ប្រកាសលេខ ១១៩ ប្រ.ក ស្តីពីការគ្រប់គ្រងការនាំចេញ-នាំចូលវត្ថុសិល្បៈ របស់ក្រសួងវប្បធម៌និងវិចិត្រសិល្បៈ ចុះថ្ងៃទី២៥ ខែកក្កដា ឆ្នាំ២០១៩ ដែលមានទិដ្ឋភាពរួម ដើម្បីទប់ស្កាត់ការនាំចេញវត្ថុបូរាណដោយខុសច្បាប់ និងមានគោលដៅកំណត់នីតិវិធីនៃការដាក់ពាក្យស្នើសុំ ការកំណត់កម្រៃសេវារដ្ឋបាលសមត្ថកិច្ច ក្នុងការពិនិត្យនិងការផ្តល់លិខិតអនុញ្ញាតិ ការនាំចេញវត្ថុសិល្បៈទៅក្រៅប្រទេស ការផ្អាកនិងបញ្ឈប់ជាផ្លូវការចំពោះអាជីវកម្មលក់វត្ថុសិល្បៈណា មិនអនុវត្តតាមគោលការណ៍ច្បាប់ បានស្ថិតនៅក្នុងវេទិកាពិគ្រោះយោបល់យ៉ាងសំខាន់នៃអង្គសិក្ខាសាលាមួយ ដើម្បីប្រសិទ្ធភាពនៃការអនុវត្តប្រកាសនោះ នាថ្ងៃអនាគត ។ អង្គសិក្ខាសាលា វេទិកាពិគ្រោះយោបល់នេះ បានដំណើរការនៅខេត្តសៀមរាបរយៈពេល១ថ្ងៃ ថ្ងៃទី២៣ ខែសីហា ឆ្នាំ២០១៩នេះ ។
ឯកឧត្តម ជុច ភឿន រដ្ឋលេខាធិការក្រសួងវប្បធម៌និងវិចិត្រសិល្បៈ នាព្រឹកថ្ងៃបើកអង្គសិក្ខាសាលានោះ បានថ្លែងថា ៖ សិក្ខាសាលានេះ នឹងត្រូវបានលើកបង្ហាញអំពីបញ្ហាប្រឈមនានា ពាក់ព័ន្ធទៅនឹងការធ្វើអាជីវកម្មវត្ថុសិល្បៈសម្រាប់ការនាំចេញពីកម្ពុជា និងការនាំវត្ថុសិល្បៈពីបរទេស ចូលមកកម្ពុជា បច្ចុប្បន្ននេះ គឺមានលំហូរចូលវត្ថុសិល្បៈពីបរទេសមកកម្ពុជា ពិសេសនោះគឺតាមច្រករបៀង ទាំងវត្ថុសិល្បៈផលិតថ្មី និង វត្ថុសិល្បៈចម្លងដូច មកដាក់តាំងលក់តាមតូបលក់វត្ថុអនុស្សាវរីយ៍ ឬហាងអាជីវកម្មវត្ថុសិល្បៈយ៉ាងច្រើនសន្ធឹកសន្ធាប់ដោយមានបិទស្ទីគឃ័រ (តែម ) ថា ផលិតក្នុងព្រះរាជាណាចក្រកម្ពុជា ដែលនេះគឺជាកត្តាធ្វើឲ្យមានផលប៉ះពាល់ដល់សិប្បករ ឬ ក៏ប៉ះពាល់សិប្បកម្មលក្ខណៈគ្រួសារ ហើយដែលធ្ងន់ធ្ងរជាងនេះ គឺវាប៉ះពាល់ដល់ទំនុកចិត្តអតិថិជនជាភ្ញៀវទេសចរ ។
ជាទូទៅ អង្គសិក្ខាសាលានេះ បានលើកបង្ហាញអំពីបទដ្ឋានគតិយុត្តិមួយចំនួន និងបញ្ហាប្រឈមនានាលើការធ្វើអាជីវកម្មវត្ថុសិល្បៈនៅក្នុងព្រះរាជាណាចក្រកម្ពុជា ហើយនិយាយដោយឡែក គឺនៅក្នុងខេត្តសៀមរាប ដែលជាខេត្តដ៏មានសក្តានុពលទេសចរណ៍ធំជាងគេក្នុងចំណោមរាជធានី- ខេត្តទាំង២៥ ។
លោកស្រី យូ សុភា អភិបាលរងខេត្តសៀមរាប ទទួលបន្ទុកការងារវប្បធម៌ បានលើកឡើងថា ពាក់ព័ន្ធទៅនឹងបទដ្ឋានគតិយុត្តិ និង បញ្ហាប្រឈមនានាលើការធ្វើអាជីវកម្ម សិប្បកម្មវត្ថុសិល្បៈនៅខេត្តសៀមរាប គឺមិនទាន់មានប្រក្រតីភាពក្នុងការប្រព្រឹត្តិនៅឡើយនោះទេ ។ ការផលិតវត្ថុសិសល្បៈថ្មីមួយចំនួន មិនទាន់ស្របតាមស្តង់ដារនិងរចនាបថខ្មែរ ។ ជាមួយគ្នានេះ នៅមានការក្លែងបន្លំ នាំចូលវត្ថុសិល្បៈពីបរទេស ថាជាវត្ថុសិល្បៈផលិតនៅក្នុងព្រះរាជាណាចក្រកម្ពុជាទៀតផង ។ ទាំងនេះមិនត្រឹមតែជាឥទ្ធិពលមិនល្អ ធ្វើឲ្យប៉ះពាល់ផលិតផលវប្បធម៌ជាតិប៉ុណ្ណោះទេ តែវាបានធ្វើឲ្យមានផលអវិជ្ជមាន ដល់គោលនយោបាយរក្សានិរន្តរភាពនៃកំណើនភ្ញៀវទេសចរ ផងដែរ ។
សូមបញ្ជាក់ថា អង្គសិក្ខាសាលាវេទិកាពិគ្រោះយោបល់នេះ រៀបចំដោយមន្ទីរវប្បធម៌និងវិចិត្រសិល្បៈខេត្តសៀមរាប សហការជ្រោមជ្រែងដោយនាយកដ្ឋានបូរាណវត្ថុនៃអគ្គនាយកដ្ឋានបេតិកភណ្ឌ នាយកដ្ឋានសិល្បសូនរូបនិងសិល្បសិប្បកម្ម នៃអគ្គនាយកដ្ឋានបច្ចេកទេសវប្បធម៌ គាំទ្រដោយក្រសួងវប្បធម៌និងវិចិត្រសិល្បៈ អាជ្ញាធរខេត្ត និង អាជ្ញាធរជាតិអប្សរា ។ អ្នកចូលរួមមានមកពីស្ថាប័ន និងបណ្តាអង្គភាព សមត្ថកិច្ចពាក់ព័ន្ធ វិស័យឯកជន សិប្បករ បណ្តាម្ចាស់សិប្បកម្ម និងអាជីវករ អ្នកធ្វើអាជីវកម្មលក់វត្ថុសិល្បៈអនុស្សាវរីយ៍ ផងដែរ ៕
អត្ថបទ និង រូបភាព ៖ ងិន គឺមឡេង