កាលពីព្រឹកថ្ងៃទី២១ ខែសីហា ឆ្នាំ២០១៩ លោក ឈូក សុម៉ាឡា មន្ត្រីនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ នៃអាជ្ញាធរជាតិអប្សរា បានទទួលវត្ថុបុរាណចំនួន៥ប្រភេទ ពីលោកវីរសេនីយ៍ត្រី ជុំ សុវណ្ណ នាយផ្នែកនីតិវិធី នៃអង្គភាពនគរបាលការពារបេតិកភណ្ឌប្រចាំតំបន់អង្គរ ដែលវត្ថុបុរាណទាំង៥នេះ ត្រូវបានយកទៅរក្សាទុកបណ្តោះអាសន្ននៅការិយាល័យនាយកដ្ឋាន ដើម្បីចុះបញ្ជីទៅតាមបច្ចេកទេស និងរៀបចំសំណើរសម្រាប់យកទៅរក្សាទុកនៅសារមន្ទីរនរោត្តម សីហនុអង្គរ ។
វត្ថុបុរាណទាំង៥ប្រភេទនេះ រួមមាន ៖ ១. បំណែកដងខ្លួនព្រះពុទ្ធរូប ធ្វើពីថ្មភក់ មានកម្ពស់ ៦២ សង់ទីម៉ែត្រ , ទទឹង ៣៨ សង់ទីម៉ែត្រ និងកម្រាស់១៨ សង់ទីម៉ែត្រ , ២. បំណែកកញ្ចាំងធ្វើពីថ្មភក់ មានកម្ពស់៤៣សង់ទីម៉ែត្រ , ទទឹង៣៤ សង់ទីម៉ែត្រ និងកម្រាស់ ៣០ សង់ទីម៉ែត្រ , ៣. បំណែកភ្នែនទេវរូប ធ្វើពីថ្មភក់ មានកម្ពស់១១ សង់ទីម៉ែត្រ , ទទឹង១១សង់ទីម៉ែត្រ និងកម្រាស់៩ សង់ទីម៉ែត្រ , ៤. កុលាលភាជន៍(ថូ) ធ្វើពីដីដុត កម្ពស់២៥ សង់ទីម៉ែត្រ និងទទឹង២០ សង់ទីម៉ែត្រ និង ៥. កុលាលភាជន៍(ខួច) ធ្វើពីដីដុត កម្ពស់៧,៥ សង់ទីម៉ែត្រ និងទទឹង៨ សង់ទីម៉ែត្រ ។
នៅក្នុងពីធីនោះ លោក ឈូក សុម៉ាឡា បានលើកឡើងថា វត្ថុបុរាណទាំង៥ប្រភេទ គឺអង្គភាពនគរបាលការពារបេតិកភណ្ឌប្រចាំតំបន់អង្គរ ទទួលបានតាមរយៈប្រជាជនដែលប្រទះឃើញដោយចៃដន្យក្នុងតំបន់ខ្លួនរស់នៅ ហើយរាយការណ៍ដល់អាជ្ញាធរមូលដ្ឋាន ដែលមានសមត្ថកិច្ចដើម្បីយកមករក្សាទុក ហើយបន្ទាប់ពីទទួលបាន អង្គភាពនគរបាលការពារបេតិកភណ្ឌប្រចាំតំបន់អង្គរ បានប្រគល់ ឱ្យអាជ្ញាធរជាតិអប្សរា ដែលជាស្ថាប័នមានសមត្ថកិច្ចក្នុងការគ្រប់គ្រង និងថែរក្សា ដូច្នេះអាជ្ញាធរជាតិអប្សរានឹងធ្វើការសម្អាត ដើម្បីតម្កល់ទុកនៅសារមន្ទីរ ។
លោក ឈូក សុម៉ាឡា បានឲ្យដឹងបន្ថែមថា រមណីយដ្ឋានអង្គរ សម្បូរបុរាណដ្ឋាន មានសំណល់បុរាណវិទ្យាទាំងលើដី និងក្រោមដី ដូច្នេះ តាងនាមឲ្យអាជ្ញាធរជាតិអប្សរា សូមអំពាវនាវដល់សាធារណជនទាំងអស់ សូមចូលរួមថែរក្សា ហើយជៀសវាងការជីកកកាយ ឬ ឈួសឆាយទីតាំងបុរាណដ្ឋាន និង រាយការណ៍ដល់អាជ្ញាធរមានសមត្ថកិច្ច ឬអាជ្ញាធរជាតិអប្សរា ក្នុងរកណីបានជួបប្រទះនូវបុរាណវត្ថុទាំងនោះ ។
លោក ឈូក សុម៉ាឡា បានឲ្យដឹងបន្ថែមទៀតថា អាជ្ញាធរជាតិអប្សរា សូមថ្លែងអំណរគុណដល់ស្ថាប័នពាក់ព័ន្ធដែលយកចិត្តទុកដាក់ការពារនូវសម្បត្តិបេតិកភណ្ឌដែលជារបស់យើងទាំងអស់គ្នា ពិសេសប្រជាពលរដ្ឋដែលបានចូលរួមថែរក្សាតាមរយៈការប្រគល់ឬផ្តល់ព័ត៌មានដល់សមត្ថកិច្ច ដែលសកម្មភាពនេះ សរបញ្ជាក់ឱ្យឃើញពីការយល់ដឹងពីតម្លៃនៃមរតកដូនតា និងចង់ថែរក្សាឱ្យគង់វង្សសម្រាប់កូនចៅជំនាន់ក្រោយ ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
