ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី២១ ខែសីហា ឆ្នាំ២០១៩នេះថា អាជ្ញាធរបានបញ្ជាក់កាលពីថ្ងៃពុធ ទី២១ ខែសីហា ថា ចំនួនអ្នកស្លាប់ដោយការ បំផ្ទុះគ្រាប់បែកអត្តឃាតមួយ ដែលបានវាយប្រហារមកលើ ទីតាំងនៃការរៀបពិធីមង្គលការមួយ នៅរដ្ឋធានីកាប៊ុលរបស់ អាហ្វហ្គានីស្ថានបានកើនឡើងដល់ ៨០នាក់ ។
មន្ត្រីសុខាភិបាលសាធារណៈ មួយរូបបានប្រាប់ដល់ស៊ិនហួ ដោយសុំមិនបញ្ចេញឈ្មោះថា “តួលេខចុងក្រោយបង្អស់ ដែលចេញដោយអាជ្ញាធរ សុខាភិបាលបានរកឃើញថា មានអ្នករងរបួសជាច្រើននៃ ការវាយប្រហារកាលពីយប់ថ្ងៃសៅរ៍ ហើយការរងរបួសរបស់ពួកគេច្រើននាក់ ដែលធ្វើឱ្យចំនួនអ្នកស្លាប់រហូតដល់ទៅ ៨០នាក់នៃឧប្បត្តិហេតុនេះ” ។
ក្រសួងមហាផ្ទៃអាហ្វហ្គានីស្ថាន បានប្រកាសថា មនុស្ស៦៣នាក់ត្រូវបានសម្លាប់ និង១៨២នាក់ផ្សេងទៀតបានរងរបួស នៅពេលដែលអ្នកបំផ្ទុះគ្រាប់បែក អត្តឃាតម្នាក់បានបំផ្ទុះឡើងដោយ ពាក់អាវកាក់អត្តឃាតរបស់គាត់ នៅឯទីតាំងរៀបពិធីដែល មានភ្ញៀវចូលរួមជាច្រើន ។
អ្នករងរបួសភាគច្រើន បានរងរបួសធ្ងន់ធ្ងរដោយ ប៉ើងអំបែងគ្រាប់ដែលត្រូវបាន ប្រើនៅក្នុងអាវគ្រាប់បែកអត្តឃាត។
ក្រុមភេរវកររដ្ឋអ៊ីស្លាម ហៅកាត់ (IS) បានប្រកាសទទួលខុសត្រូវ ចំពោះការវាយប្រហារដ៏សាហាវនេះ៕
ប្រភព ៖ដើមអំពិល
ប្រែសម្រួលដោយ៖ ម៉ៅ បុប្ផាមករា
