អនុសាខាកាកបាទក្រហមកម្ពុជាស្រុកស្វាយលើ ដឹកនាំដោយ លោក ស៊ិក ប៊ុនស៊ិន សមាជិកក្រុមប្រឹក្សាស្រុក និងជាប្រធានអនុសាខាកាកបាទក្រហមកម្ពុជាស្រុក បានចុះសាកសួរសុខទុក្ខជនរងគ្រោះពីរនាក់ប្តីប្រពន្ឋក្រីក្រមួយ មានផ្ទៃពោះ៧ខែ ដែលទទួលរងគ្រោះដោយសាររន្ទះបាញ់របួស ហើយកំពុងសំរាកព្យាបាលនៅមន្ទីរពេទ្យបង្អែកស្រុកសូទ្រនិគម ព្រមទាំងបាននាំយកអំណោយមនុស្សធម៌ចែកជូនផងដែរ រួមមាន ៖ ទឹកដោះគោឆៅ១យូរ , ទឹកផ្លែ ឈើ១កេស , ទឹកសុទ្ធ១កេស និងសរុបថវិកាចំនួន ៨៥ម៉ឺនរៀល ក្នុងនោះមានថវិការបស់អនុសាខាចំនួន ២០ម៉ឺនរៀល , រដ្ឋបាលស្រុកស្វាយលើចំនួន២០ម៉ឺនរៀល , សប្បុរសជនសមាគមន៍នានា សប្បុរស ជនសមាគមន៍នារីស្រុកចំនួន ១៥ម៉ឺនរៀល , ថវិការដ្ឋបាលឃុំតាសៀម ចំនួន ២៥ម៉ឺនរៀល និង លោកមេភូមិដំបូកខ្ពស់ចំនួន ៥ម៉ឺនរៀល ។
សូមបញ្ជាក់ថា កាលពីថ្ងៃទី២០ ខែសីហា ឆ្នាំ២០១៩នេះ នៅភូមិដំបូកខ្ពស់ ក្នុងឃុំតាសៀម ស្រុកស្វាយលើ មានភ្លៀងរលឹមស្រិចៗ ខណៈមនុស្សពីរនាក់ គឺឈ្មោះ យ៉ង យ៉ុន ភេទប្រុស ត្រូវជាប្ដី និង ឈ្មោះ ធឿន ច្រឹប ភេទស្រី ត្រូវជាប្រពន្ធដែល មានផ្ទៃពោះចំនួន៧ខែ បានអង្គុយលេងក្រោមផ្ទះ ហើយក៏មានករណីរន្ទះបាញ់សសរផ្ទះ បណ្តាលឲ្យទាំងពីរនាក់ប្តីប្រពន្ឋនោះ ទទួលរងរបួសស្រាល ហើយត្រូវបានបញ្ជូនទៅព្យាបាលនៅមន្ទីរពេទ្យបង្អែកសូទ្រនិគម ។
ក្នុងឱកាសនោះដែរ លោក ស៊ិក ប៊ុនស៊ិន បានផ្តាំផ្ញើដល់ជនរងគ្រោះទាំងពីរនាក់ ឲ្យខិតខំថែរក្សាសុខភាពឆាប់បានជាសះស្បើយត្រឡប់ទៅគេហដ្ឋានវិញ ៕
អត្ថបទ និង រូបថត ៖ រដ្ឋបាលខេត្តសៀមរាប
កែសម្រួលអត្ថបទ ៖ លោក លីវ សាន្ត
