ដោយផ្អែកតាមរបាយការណ៍របស់អគ្គលេខាធិការ នៃគណៈកម្មាធិការជាតិ សុវត្ថិភាពចរាចរណ៍ផ្លូវគោកកាលពីពេលថ្មីនេះ បានបង្ហាញឲ្យដឹងថា នៅក្នុងខេត្តសៀមរាប មានអ្នកបើកបរម៉ូតូដោយពាក់មួកសុវត្ថិភាព បានចំនួន៩២%ហើយ ដែលនេះគឺជាអត្រាខ្ពស់ជាងគេបំផុតក្នុងប្រទេសកម្ពុជា ខណៈអ្នកជិះម៉ូតូនៅក្នុងទីក្រុងភ្នំពេញ មានតែចំនួន៨៩%តែប៉ុណ្ណោះ ដែលជាអត្រាខ្ពស់លំដាប់ ទី២ ចំណែកខេត្តផ្សេងៗទៀត មានអ្នកជិះម៉ូតូពាក់មួកសុវត្ថិភាពមានត្រឹមតែ ពី ៥០ ទៅដល់៦០% ហើយ ខេត្តដែលមានអត្រាអ្នកជិះម៉ូតូពាក់មួកសុវត្ថិភាពទាបជាងគេបំផុតនោះគឺ ខេត្ត មណ្ឌលគីរី ដែលមានត្រឹមតែ៤០%។
តាមរបាយការណ៍របស់ស្នងការដ្ឋាននគរបាលខេត្តសៀមរាប បានបញ្ជាក់បន្ថែមថា បន្ទាប់ពីនគរបាលចរាចរណ៍ខេត្ត បានអនុវត្តយុទ្ធនាការមួយខែ ដើម្បីចាប់ឃាត់ម៉ូតូ មិនផាកពិន័យ តែតម្រូវឱ្យទៅរកមួកមកពាក់ទើបឱ្យបន្តដំណើរ ដែលអនុវត្តចាប់ពីថ្ងៃទី១៩ខែកក្កដា ដល់ ថ្ងៃទី១៨ខែសីហា ដោយ បាន ត្រួតពិនិត្យ អ្នកបើកបរ ម៉ូតូ ១៥ ២១៤គ្រឿង ហើយក្នុងនោះ អ្នកបើកបរម៉ូតូមិនពាក់មួកសុវត្ថិភាព មាន ១ ២១៧គ្រឿង ឬ ស្មើនឹង០.៨%។
សូមបញ្ជាក់ថា ក្រោយពីបញ្ចប់យុទ្ធនាការក្នុងរយៈពេលមួយខែកន្លងទៅនេះ នគរបាលចរាចរណ៍ កំពុងចាប់ផ្ដើម ផាកពិន័យជាទឹកប្រាក់ ឡើងវិញ ចំពោះអ្នកបើកបរម៉ូតូមិនពាក់មួកសុវត្ថិភាព ដោយត្រូវពិន័យប្រាក់១ម៉ឺន៥ពាន់រៀល ហើយតម្រូវឱ្យទៅរកមួកមកពាក់ទើប អនុញ្ញាតឱ្យបន្តដំណើរទៀតហើយការចាប់ផាកពិន័យនេះ បានចាប់ផ្ដើម ពីថ្ងៃទី១៩ ខែសីហាកន្លងទៅ ក្នុងនោះដែរស្នងការដ្ឋាននគរបាលខេត្ត ក៏សូមសំណូមពរ ដល់ប្អូនប្រជាជនទាំងអស់ក្នុងខេត្តសៀមរាប ចូលរួមគោរពច្បាប់ចរាចរណ៍ ហើយអ្នកបើកបរម៉ូតូត្រូវបន្តចូលរួមពាក់មួកសុវត្ថិភាពអោយបានទាំងអស់គ្នា ដោះម្បីទទួលបានអត្រាអ្នកពាក់មួកសុវត្តិភាព១០០ភាគរយផងដែរ ៕
#រដ្ឋបាលខេត្តសៀមរាប
កែសម្រួល៖ អ៊ុន ណារាជ្យ
