លោក ព្រៅ ខេម រិទ្ធ ប្រធានសាខាកាំកុងត្រូលខេត្តសៀមរាប បានមានប្រសាសន៍ថា ក្នុងឱកាសចុះត្រួតពិនិត្យសុវត្ថិភាពលើចំណីម្ហូបអាហារ នៅផ្សាររលួស ស្ថិតនៅភូមិរលួស ឃុំរលួស ស្រុកប្រាសាទបាគង កាលពីរសៀលថ្ងៃទី២០ ខែសីហា ឆ្នាំ២០១៩នេះ ក្រោមកិច្ចសហការជាមួយមន្ទីរពាណិជ្ជកម្មខេត្ត និងអ្នកពាក់ព័ន្ធផងនោះ មន្ត្រីជំនាញរបស់លោក ពុំបានរកឃើញមានសារធាតុគីមីហាមឃាត់ ដែលបានផ្ទុកនៅក្នុងម្ហូបចំណីគ្រប់ប្រភេទ និង ទំនិញគ្រឿងឧបភោគបរិភោគមួយចំនួន ដែលបានដាក់តាំងលក់នៅក្នុងផ្សារឡើយ បន្ទាប់ពីបានធ្វើតេស្ត និងពិសោធន៍រកសារធាតុគីមីនៅក្នុងម្ហូបអាហារគំរូមួយចំនួន រួមមានដូចជា៖ សណ្តែកបណ្តុះ , គល់ស្លឹកគ្រៃ , ស្ពៃជ្រក់ , សាច់ក្រក , នំបញ្ចុក និង សុពលភាពនៃការប្រើប្រាស់ហួសកាលបរិច្ឆេទទំនិញគ្រប់ប្រភេទ ។
លោក ព្រៅ ខេម រិទ្ធ បានបញ្ជាក់បន្ថែមថា នេះគឺជាករណីចាំបាច់បំផុតសម្រាប់ក្រុមការងារជំនាញរបស់លោកប្រសិនបើការត្រួតពិនិត្យរួចហើយឃើញថា នៅក្នុងម្ហូបអាហារមានការដាក់លាយនូវសារធាតុគីមីដែលត្រូវបានហាមឃាត់នោះ ខាងក្រុមការងារជំនាញរបស់លោក នឹងធ្វើការដកហូតយកទៅកំទេចចោលភ្លាមៗ ហើយយើងណែនាំគាត់នឹងធ្វើកិច្ចសន្យាមិនមានជាលើកទី២ទៀតឡើយ ។
ក្នុងឱកាសនោះដែរ លោក ព្រៅ ខេម រិទ្ធ ក៏បានធ្វើការណែនាំដល់បងប្អូនអាជីវករ ដែលបានលក់ដូរនៅទីនោះ សុំឲ្យពួកគាត់ចូលរួមសហការជាមួយនឹងការចុះត្រួតពិនិត្យទំនិញម្ហូបអាហារ ដើម្បីរួមគ្នាទប់ស្កាត់ និង បញ្ឈប់ការប្រើប្រាស់សារធាតុគីមីលើចំណីអាហារ ដោយផ្តោតលើការយកចិត្តទុកដាក់ចំពោះសុខភាពបងប្អូនប្រជាពលរដ្ឋជាដើម ព្រមទាំងបានចែកចាយនូវស្លាកសញ្ញាស្តីពីការហាមឃាត់ ការប្រើប្រាស់ ដើម្បីអប់រំណែនាំពន្យល់អំពីបញ្ហាការវិចខ្ចប់ ការទុកដាក់ឲ្យមានអនាម័យល្អ ឬការលក់ដូរធ្វើយ៉ាងណាឲ្យមានការប្រុងប្រយ័ត្នជាមុន ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
