន្លែងនេះក៏មានហានិភ័យខ្ពស់ ព្រោះអ្នកដំណើរអាចនាំមកនូវមេរោគផ្សេងៗជាមួយខ្លួនគាត់ ឬបើមានឧប្បត្តិហេតុពុលនោះ នឹងបង្កដល់អ្នកដំណើរច្រើននាក់ ដែលនេះជាចំនុចត្រូវគិតគូពីកម្រិតហានិភ័យលើការប៉ះពាល់សុខភាពរបស់អ្នកប្រើប្រាស់ចំណីអាហារ ហេតុនេះហើយបានជាយើងត្រូវបង្កើនការត្រួតពិនិត្យ ផ្លាស់ប្តូររបៀបត្រួតពិនិត្យសុវត្ថិភាពចំណីអាហារ ពីបែបបុរាណ មកបែបទំនើប ដោយបង្កើនឱ្យកាន់តែច្បាស់លាស់តាមលក្ខណៈវិទ្យាសាស្ត្រ និងទំនើបកម្មវិញ ដែលថ្ងៃនេះ គ្រូឧទ្ទេសនាមនឹងបង្ហាញជូនដល់សិក្ខាកាមពីអ្វីដែលហៅថា ការធ្វើអធិការកិច្ចចំណីអាហារ ដោយផ្អែលើកម្រិតហានីភ័យចំណីអាហារ ។
មានប្រសាសន៍ក្នុងឱកាសនោះដែរ លោក ពិន ប្រាកដ អភិបាលរងខេត្ត បានសម្ដែងនូវការគាំទ្រទាំងស្រុងចំពោះការវគ្គបណ្តុះបណ្តាលនេះ ដែលរៀបចំឡើងដោយក្រសួងសុខាភិបាល ព្រោះវាមានសារៈសំខាន់បំផុតចំពោះមន្ត្រីរបស់យើង ក្នុងការទទួលបានចំណេះដឹងយ៉ាងពិតប្រាកដ អំពីរបៀបត្រួតពិនិត្យសុវត្ថិភាពចំណីអាហារតាមលក្ខណៈវិទ្យាសាស្ត្រ និងទំនើបកម្ម សំដៅលើកកម្ពស់សុខុមាលភាពជូនដល់ប្រជាពលរដ្ឋយើង ដូច្នេះក្នុងរយៈពេល០៤ថ្ងៃនេះ សូមឲ្យសិក្ខាកាមទាំងអស់ ត្រូវយកចិត្តទុកដាក់ឲ្យបានហ្មត់ចត់ ដើម្បីលើកកម្ពស់ប្រសិទ្ធភាពការងារ សម្រាប់ការចូលរួមកាត់បន្ថយភាពក្រីក្ររបស់ប្រជាពលរដ្ឋ តាមរយៈនៃការថែទាំសុខភាពប្រចាំថ្ងៃ ៕
សូមបញ្ជាក់ថា យោងតាមខ្លឹមសារប្រកាសអន្តរក្រសួងលេខ ៨៦៨ ឧរថ.ប្រក ស្តីពីការអនុវត្ត និងការរៀបចំសម្របសម្រួលស្ថាប័នកិច្ច នៃប្រព័ន្ធគ្រប់គ្រងសុវត្ថិភាពចំណីអាហារ ត្រង់ប្រការ១៩ និងប្រការ២០ ក្រសួងសុខាភិបាលទទួលបន្ទុកអធិការកិច្ចនៅកន្លែងប្រើប្រាស់ចុងក្រោយ គឺនៅតាមភោជនីយដ្ឋាន, អាហារដ្ឋាន គ្រឹះស្ថានផលិតចំណីអាហារ និងអាជីវកម្មចំណីអាហារ ហើយការងារនេះ ក្រសួងសុខាភិបាល បាននឹងកំពុងធ្វើយ៉ាងសកម្មរហូតមកដល់បច្ចុប្បន្ន ដោយបានចេញវិញ្ញាបនបត្របញ្ជាក់អនាម័យចំនួន ២.៤៥២កន្លែង និងវិញ្ញាប័នបត្រគោលការណ៍អនុវត្តអនាម័យល្អសម្រាប់ភោជនីយដ្ឋាន និងអាហារដ្ឋាន សរុបចំនួន៣៨២កន្លែង ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
