កាលពីថ្ងៃទី២១ ខែសីហា ឆ្នាំ២០១៩ម្សិលមិញនេះ ឯកឧត្តម ហង់ ពៅ អគ្គនាយកអាជ្ញាធរជាតិអប្សរា បានដឹកនាំកិច្ចប្រជុំមួយ ដើម្បីតាមដានអនុសាសន៍ដែលទទួលបានជាផ្លូវការ តាមរយៈកិច្ចប្រជុំបច្ចេកទេសលើកទី៣២ នៃគណៈកម្មាធិការអន្ដរជាតិ សម្របសម្រួល កិច្ចគាំពារ និង អភិវឌ្ឍន៍តំបន់អង្គរ ដែលហៅកាត់ថា អាយស៊ីស៊ី-អង្គរ កន្លងមក លើគោលដៅអនុវត្តន៍ការងារនៅតាមការដ្ឋាន ក្នុងតំបន់អង្គរទាំងផ្នែកអភិរក្ស និងអភិវឌ្ឍន៍ ព្រមទាំងបានជំរុញការអនុវត្តការងារកាន់តែមានប្រសិទ្ធភាព ជាពិសេសបានជជែក វែក ញែកអំពីអនុសាសន៍នីមួយៗ ដើម្បីស្វែងយល់ពីបញ្ហា ភាពខ្វះខាត ចម្ងល់ លទ្ធភាពក្នុងការអនុវត្ត និងដោះស្រាយបញ្ហាប្រឈមនានាដែលបានកើតឡើងនៅតាមការដ្ឋានរួមគ្នា។
ក្រោយពីកិច្ចប្រជុំ អ្នកជំនាញការអាជ្ញាធរជាតិអប្សរា រួមទាំងសមាជិកតំណាងលេខាធិការដ្ឋានអាយស៊ីស៊ី-អង្គរ នឹងចុះតាមដានផ្ទាល់តាមការដ្ឋានទាំងក្នុង និងក្រៅតំបន់អង្គរ ដើម្បីមើលស្ថាន ភាពជាក់ស្តែង ងាយស្រួលរាយការណ៍ជូនអង្គប្រជុំបច្ចេកទេសនៃ អាយស៊ីស៊ី-អង្គរលើកទី៣៣ ដែលនឹងប្រព្រឹត្តទៅនាខែធ្នូខាងមុខនេះ ។
សូមបញ្ជាក់ថា កិច្ចប្រជុំនេះ ធ្វើឡើងជាប្រចាំដើម្បីតាមដានរាល់ការអនុវត្តកិច្ចការអភិរក្ស ជួសជុល និងអភិវឌ្ឍន៍ប្រកបដោយចីរភាពក្នុងរមណីយដ្ឋានអង្គរ ជាពិសេសផ្ទៀងផ្ទាត់ភាពសមស្របទាំងលក្ខណៈបច្ចេកទេស ទាំងការអនុវត្តគម្រោង និងទាំងសម្ភារ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
